Manipur paw-lam a zillai khenkhat in lockdown zawh vanleng a khualzinna hong kihon phet a innlam, Lamka-lam zuana a hongpai ua, a thiltuahte uh - duhthusamlou asakdan uh - social media a hon-gelh uh ka sim a, maute hehpihhuai uh ka sa-a, a thiltuahte uh leh a ngaihdante uh ka theihsiampih hi. Amaute kumzah vel ka hihlai a ka lungputte khawng hon phawkkhesak lumlum uhi. Ke’n le i gam leh I district sung ua thil omdante deihkhophuai salou a ka na hamkhiak/ paukhiak lai khawng ka theikik hi. ‘Sial (mithun) hile’ng ka ki (horn) pou pan, ka bil toh kikim lel, lauh le neilou, pil bang kisa hunlel’ ka hihlam min honna thei siam bilbel uhi. Mi gam a I va-om chianga I gam I ngaihna a let zahzah a, I gam ah bangkim duhthusam hileh kichia, huchi ding bang kisa kha theisek mah hi. (Huaiziakin, ‘a gal-a gam-le-nam itte tampi hong tungta di ahih chiangun I gam hong khangtou huthutta di ahi’ chi ana chiamnui bang mi omthei veve hi!).
Covid 19 ziakin tukum 2020 bul akipan in khawvel pumpi apumbuai hi. Lockdown dakkal 4 sunga puankhiak a hong-om guih ziakin India mipi buaina namenlou in I buai uhi. Nektawm di koihkhollou buaipi in i buai ua, inn-le-lou tenna di neilou in mizawng, displaced migrant-te bang mel 100 val, mel 1000 val khawng a innkuan ua khe a pai chichit a, mahni innlam/ gamlam manawh mai bang a ngai hi. Phualpi solkar a kinepna nei hilou, private company a seemte bang a sepna uh hongbuai in, innluahman pe zoulou leh nek di tasam bang tam in hongtam a, innlam, pianna gam lam pailouh ngal lampi dang omlou hongsuak le om hi. Bangtanhiam nungin solkar in panla in, innlam pai theihna di lampi hon ngaihtuahsak ua, train leh bus khawng zang in i tenna state sung chiat tun theihna di lampi hon bawlsak uhi. Hamphathuai.
Himahleh, innlam pai kuul mi na tam petmah ahi a, train leh bus sungte ah social distancing bangchu ‘kahase’ hongsuak maimah hi. Huchi in asymptomatic khenkhat, amau positive ahihlam le kithei hetlou dite tawh hong kiton, hong kisomdawl tuah ahih ziak un, Manipur hongtun ma ua lampi a hon veikha tam kuam om in inn hongtung uhi. Manipur solkar in institutional quarantine (signs + symtoms neite koihtuamna) leh virus vei khatheite ni 14 vel koihtuam a a omna mun ding uh community quarantine centre tam kuam, district teng ah na nei uh; hiai munte a covid test neihsakin a om uhi. Train a hong tuanna uh hiam, bus a hongtuanna uhiam, inn hong tun ma uh hiam, hun khat pepeuh a veikha thei uh ahihziak un test bawl chiat ding honchi uhi. Corona virus a kaikhak uapat hun bangtanhiam (ni 4/ 5) ma a covid test kibawllou ahihziakin, test di sample laak awlbawl a omzek dan ahi (test baih lua a false negative om khak ding lauhthawngna om ziak in).
Lamka (Ccpur) mi +ve case 15 val khatvei thu a hon muhkhiak guih chiang un lungsim honkhoih chiat a, khenkhat bang in ‘explosion’ word bang hon zangkha hial uhi. Thil omdantak bel, khopi lam a hong kipan I unaute ‘train bogey’ khat a tuangkhawm, naungekneu nei bang le om uh hihtuak. Huchia, lampi sautak hong kitonna ua, hong kipanpihtuah, hong kisomdawltuahna ua, amau bogey a tuang mi 7 bang positive omkha uh hi didan ahi. Amau bogey ban geih a tuangte tawh le Jiribam apat bus khat a hong tuangkhawm leuleu ua, tuate le positive om uh hih tuak. “khopi lama kipan kua hiam, asymptomatic carrier (amah-le- amah le kitheilou), khat-le-nih om kha hidi eive...” chidan a tuat theih ahi. I u I nau, pianpih sanggamte, train leh bus kibanga hong kitonte ziaka tha-khat a case hong khangguih mah na hi didan ahi.
