Covid-19 natna apan Pathian apan damsakna ana tang unaunu apan Testimony, Pathian thupina ding leh amah phalna a kisuah ahi.
April 17, 2021 (Kiginni) in Covid symtoms hong om a kipan kikep theih bangbang in kikem in sing (ginger) a sial a ne chih khong in ka kikem pan hi. Ka aw hong kikheng pah a, hitang dek dan a kingaihtuahna om hi. Zinglam 3:00 AM vel in khosik in hon phong a damdoi ka ne pah hi. A ni nawn in a vangkim a khosik in hon pha zel ahih man in, ka sepna GBPant a Rapid Test Kit ka neihkhak pen zang a nitaklam ka ki test a positive chih ka kithei hi! Ka sepna lam apan RT-PCR test dingdan hon ngaihtuah sak ua, huchi in ka pasal (Thangchinlian), ka nau Ruth leh ka ompih nu le ginglel vek ta kahih man un, April 19, 2021 (Seppatni) zingkal baih tak in kava kitest sak uhi. A nitak in result hong suak a ka vek un ka POSITIVE uhi!
Huai apat in inn mun ah kikep theih dandan in damdoi zang in ka kienkol pan uhi. Annkam bang leng thakhat in taste hong bei a, kei bang ka tawl diak se hi! Lupna a lum den ka himai, a vangkim in khosik in hon pha a sung hoihlou le ka nei zomah hi. Ka U te’n (U Kim leh U Thanghnun) ka poimoh uh damdoi, SpO2 probe, nebulizer machine chih te inn ah hong pia uhi. Ka pasal ahih leh vaccine lasa ahih ziak a diam a lel kei a kei hon enkai zou hi.
Pilvang tak in ka SpO2 ka check gige ua, April 21, 2021 (Ningani) in ka SpO2 level 85 hong tung hi. Doctor te’n HRCT (Chest CT) la din hon sawl ua, April 22, 2021 (Sintawpni) in ka va la uhi. Amun ah sawt bang va ngaksim ua, huai sung in khovot sa bang in ka om a, vot kasak dan le tuam in ka thei hi. Ka khuk hon gawm a nat in a nat thoh hi. Inn ka tun kik un ka SpO2 niam ahih man in nak haksa sa in ka om hi. Hoihlam ka manoh kei chih ka kithei pah hi. Hospital khat apan in OXYGEN cylinder ka ngaihtuah thei ua, a zan zan in ka zang ngal uhi. Sawtlou ka bulh nung in hong nuamtuan mahmah ahih man in zankhua in bulhlou in ka omthei hi.
Ka HRCT result apan in Covid Pneumonia chih hong chiang ta hi. April 23, 2021 (Sintawpni) apan in oxygen support lou in ka om thei nawnkei hi. Himahleh gimse lua bel ka hi kei hi. Damdawi inn pai na ding mun tuamtuam ka ngaihtuah lai un, ka seppih Vungngaihniang in ka positive lam thei in hon call a himahleh ka miss kha hi. Ka pasal ka call back sak leh Dr. M. A. Geelani, ka CTVS-OT dept (ka sepna dept) a HoD ahi a, kou hospital a ward khat staff te leh immediate family a dia hong ahih thu hon hilh hi. Ka Chest CT result ka khak pah ua kintak a Damdawi inn zuan ding in hon sam pah uhi. Kou leng kintak in Damdawi inn ka zuan ngal uhi.
Ka tapa Thanggou ka khebul a mango ne a tu a, ka paisan ding in koi ut leng le ka neh ngam kei hi. Ka cousin Benjamin ngai ahih man in amah ka sam ua aman honna etkai sak hi. Inn a omteng le damlou ahih man in lungsim nuamlou pi in ka kikhen uhi. Ka tapa lah kap, a tawp in kap kawm sasa in innsung ah a lutpih thei uhi. Ken le a ngailua hina pi, lungsim a bangmah le omzoulou, ki enkol dia dam a kik ding chih lungsim nei in ka paisan mai hi!
Ka pasal leng positive ahih man in Damdawi inn ah hon ompih thei hi. Ka HoD pa’n hon awlmoh na ziak in Single room, damlou dang toh ki share lou in ka omthei uhi. Nitak in treatment hon panpah uhi - High dose antibiotics, steroids leh nebulization ahi deuh hi. April 24, 2021 (Nipini) zingkal in keile dam kisa in zuntha dia kava pai leh, ka va naksam dek hi. Kintak in ka room a pai in Oxygen ka thuah den uhi. Huai ni a pat in ni 4/5 sung teng a haksa mahmah hi. Ka thoh sunsun chiang in leng ka chi teng ling mah bang, ka awmlak kitok mai, khatvei chiah ka pasal bang ka awm ka humsak zel hi. Lupdan teng lah ut dandan a kilum thei nonlou, khupbok a ka lup chia SpO2 hoih ahih chia lup teitei ka sawm gige a, ka awm bang a na mahmah zou hial hi. Ka luplup na ka chi teng na himai!
