Kilbang khangpan momnoute aw
Selunglai ah Thupha paibang pomni
Sianmang Simthu naubang sangni
Lungnopna tawh kilbang i khanglian ding hi.
Lai Siangthou sim gigeni
I lampi hong tanvak ding hi
Sianmang siang thum gigeni
Setan in hong zoulou ding hi
Tun leh Zua simthu zuizelni
Mihing leh Toupa' deihsakna i tang ding.
Lahoih sain thuhoih genni
Thusia-lasia, zuauthu gen tawpsanni
Thilhoih hihin thudik gumni
Zahtakna leh deihsakna i tang ding hi.
Thumanna, chihtakna lenni
Khamtheih guihtheih thilchiin ne’n dawn kei ni
Kuhkal leh sianthouna zui ni
I nunna silbangin hong pallun ding hi.
…
https://www.youtube.com/watch?v=Zb3a8NL5Gro
…
Laa hong pianni leh gelhkhiak ni: July 27, 2008 (Nipini).
A hongpian dan: Convention English High School, Sinzawl a Evan Teacher nna sem a ka omlai in, Skul kipiina nuai a Moral, Religion & Music Department-a in-charge ka hihna ka lunglut petmaha, nuam leng kà sa mahmah hi. Hiai laa pen kum (2008) a Evangelistic Week Program Theme Song diing ngaihtuahna akipan hong piangkhia ahi.
Ni khat class la-a room sunga om, khua a lum mahmah ziakin tawlsim ka hi ngei di’a, tohlet/window ah ka dintut hi. Huchihlai in, ka ngaihtuahna ah hiai naupangte'n hinkhua honzat touh ding dan uh, ka lungsim ah honglut zungzung hi. Hun paisa, ka naupan lai a ka nu-le-pate leh Sande skul a ka heutute'n Lai Siangthou hon na sinsakte uh naupang khawmpi dek chianga kidemna ding Bible tang hon zilsakte uh, tuni a ka pichin huna a manphatdan leh honpitu, hon makaihtu ahihdan hon phawkkhesak hi. Huchi’n, ka naupangte un Pathian thei a, lau a, a nu leh pate uh zahtak a, a heutute uh thu manga, khamtheih tuamtuam apan bittaka hinkhua a honzat touh ding uh deihsak petmahna ka lungsim ah hong phulkhia hi. Mihingte deihsakna leh Pathian vualzawlna a hon tan theihna ding ua Bible sim gige, Pathian kianga thum gige, nu-le-pa banah a heutute uh thu man, a zuih/hih ding uh a lampi ahihdan mukholsak in, hiai laa, DEIHSAKNA TANG DING IN, chih k’on gelhkhia hi. Hiai laa satute leh ngaikhiatu tengteng Pathian in hon vualzawl hen!
-----------------------------
Laa genchetna:
Tang 1na:Naupan chiil apat lungtang tawnga Pathian' Thu poma saang theipah ngalte kipahna tawh khanglian ding uh ahi chih genna ahi.
Sakkik:Lai Siangthou sim gige le’ng i lampi hon tanvak di’a, Pathian kiang thum gige lengSetan in hon zoulou di’a, Nu leh Pa thu mang le hang miteng leh Toupa' deihsakna tang ding I hi chi hi.
Tang 2na:Lahoih-thuhoih gen in sa le’ng, thusia-lasia, zuauthu gen tawpsan le, thilhoih hih-in thudik gum le, mite'n hon zahtak di’a, hon deihsak ding uhi chi hi.
Tang 3na:Thumanna, chihtakna lenkip in, khamtheih guihtheihte hih lou in, kuhkal in siangthou le, hinkhua lawhching leh nuam i nei ding hi chi hi.
-------------------------
Thumal genchetna:
Kilbang khang: Khanglian
Momnoute: Naupangte
Selunglai: Lungtang tawng
Naubang sang: Deihthawh taka sang
Paibang pom: Pom gige/kuah gige
Simthu: Thu
Tun leh Zua: Nu leh Pa
Nunna: Hinna
Silbang pallun: Lohching