LAMKA, a tunnung ua I kikep zawhlouh ziak ua, hong puakzak/ ‘explode' mawk bel hilou ahi, unaute.
Kenle duhthusam zoulou kasak khenkhat ommah e. Huaite khenkhat k’on gentei di.
• Solkar in mun tuam tuam a CQC te a bawl lai in, Dist administration lam apan guidelines bawlkhiakna leh huai zuih didan kisinsakna/ etzuina feltak kisam hi di’n ka gingta. Hiaibang thil I tuah ngei nailouh I tuahna ah kuamah a pilvang hun chih omtheilou di bel ahi.
• District health side apan health awareness/ education leh guidelines banah kisinsakna kisam lai mahmah ka sa. Mipi nautang leh Quarantine a hong omten kilawhsawn dan kiventheihna poimawhdan theihsiamna neih poimawh lua. Atunga hong tung unaunu khat bang in ‘ka test result katheihma kei innlama paimawk ngamlou’ achih in a theihna piching mahmah hon chisak hi. ‘Kei test result positive hileh ke’n ka sungte lawhsawn di lau ka hi’ achih banga akua-akua pilvang thei chiat hile!
• Civil society organization, khatpeuh peuhte thahatna kizang huntawk zoulou ka sa. District admin inle i organizationte honsawl a, honset thawh mai hilou in, a team ua tel banga hon guide in, hon supervise in hon troi-awm siam le uh phatuam mahmah ding. Hospital leh medical team te bang le a poimawh banga kilawptaka va kithuahpih vetvet thei di’n I pianpih phattuamngaihna bang hon sukphur sak le uh maw!
• Churches / Saptuam te bang in i institution munte leh i sum-le-paite tulai in i mite adi’n nana zang le’ng, solkar leh khawtang taksapna awngte huthei law ding in ka gingta hi. Govt honchial ngaak lou a “Kou pantheihna bang a om di’a?” chi a Samari mihoih banga panla in, hun hoih I muhpen mansuah hetlouh tuak ka sa. Imi-isate tunga I hih theih, TOUPA launa & kipahna tawh I hihkhak louh ziaka khawnung kisikna omthei ahi.
• Damdawi-inn a semte adi’n bang a poimawh om di’a, chia kuapeuh in i nungthuap ding uh poimawh hun hi’n ka thei. Manipur pua a om, sum-le-pai a kithuahpih theite bang in i thawhkhawm ua, Dist Hospital, Lamka te’n kisap bang anei ua, chi a I bengvarpih leh I theihpih hoih ka sa. Emergency hun in I pan theihna lam chiat ah pang di’n kiman le hilou hia, unau... I vek ua Khristian ngen hilai zaw-mah hanga maw...
Thukhitna in, Manipur Govt in step a lakdan kipahpih huai ka sak khenkhatte:
• Pawlam a om, state honglut peuhmahte enzui/ delhzui a, ni 14 Quarantine a omsak uh hoih mahmah ahi. Hiai hi state liante bang in ahih vuallouh uh ahi.
• Manipur Govt in ni 14 Community Quarantine Centre & ni 14 Home Quarantine a chihte hoihtak a zui a 'community spread' kichi hon pumpelhpih tum tinten ahi ua, thupi khual in pahtakhuai lua uh ka sa.
• District level ah a kisam tampi omlai kha di. Hitamahleh, community resources & strengths a hausa mite I hi ua, hiaite zat theih a a om a, solkar tawh mipite thu-khat luang a I pankhawm peuh nakleh, Sian huaina tawh, emergency situation face thei na ding I hi. Khaile, Lamka mite i pantheihna di lam chiat enthak in pang ni awle.
Vaigam akipan innlam paite ading in - tulel dinmun ah lamka lama i innkuanpihte leh i unaute bitna ding in solkar in a thupiakte dik leh kimtaka i zuichiat poimawh ahi. Community quarantine centre, isolation ward, covid test leh covid hospital te leh home quarantine zuih kimna in na innkuante bitna tun ding hi.
Innlama na omte ading in – innlam hongpaite kepnate solkar khut kia ah koih kei ni. Akisam bangbang huh ding in pang ni. Solkar in covid natna leh kivenna ding a gente simtu lel hilou in azangtu ihih ngai ahi.
“Na gam in nang adi’a bang hon hihsak thei di a, chi in dong ke’n la, ka gam adi’n hih theih/ piakkhiak theih bang ka nei a, chi in dong zaw in” (John F Kennedy, USA President 35na).
