Gingtu hihna ah ikiim-ikiang a thil hong tungte’n Pathian toh i kikal ngaihtuahna hon neisak a, ahiding mah leng ahi. Tutung inleng khovel pumpi Covid-19 hiipi in honnawk a, khovel hichibang a hong om vengvungna ah, salam I pilvan kawmkawm in lungsim a, ngaihtuahna hong langte point thum (3) in anuai a bang in i taklang hi.
1.Pathian Bangkim tung a thunei ahi.
COVID-19 natna hiipi, huihkhua a om bang hial in kiven dingdan leh kihumbit dingdan full proof omlou hi.A damdawi ding leng omtadihlou hi. Huaiziak in, Pathian khut a kikepsak louh lampi dang leh lungmuanna ding omlou hi (Sam 18:2).
2.Pathian amasa a koih gige ding.
LOCKDOWN tungtawn in gingtute’n leitung khosakna a a hoihzaw, a tamzaw, a sangzaw delh a I om lai un, fellowship leh Biaknate le nelhsiah lou I kichih lai un,I biak Pathian a masa a kikoih khalou ana hi chih muhtheih in om hi. Huaiziak in, Amah a kik a, Amah toh kipawl ding in Innsung a hon kaailut a, mimal leh innkuanpihte toh innkuan maitam tungdingthak nawn ding a lampi hon bawlsak hiding in gintakhuai hi (Joshua 24:15).
3.Pathian hon ITNA kichian thak zel.
COVID-19 natna hiipi ziak in Biak khawmna hunte kizang thei nawnlou hi. Saptuam heutute gelsiam leh panlakna ziak in ah ONLINE SERMON, 22nd March 2020 nitak dak 8:00 in hong kipan hi.
Pathian lemgel ahi di’a, hiai hun haksatak I chihlai un, Amah thu innkuan kim a mahni innsung a, ei lemtang dan a, ngaihkhiak kelkelna ding hun hongsuak mawk hi. Tuni dong hong kiniamkhiak lailai in, eite hondam ding a, A tapa Jesu Khrist hon luikhiak mah bang in, tu hun in leng Amah leh Amah hong kiluikhia hi in muhtheih hi.
Sih leh hin kikal a omgige himahlehangle, abiik a tuhun a A’aw neem hon zasak lai a, kivelchetna ding leh Amah toh tangtawn a omkhawm theihna ding kong hon hon saklai hampha I kisa mahmah hi. A zahngaihna hon itna kilang seemseem hi. Hiaite ziak in Pathian min i phat a, Thupina tengteng Amah I khusak hi.
Mihing deihteelna ziak a thil hongtung ding hileh kiteel lou ding hi.Himahleh hichibang thil hong om tuh Missions Tuailai 2020 thupi: "Go Into the World"(Marka 16:15) I heutu deihthohtakte tungtawn in khovel kilchih ah Tangthupha puangzakna sepsuahna hong himawk in manpha mahmah hi.
Online Sermon platform hong om kipahhuai lua hi. Khalam hinkhua a munluahtu hong hita ahihlai in, ei toh Pathian kikal a khalam ankuang I umkhawmna ah a limsaktu chii/ maltameh (supplement-tu) hileh hoih di.
Hiai hunhaksa Pathian in hon mualsuahpih leh Online Ministry a tuam liuliau in patkhiak theih hileh chih bang honglang hi. Digital khovel a khosataI hih ban uah, khangthakte ading in hong poimoh seemseem ding in gintakna lian hi.
Thiltungte i ngaihtuah chiang in Romte 8:28 a kigelh: "Huan, Pathian itte, Ama'n A seh banga A sapte adi'n, ahoihna ding un bangkim in a sepsak chiat chih i thei hi" chih gingtute hinkhua ah chet seemseem in om a, Khovel pumpi buai in mau vengvung in, hun haksatak ahihlai in leng, gingtute’n lungmuanna leh khamuanna kingah veve hi. A’ Thu saulou I gelh TOUPA’N hon vualzawlsak hen!
