Delhi a tuailaite’ hiiptu khemnate leh a douzoh diingdan

“Pilvang unla, limsak un; na melma uh Diabol humpinelkai humham bang in a nek theih ding zong in a vial vakvak hi”

Mihingte Pathian in hon hamsiat sa khelhna khovel ah om i hihman in khelhna leh khemnate a tuaklou ki omlou ding in ka um hi. (Luka 4:1-13, Mathai 4:1-11) Sim suk le Toupa Jesu ngei leng leitung a a omlai in Setan khemna ana tuak ngei hi, i Toupa Jesu hial inle khemna a tuah in tuh ei mihing dengdel tak ten leng i tuak kei ding uh chih om hetlou ding hi.Himahleh Jesu in khemna a tuah te a douzou a huchi mahbang in enle bangchi douzoh ding hiam chih kikum khom leng ka ut hi.

Ei mihing dengdel tak Tuailaite’n leng Delhi khopi a thilteng phial deih leh duh kimna mun ah hon hiiptu khemna i tuahte uh leh a douzoh diing dan tomkim tak in kikum khomleng i chi hi.

KHOPI LEH KHEMNA HON HIIP THEI HUNBI TE
Joseph tangthu apan enleng i chi a a nuai a bang in (Genesis 39)

1. Tuailai khangnou lai: Joseph bang a tuailai khangdawng lai hun hoih leh poimoh, mohpuakna leh sepding tampi hun i neihlai mah Setan in leng hon enlah pen hi.Tuailai lai hun hoih nang kua a ding in na zang dia lawm?
2. Lohchinna leh lawhching Tuailai: Joseph Potipher inn a lawhching tak a a omlai hun in Potipher zi khemna ah hiip in a na om mahleh. Joseph in a na taikhiak san hi.Nang leng khem a na om chiang in khem a om na hihlam thei in Joseph bang in na taisan ngam hiam?
3. Hun Lemtang: Joseph in tuh khemna a delhkei a himahleh khemna a hiip a om a Potipher zi in ‘hun lemtang’ zong in khem som hi. ‘Hun lemtang’ leh lawm leh vualte toh kikholkhom hiven’g hih suk mai ding aka chi in khemna ah pilut in na om kha hiam?
4. Inn mun apat gamla tak a om: Joseph leng a pa kiang a pan gamlapi Potipher inn duh leh deih kimna mun ah om mah bang in Delhi khopi ah nu leh pate toh kigamla tak a om a hon mu di uh lah hilou hiven chia khemna a pilut tuailai na hi kha hiam?
5. Belh ding bei ki sak na: Joseph leng Potipher inn ah Potipher zi’ hek a a om nung a le a haksatna a genna ding om hetlou ding hi. Tuamah bang in nang leng khopi ah belh leh muanding ahihkeileh lawm bei kisakna ziak in khemna ah pilut a om in lawm hoih Jesu zong lou in khovel khelhna ah hiip in na om kha hiam?

KHEMNATE

1. Lauhna a pi a om (1 Kumpipate 18)
   Elizah in Karmel tang a Baal siampu te tung ah vualzawlna a nget in lauhna leh vuallelhna a pi in a na om hi. Tuamah bang in Toupa muanzoh louhna a pi a om tuailai khemna a hiip a om hih theih hi.
2. Utna (Jakob 1:14-16, 1Korinte 10:13, 1 Thesslonika 4:3)
   Mihingte tuh i utnate mah a khemna a pi a om kihi zaw hi. Jesu leng salam a lunggulhte mah in Setan in ana khem hi.
3. Midangte mohsakna (Genesis 3:12-15)
   Tuailaite mikhialpi a leng khial hihlam ki phawklou a midangte mohsak utna lungsim leh thupha tawi zaw lou a mohpuakna laklouhna, leng khemna khat tuailaite tuah hithei hi.
4. Kisaktheihna (Jakob 4:6-7)
   Peter in Toupa nungzuihna kisaktheihpih mahmah mahleh thumvei kitheihmohbawl in huai mah a pukna hong hih mah bang in kisaktheihna leng tuailaite khemna leh pukna khat hi thei hi.
5. Noplenna (Luka 15:12-13b)
   Tapa taimang bang a khovel a noplenna teng zang ut a pa kiang apat taimang mah bang a khovel hauhsakna a hiip a om tuailaite khemna a pilut tu hithei hi.

BANGCHI DOU DING

1. Toupa thununna nuai ah om ding (Sam 40:8, Sam 119:105, Philipite 2:13)
   Khovel a khemna tuah hun a leng Toupa ah lametna nga tuailai, amah thununna nuai a hing gige hithei ding in a thute sim a a deihbang thei a sut ngitnget ding.
2. A thu sut ding (Joshua 1:8, 2Timothi 3:16-17)
   Amah thutak mah sim a, pilna om zong a khemna douzoh na ding a vanzat manpha a zang thei ding a a kisa khol a zang thei ding in. Jesu Khrist inleng Setan khemnate Bible pansan mah in khemna ana douzou hi.
3. Siangthouna (Romte 12:12)
   A siangthou dembei tuailai hi a khovel hindan bang a om mailou a Toupa deihlam zong a, pumpi(tempul)siangthou tak a kep utna lungsim toh Toupa khut a kikemsak a a kithunun zou tuailai hithei ding in.
4. Thumna (1 Thesolonikate 5:16-17, Jakob 6:16, Johan14:13-14)
   Thumna in thil hih thei in, hatna hon pe thei hi. Tuailaite tawplou leh lungkelou in thungetna toh hing tuailai khemna tuah hun a Pathian kiang a kikem sak a a thum masa tuailai hi ding in.
5. Pathian galvan a kithuam ding (Ephesate 6:11-13, Sam 18:39)
   Galnei i hih lam kithei a diabol humpi nelkai humham bang a vial vakvak douzou ding in Tuailaite Pathian Galvan bukim in kivan ni.

Amasapen leh a poimoh penpen “Hotdamna”- lukhu a nei a i ngaihtuahte i thupuknate Toupa deihdan masapen a neih theihna ding in kivan ni. “Diktatna”-awmphaw a zang a i lungtang ngaihtuah giloute khemzoh a i omlouh na ding un.”Kha”-namsau a zang a Hebrute 4:12 a gen bang a kithuam thei ding in.”Ginna”-lum a zang a gilou dou ding leh i Bible a ginna lou in amah pahtak hih vual ahi kei achih mah bang in ginna ah kithuam ni. Ginna leng thil hih omlou a si a hihmah bang in i khete ah “Lemna”-tanchinhoih khe a bun a kal suan khia a i sik na chiang chiang Toupa gam keklian semsem tu hi a,a kalsuan tuailaite Pathian galvan bukim a kithuam in a hon hiip khemnate douzou tuailai hithei ding in Toupan hon ompih chiat ta hen.

Amen.