Zingkal ka thoh chiang in maiphiat, hanawt leh kihahsiang thei gige in ka om uhi. Ka tapa Thanggou ngaih na in hon phak chiang in zaw haksa mahmah e. Hilele dam a innpai ding chih lungsim in hon zouzaw hi. Dam ut lua ka hih man in ka room ah la ngai in ka sakpih teitei zel hi. Jesu min toh dam ing! Jesu liam ma hang in ka damzou khawng ka chikhiat hun toh ka lungsim a ka chichi mai hi. Nitak chiang in ka pasal in khuitui kai kom in thumna hon neih pih zel hi!
Huchin a ni 10 bang Oxygen bulh den leh Treatment te hoihtak a kon lak touh nung in ka hong halh panpan ta hi. May 03, 2021 (Sepnawnni) in ni 11 hospital ka om ni bang in oxygen lou bang in nak nuam ka sa thei ta hi. Huai ni in ka HoD pa’n hon round a oxygen lou in kana tu hi. SpO2 93 % bang ka maintain zou ta hi. Doctor in, “Inn a pai ut ziak a ahuchih hia?” chi in hon chiamnuih kom in, hoihlam manoh kahih man in Chest x-ray la din hon sawl hi.
May 04, 2021 (Nilaini) ni 12 chin ni zingkal in chest x-ray ka la uhi. Doctor in x-ray reult apan discharge paper hon bawl pah hi. Damdoi poimoh teng lei in innlam zuan ding in ka kisa uhi. Himahleh ka SpO2 level 90 khawng ana hi ahihman in oxygen bulh lai ding in hon gen uhi. Huchia a niam lai leh hon discharge lou ding uhi. Eilah inn pai ut phur lua kha, a dam kisa law mawk. Bangtan hiam ka lup nung in ka SpO2 level hong hoih ahih man in hon pawt khesak uhi. Kidop mahmah leh bang mah hihlouh ding leh pau le pau nailouh ding chih advice toh ka pawt uhi.
Huchin ah ni 12 vingveng mihing gelkholh hilou, sawmkholh hilou in a Hospital a ki enkol thei, ki enkol damlam manoh a hospital nusia thei ta. Innlum damtak a tung kik ta. Toupa ka kipak lua petmah! Ka lungdam na genzoh vual hilou hi.
Inn ka tung phet ka tapa Thanggou ka kimusak ut pah kei hi. Ka kihahsiang zoh in a nuneu Ruth in hon pom, hon muh in a hon kok a Mummy hon chi, kong kikoi chu, ka mittui hong pawt, kipah na mittui.
Nitak khat Damdawi inn a ni 2/3 na hi in kathei, ka chau petmah hi. Ka sigui lah muh haksa, duty doctor in sawtpi hon buaipih nung in cannula hon thuah thei hi. Zan khua a IV maintainance a hon khai leh zingkal thoh bang hong nuam tuan mahmah hi. Huai zan a si di bang in ka kingaihtuah hi. Pathian in ka lungsim a kingaihsiat na himhimleh thanem in a hon koih kei a, dam a pai ding kahi chih in hon khamuan zaw hi. Toupa ka kipak kei tung ah na hoih lua, non it lua chih ka thei thakthak a, leh na muanhuai hi, hon muanglouh na neng khah leng ka neinon kei, maban leng nang honpi zel in.
Ka damlouh hun sung ka ngaihtuah kik chiang in Pathian in thil bangkim kei hoih na ding a ana gelkhol ahih dan ka phawk thakthak hi. Ka pasal in ka damlouh tung apat in pilvang tak in honna kem a, a hunhun a damdoi leh SpO2 hon en hi. Huai ban ah U Kim kiang ah ana report a doctor advice a hun a mu in CT bang leng a hun in kilakha hi. Ka Hospital uh Covid hospital hilou himahleh ka ki admit ni ding in Covid Ward ana ki hong chih te... A kimulou lam a Pathian in bangkim honna saifel sak ahi, lamdang leh thupi kasa!
Hospital ka omsung a hong veh teitei ka lawm leh seppih te tengteng na mel uh ka muh lele ka lungnuam tuam lua! Pathian mi tampi te thumna toh honna delh zui ua, hon theikha peuh mah in, hon call a thumna nei toh, amau omna chiat ua honna thumpih ua, ka kipak petmah hi. I thumna lohchinna a kei hichia hong damsuah kahi. I Toupa muanhuai na leh muanhuai dan hon zilsak a ka kipak petmah ahi!
Isai 53:5
Hallelujah.
