Mi tengteng toh kituahna leh sianthouna delh un, huai sianthouna lou in kuamah in Toupa a mu kei ding uhi (Heb.12:14).
Khristiante kianga thupiak tuamtuam kibang simsim leh kinai taktak bang leng a om sek a, huaite lak a chi nih tutung in gen le’ng chi I hi. Huai thupiak nihte tuh ‘Miteng teng toh kituahna leh Sianthouna delh un’ chih ahi, sau loulou in hiai anuai abang in sutkhawm le’ng I chi hi.
MI TENGTENG TOH KITUAHNA:- Innkuan khat sung a ji leh pasal mai leng kituah haksapi ahi, nu leh pa leh tate zong kituah thubaih hilou hi. Huai banah khua leh veng innsak-innkhang toh zong kituah gige chih leng omlou chi leng dik lai kha ding hi. Beh khat-le-khat, chi leh namte zong kituak thei lou, ut kibang lou, deih kibang lou, hoih sak zong kibang lou lai hi. Pianna mun tuam, khanletna mun kibang lou, nek-le-dawn kibang lou, chindan, tawndan kibang lou, i vun kibang lou, mel-le-puam zong kibang lou, chik mah a theih ngei leng hiloute toh bangchi kituah theih mahmah ding? Pau leh ham kithei tuah lou hizaw mah lai, tuate toh kituah ding zong thu baih hikei, hiai thupiak pen zuaupi hi, thil hithei hikei, chi in Laisiangthou lam ngoh leng i ngoh zou diam? Gintak huailou ahihman in eilam kiveel a panlak kisam hi. Laisiangthou tang telna in bel ‘delh un’ chi ahihman in i kipat, delh i sawm ding eilam ah i mohpuakna masa hizaw thamtham hi. Gilou taisan inla, thil hoih hih in, Lemna zong inla, a delh in delh in (Sam 34:14).
SIANTHOUNA:- Sianthouna bel Pathian in a ngiat gigesa mah hi. Mosi kiang ah zong Sinai tang bul a omlai un mipite hih siangthou in chi in thu na pe ngeita hi. Hiai sapum sianthouna, silh-le-ten sianthouna, nek-le-dawn sianthouna, omdan gamtat a sianthouna, numei pasal kal a sianthouna, sum-le-pai zonna, innma-louma, sep-le-bawl a sianthouna banah kampau, gen leh sak a sianthouna leh lungsim ngaihtuahna a sianthouna khawng leng hivek ding in gintakhuai I sa uhi. Hiai bang teng gen doudou teng ah leng akim nai kei ding, himahlah tua I gensate ah zong ke’n ka zou a chi ngam ding kuamah i om a ginhuai kei lai hi. Kua hiam khat in kei ka siangthou hon chi mawk leh leng, gingta lou lua kisa a i nuihsan lai mel zong ki thei lou hi sawnsawn hi. Sianthouna lou a lah Pathian mai kimu zou peuhmah lou ding a hihmawk leh, koi a bang chi sianthou thei mahmah ding?
HUAI SIANTHOUNA LOU IN KUAMAH IN TOUPA A MU KEI DING UHI:- Gen-gen in suutsuut mah le’ng i chinlouhna lam loungal gen ding i nei kei uhi. Huai sianthouna lou a kuamahin Pathian muthei lou ding chih ahi hi. Mihing lam ah bel suan ding, gen ding leh kisaktheihpih ding bangmah a om kei, i hoihna pente nangawn puanse-nin bang phet hilai chih tuh Toupa hon muhdan ahi. Himahleh lung lel ke’n, Sam laibu gelhtu in “Pathian aw, na chitna dung zuiin hon hehpih inla, na lainatna thupi mahmah dungzui in. Ka thulim louhnate hon silsiang sak vilvel inla, ka kelhnate hon silsiang sak in (Sam 51:1-2). Sianna ding in Jesu kiang na zuan ta hiam? Belamnou sisan ah na bual hiam? Na silhpuan leh na lungsung sianna ding in, Belamnou sisan ah na bual hiam? Khelhna a ninsia na silh puan paikhia in, Laukha nin silsiang na’ng tuikhuk khat luang hi, Aw belamnou sisan ah bual in, Nam chih ta di’n sisan tuibang kang lou lai Belamnou sisan ah hong bual in (BNL 226). Hiai Belamnou sisan ah sianna om hi.
THUKHITNA:- Miteng teng toh kituahna nei thei lou, namsang, namniam, milian, mineu, azawng-ahau kituak thei ngeiloute tuh Aw nam tengteng leh chi chih pau chihte, Vanmang naubang a kahna kalvari ah khentuam nei lou uh. Khentuam nei louh tang, lunglualna mun, mi tengtengte kikimna tang na tung ta hia? Hondampa nak siangthou ah aw, Sisan leh tui a hongluang khia; Ka lung sim in ngilh kei henla; Mohnei tuibang sianna. Kalvari tang a duang kikhai Jesu lou ngal Pathian mai i muh zohna ding dang om lou ahi. A zuan masa Pathian toh kilem masa, Pathian toh kilemte’n a maipha mu ding, Pathian maipha mu mite’n a thangpaihna thuak nawn lou ding. Halleluijah. Amen.
