India gam mun tamzawte ading in kholum beita, khovot hun hong hita ahihman in huihmuhna (fan leh AC/Air Condition) chihte zat ngai nawn lou in dai sipsip a om theih hong hita hi. Tua toh kiton in meiphu room heater, blanket, sweater, jacket, high-neck, pyjama, mojalum, khedaplum, muffler, lukhulum leh khutbuhlum chih khawng a neizou deuhte vanzat hong hi uhi. Hiai tengteng neih nunga leng nungak leh tangvalte a ding a asam omlai tuh, nungakte ading in ‘pasal’, tangvalte ading in ‘ji’ ahi. Hiai khovot kha sung tuh mi tamzawte’n kitenna hun lemtang a la in kiteng tam thei mahmah hi. Tua banah mun tuam a siamsin leh sepna neite’n innlam a honzot hun uh, u-le-nau, sungta-putu mun tuam a omte kivehtuahna hun, khaw khat a omte adi’a leng puzu kholh hun, tanu sagoh hun, tou sagoh hun, leh vai tuamtuam neih hun, awllen hun khat ahihman in December bel kum khat a kha om teng lak a, a ngaklahhuai pen, a nuam pen, leh a lunglenhuai pen, a khiatlahhuai pen leh tawldam pen kha leng ahi hi. December kha sung a ni poimoh leh manpha, a bik a Khristiante’n Toupa Pathian min sial a i zat zel Khristmas leh Kumlui khakna chihte sau lou in, anuai a bang in suutkhawm le’ng:
KHRISTMAS: Gingtu, Jesu nungzui, Khristian a tamzawte’n kum teng a December 25 ni a i zat zel uh ni poimoh leh nuampen tuh Khristmas ahi. Singtanglou nasem gimtak leh tawltakte ading a leng pawltak hun, khawl tawldamna ni ahi. Biakinn kai taima loupente bang inleng hiai ni a poimohngaih mahmah ni uh ahi. Hiai hun in biakna program biakinn ah kithaloptak leh thathoutak a zat in om zel hi. Tuailai lapawl, sawtpi apan ana kisakkholhte uh bang, hiai hun ah Pathian phatna leh pahtawina nuamsaktu pen ahisek hi. Biakinn program banah, a ut peuhmah adi’a lenkhawmna hun kinei zel hi. Tua ah khuangpu siam, lavek siam leh sehkhiak a om pitu dingte makaihna toh Pathian phatna laa sa a lenkhawmna hun om zel hi. Hiai lenkhawmna tuh khalam thil a kithuahkhawmna chi khat ahihman in, kum khat hun sung adi’a mite lunggulh leh ngaklah mahmah ni leng ahi gige hi. Innkuan-bing program hilou, dahna, kahna thu leng hilou, kuamah inntek tuam omlou, saptuam milip, khawzang pumpi huap leh inntek vekna program ahihna ah manpha kholdiak hi. Biakna leh lenkhawm a nop leh, “Tukum Khristmas nuam e…” kichi chiat hi. Tulai tuailaite leh papila tamtakte’n lenkhawm sawm lou chih bang a na om thei uhi. Khristmas chiang in tuh hundang a kikhawm ngei lawmlawm loute bang inleng biakinn naih ahon poimohngaih ua, biakinn bang ah leng kitalou chih bang hong hisek hi. Hiai mun ah Toupa kha vehna leh hihhatna tanga kipahna thak nei chih bang hong om thei zelzel hi. Hiai hun tuh Khristian hinkhua adi’a thathak laakna, kimuksukna leh kihalthak nawnna hun manphatak ahihman in, innkuan kim a zat khawm uthuai sese sek in, a zangkhawm kha theite hampha leh enhuai lua hisek uhi. Saptuam chih in I kituahpih bang leh i zoh ding tan en in mipi nekkhawmna, heutute phasakna toh, kinei zel hi. Hiai hun a ankuang umkhawmna tuh nekkhawm laklak a, a nuam pen leh thupi pen ahi. Nang tukum Khristmas koi ah, bang chi in kua teng toh zat na sawm a?
KUMLUI KHAKNA: December 31 ni tuh huai kum ading a ‘ni nanung pen’ ahi a, saptuam tampite’n Pathian min a ankuanglui zen in Pathian kianga kipahthugenna leh kumluikhakna hun in zang uhi. Hiai ni tuh ni tengteng lak ah a lunglenhuai mahmah ni ahi. Aziak bel kum khat sung i gamtatna asia-apha a kum toh bei khawmta ding ahihman ahi. A ni pumlum zang theiloute’n leng zan dak 12 tan bek ngak teitei in “kumlui khakna leh kumthak vaidawnna” program manphatak in zang zel uhi. Kum beita ding pen khakna leh kum hong tungthak pen vaidawnna program manpha leh thupitak in kizang zel hi. Hiai zan bel khua lah vot gilbang zong hong kial thei ahihman in alum thei ding dan pen a kithop leh vah theihna di’a nek ding refreshment hoihdeuh bawl zou le’ng hoih ding hi. Hiai kumlui khakna program a thil manpha mahmah khat bel: Mimal in thil hoihlou chiin leh zong sat i neihte paihkhiakna hun lemtang banah Pathian hatna muang a kumthak ading a ‘thuchiam hoih laakna’ di’a hun hoih leng hinawn hi.
Kumlui toh beikhawm ding a na deih, kum thak a lutpih tak nasak louh paihkhiak ding bangbang na nei a, unau? Kibawlpha thei lai ding a hun hoih i neih hampha lua I hi, na deihlouh leh, nang hih ding a kisiamtan huailou nasak, na lung sim honkam omleh bangkim hihthei Pathian muanna toh kisiansuah ngam inla, kum thak a siangthou tak a Pathian deihdan hinkhua, om dan, gamtat, nekzonna, siamsinna leh nasep silbawlte a panla thak ding in Toupa’n hon vualzawl hen!
