Mihing a piang peuhmah mahni kia a khosa thei aki omkei a mi tawh teng khawm leh mihin pihte tung a ki nga tuah vek ihi uhi. Huai ahih mah bang in i hinkhua ah ki kheekna tuam tuam a hong om chiang in,huaite a zatdan dan i siam keileh i hinkhua leh i mi hinpihte tung ah siatna hontun thei a,ki khekna te zatdan i siam leh mimal hinkhua leh khotang bawl hoihtu leng hong hi thei hi.
Tuailai i hong hih chiang in piching khat ihi ta a,hiai hun in mahni deihdan a hinkhua zat theihna zalenna nu leh pa apat in phalna i neita uhi. Hiai hun pen khemna leh ze etna tuamtuam tam mah mah a,tuailai hun zatdan in hinkhua susia thei leh bawl hoih thei ahihman in, hiai hun zatna ah pilvan poimoh mah mah hi.
Tuailai hun zat khelh louhna ding in khemna I maituah dingte apan i ki ven theihna ding in, khemna i tuah ding a tangpi i enkhom ding.
- Khamtheih apan khemna: Tuailai i hong hih chiang in nopsak utna te hong uang in, nopsak na di zonna ah khamtheih hihte nuamsa bang a mu a,khamtheih va hih kha chih mi tampi om hi. A tangpi a gen in khamtheih zongsang te nopsak ut na ziak ahi a,Tuailai hun sung a ana hihkha mi a tamzaw a zongsang suak ahisek uhi. Tuailai telak ah khamtheih a khemna, mi dangte lak sang mah in nasa zaw hi. Khattang kisa, thomhau leh lungkhamna nei tuailai tampi te hiai khamtheih in ki hehnem sek uh a,a hoih louh dan a hon theih ua a tawpsan dinga hong kisak chiang un kikhel manta hi. Khawl ut in pang mahle uh a khawlzou lou atamzaw ahisek a,mimal hinkhua innkuan leh khotang a ding in buai na tuntu hong suak uhi.
- Nek leh dawn apan khemna: Khovel changkang leh khantouh toh ki zui in nek leh dawn hoihloute, anek leh adawn hoihlou ahihdan ki dau ngaih leh poi kisa lua non lou a bang hi. Nek leh dawn a khemna i chih chiang in Zu leh nektheih i taksa a dia hoihlou leh i ginna in hon phalllouhte ahi hi. Zu in taksa susia a, inn kuan ki tuah louhna tuntu leng ahi hi. Tuailaite lak ah vualnopna bawl na ding in dawn theih,nek theih, tep theih, hiip theih chi tuamtuam taksa a dia hoihlou leh ngaihtuah na khuak suhai thei thil hihte hih utna leh a hihte nuamsa lua bang a mu a, enna om hi. Tuailaite’n huaite amuh chiang un huaite hih utna/ test utna hon nei uhi. Hiai thilchiin hoih lou ten maban khosak na ding leh Khristian innkuan bawl na ding daltu lianpi khat hong suak ua,hiaite lak apan tuailaite pilvan ding ahi.
- Sa utna zang a khemna: Tumlam gamte gam khangtou leh changkangte chiin dan leh khosak dan i enton ua,huai in thil hoih tampi hon tun mahleh thil hoih lou tampi le hon pua tel hi. Thil hoih lou hon ton pihte lak a khat a hihleh Nungak leh Tangval Nupa bang a ki polhna ngaihzam (normalised) ahi hi. Hiai khemna pen Khristian gindan toh kikalh a Pathian in a huat mahmah khelhna khat ahi hi(Hebrute 13:4). Tuailai sisan hatlai te, adiak in khopi tuialaite lak ah hiai khemna uang diak a, dou zoh leng haksa sa diak uhi.
- Mi lian mi lal leh mi minthang te thupi ngaihna: Khemna tuamtuam te lak ah Mi lian mi lalte Pathian sang a ngaihsan zokna leh ngaih thupi zokna, tuailai te lak a khemna hat mahmah hi. Mi minthang (Celebrity) te bang Pathian bang a ngai pawl khong om thepthup hi. Hiai pen Milim biakna chikhat ahi a,mimal hinkhua ah leng a hoihlam sang in a hoihlou lam ah honpi zaw ding in gintat huai hi (Exodus 20). Khristian ten i hinkhua ah Pathian sang a bangmah dang i thupi sak zok ding uh hilou hi.
