Delhi a tuailaite’ hiiptu khemnate leh a douzoh diingdan

Khemna himhim etlah huailou hileh khemna a puk kuamah a omkei hial ding. Khemna i tuahchiang in, hoihtak bang in kilang thei a, i utna leh lunggulhnate hon zoh a, i taksuah chiang in khelhna a puk kihi hi. Khemna i tuah khelhna ahi pahkei a, khem a i om na banga i va gamtat chiangin khelhna ahi. Salam khemna leh khalam khemna a tuam tuak ahi chih baihlampi himahleh, ei Khrist’ gingtute ading in huai bang om theilou hi.

Pianchil a kipan khelhna toh pai a om a, khelhna toh piang himahle’ng Laisiangthou in “A paina ding lampi ah naupang chil in, huan a upat nung nangawn in leng huai a kipan a paimang kei ding hi.” chi in hon na sinsak a, neu a kipan sinsak a i omte hinpih hun ahi. Maban ah koppih i neihnung a, Toupa’n goutan a hon piakte i sinsak ding Khrist’ nung i zuihna a i mohpuak na, nna got sa kihilai hi.

Ahi a, nungzui hinkhua bel tuhun a hinna; Lei kipahman kia hilou a, nunglam a omte mangngilh a, mailam a om pen delhna leh Toupa’ sapna sang muding a phakchiam delh a tai hinkhua ahi gige hi. Awle, Hiiptu khemnate bang hi ding ahi hiam?

HIIPTU KHEMNATE
Khemna himhim a haksa mahmah ding a va hih kunkun hi khollou hi, khialsa a piang “hiai khatvei bang poikei” chi a i hihsuk maimai theite zong khelhna ahi khin hi. Evi khem a aom hun in huan laizang a singgah neklouh ding pansan a khem aom ahi. Khem a i om pen khelhna ahi kei a, himahleh doulou a, khem a iom bang a i gamtat chiangin khelhna ahi hi. Khemna i limbawl leh, khemna i tuah hun a dou zoulou a i khelh thil lamdang hilou hi.

Banah, khemna tuah ding pumpelh theih hilou a, khelhna bel pelh theih hi. Eimah hatna in bel zohvual ahikei - i utna leh lunggulhte khong pansan a khem a om i hihchiang in i utlouhte pansan a khemna dou nuam liai lou hi. Himahleh, khemna i tuah hun in lim bawllou leh ngaihsak louh chiangin, khemtu’n lungkia in hon paisan thei zel hi.

Evi in khemna a tuah hun in a na limsak a, Pathian thugen louh tantan a na kamteh in “singgah na ne ding uh ahi kei, khoih leng na khoih ding uh ahi kei, huchilou in zaw na si ding uh chi a ka’ a na chi hi. Khemna a na lim saklou hileh, huai sing khoih leng khoih ding ahikei chih tantan gen khollou ding hi. Pathian’ in sia leh pha theihna sing khoih louh ding chilou in, nek louh ding chi hi.

Tua bang in Samson in khelhna a limsak zaw a, Juda Iskariot, Anania leh Saphira te bang in khelhna a na telzawk ziak un sihpih uhi. Tu hehpihna hun a ding eite zong nisim in tel ding om den a, tua i lampi zuih sihna hia, hinna lampi? chih i etchet gige poimoh hi.

KHELHNA DOU DIINGDAN
Khemna i dou zoh ngeingei na ding in khelhna bang hi hiam chih teltak a theih kul hi. David in Philistia’ mihat Goliath a dou ding a a kuan in Goliath kivat dan bangkim a thei hi (1 Samuel 17:4-47). Huai bangin Joseph , Job , Daniel leh a lawmte, Jesu khrist na tawm khemna a na tuakte hi ua, khemna ahi chih tel tak a a theihziak un a na dou uh a, khemna a tuah hun un leng, khelhna ah puklou uhi.

1. Khemna dou dingin kisakhol in: Kaina in a sanggampa Abel a thahma in, Pathian in a kianga a thuchiam i mangngilh hetlouh pil huai mahmah ding hi. “Hih hoih lechin pahtak na loh kei dia hia? Na hih hoih keileh khelhna kongkhak bul ah a kual nilouh a, a deihlam nangmah ahi ding, a tung ah thu na nei ding ahi” a chi hi.
2. Nang chauh in dou ke’n: Evi in singgah a nekzoh in, a kiang a om a pasal leng apia! Adam ngei leng koppih dia dudak vaklou bang hi. Pau loh, phun lou a a zizi piak a a nesuk mai thei ahihziak in! Ginna kibatpih na thuum khawmpoh ding leh nang adia hon thuumsak ding lawm bawl in. Thutak leh hehpihna ahi i poimoh - ei kianga thutuam gen a, midang kianga thutuam gente lak a kipan bel pilvan mahmah poimoh ding hi.
3. Ginna in Jesu’ vualzohna len chinten in: Jesu Khrist’ tanchinhoih ziak a kinepna thawnlou neite i hihziak un Toupa min phat in om hen! Paul in, Romte 6:6 a a gelh bangin, “I mihing lui a kiang ah kilhden in a om samta chih i thei; huchi a khelhna pumpi hih manthat a a om theihna ding leh tua kipan a khelhna sikha a i om louhna ding in”. Ginna ziak in, khelhna gu leh mai zumna i tuah dingte lakmang ahita a, phetlou in, khemna i tuah hun a hon doupih ding leh hon hihhat ding a, Khasiangthou piak a omte i hi uhi.

Awle, Delhi a tuailai te’n hiiptu khemnate i douzoh na diing in khelhna bang hi hiam chih i theihtel mahmah kul hi, a tomlam in Galatiate 5:19-21 a kigelh khelhnate enle’ng angkawmna, kingaihna, thanghuaina, hukna, Milim biakna, bumna, huatna, kinakna, hazatna, hehna, kilanna, omtuamna, gintuamna, Deihgohna, tualthahna, zumun nopna, zukhamna” chihte i limsak louh a, Laisiangthou thute pansan a i dou leh i zou ngeingei ding hi.

I ginpa Jesu Khrist’ ngei in khelhna a tuah hun in, Laisiangthou thute pansan in khemtu a na dou zou hi. Eite’n zong khemna limsaklou ding i chih lailai in, khemna i tuah hun a i kivenna ding leh i suahtakna ding in Laisiangthou i simtam ua, A’ thute a kigalthuam in khemna i tuah hun in dou le’ng i zou ngeingei ding! Hamsia khovel ah i om a, i melma Diabol, humpinelkai humham bang in a nek theih ding zong in a vialvak na mun ah, Pathian galvan bukim a kivan in; hiiptu khemnate i douzou diing uhi.

Hebrute 2:18 in, “Amah ngei in khemna tuak a a na thuaktak ziakin khemna tuakte a panpih thei ahi” achi hi. Jesu Khrist’ ngei in khemna na tuah ahihziak in Amah kia mitsuan ni, i lungtang theihsiamna ding tankia ah hilou, i vualzohna ding in, Aman vualzohna lampi a thei hi.

Bible tang pansan tangpite: Paunakte 22:6; Philippite 3:12-16; Genesis 3:1-7; 1 Samuel 17:4-47; Genesis 4:6-8 ; Romte 6:6; Galatiate 5:19-21; 1 Peter 5:8; Ephesate 6:11-13; Hebrute 2:18.