- Internet apan khemna: Internet apan khemna in social media zatdan diklou leh internet a lim leh video thulimlou banah thugelh hoihlou te post utna leh muh utna tel hi. Social Media a mite gen siat na,mi kisiat theih nadi thute leh thil thulim lou post chihte Khristian hindan toh ki tuaklou a, i nam a ding in leng thil hoih loupi khat ana hi mok hi. Social Media a Pathian khong chiamnuih bawlna a zat (Blasphemy) chihte poisak louhna tuailai te lak a om hi,hiai thil lauhuai mahmah ahi hi (Exodus 20:7). Internet zatdan uh ki en thak in,ki bawl thak leng i khotang leng chidam in hoih tuan ding in gintat huai hi.
- Thadahna a khemna: Thadah na leng mihing a dia hoih lou leh khemna chikhat ana hi mok hi. Tuailai thadah a damsung in sep leh bawl siam chih vang mah mah a, mimal hinkhua a dia poi thil khat leng a hong suak hi. Tuailai thadah, lai lah sim peihlou, nna lah sem peih lou a zat na bei tuailai hih khak ding ki veel thak ni. Mi thadah zatna ding tawm a, koi mah ah mun neilou uhi. (Timothi 5:8) (Paunakte 13:4).
Khemna chi tuamtuam bang zah hiam I na en khomta a, hiaite lou leng khemna tampi omlai ding hi. Khemna lauhuai I na gensate bang chi bang in dou leng, huaite apan ki suakta thei ding ahia chih ana en khom non ni.
- Sahkhua a ki bulphuh ding: Tuailai hun sung a khemna i tuahte ei gingtu Khristian te a ding in khelhna ahi a hiai te dou zohna ding in i ginna letkip ding leh khemna te a puklou dia ginna sukhat ding ahi. Hiai te hih didan bel ginna kichian neih ding,huai mah letkip tinten ding leh Bible simtam a, a thu zuih banah thumna neih gige chihte ei a ding in galdouna hoih pen hiding in gintak huai hi. (1 Korinte 10:13)
- Inn kuan a ki thuhilhna: Tuailai khemna a puk pahpah te a tamzaw inn sung a thu hilhna hoih mulou leh za khaloute hi tangpi uhi. Bible ah i muh bang in Naupang a neulai a pan omdan, khohei dan leh chih dan hoih inn sung a ki zilsak te a liatta’n (Tuailai) un leng huai thu hilhna te a pial lou tangpi uhi (Paunakte 22:6). Tuailai ten Nu leh Pa ahihkeileh mi hon thu hilhna te zui leng hinkhua ah ki lampial lou ding hi.
- Lawm thuah ah pilvan ding: Chindan hoihlou Khamtheih, guihtheih, zu leh sa zong sang i chihte, lawm leh vual thuahna a zil uh a hi tangpi hi. Lawm te’n hih hiven chi a siat na ale ngailou leh ngaihdau na om thei mok hi. Huai ziak in Khemna ah na puk louhna ding in na lawm thuah a pilvang inla,lawm hoih na neihkei leh nang lawm hoih hi zaw in.(Paunakte 13:20)
- Mahni leh mihin pihte Itna: Itna i chih thilthupi petmah ahi a,mi I itleh a tung ua thilsia a tun ding ki deih lou hi. Thil chin hoih lou leh nek leh dawn hoihlou hih in i kiim i kiang a te a ding in thilsia leh maizumna tun hi. Itna tak nei in a mihin pihte tung a thilsia a bawlkei a,huaite apan mite a kembit zaw hi. Mahni ki itna diktak nei in a taksa leh kha a ding in thilsia a hih ut gingtak huailou a,mahni ki itna i chih angmasial huai bang mah leh mi hingte i hinkhua hon kemtu dia i neih ngeingei ding ana hi mok hi. Mahni ki it in a taksa, ngaihtuahna leh a kha a it a huaite hihsia theithilte apan in aki koih gamla hi. (1 Korinte 13)
Khovel i damsung in ei Khristian ten Setan apan khemna i tuak gige ding a huaite dou zohna hoih pen zaw Pianthakna diktak ahi hi. I hong pianthak chiang in hiai khemna te ei kia a dou hilou in pathian in hon doupih a, ki zouzou thei hi. Khemna a i pukna ziak tangpi te tuh nopsak utna ziak, lungkham mangbang kisakna ziak leh khattang kisakna ziak ahi tangpi ua,hiai te tuh Pathian nei leng aman Kipahna bukim, lungnopna chihte honpia ding hi( Johan 16:24). I thu gelhte a dikpen leh a hoih pen zaw ahi kei ding himah leh mihing hinkhua et in,hiai te theisiam in zuisiam in,Pathian galvan toh ki thuam leng,akoi peuh ah om lengle I tuailai hun sung hi in, i damsung teng in khemna in hon zou ding in a gintak huaikei hi.
