"Covid-19" a sih sang a lauhuai zaw lah "Tangtawn Sihna" ahi ngal a!
Coronavirus natna (Covid-19) veikhak ding lauh sang in Jesu Khrist a pianthakna neihkhak louh ding a lauhuai zaw!
Covid-19 apan 'taksapum bitna' zon sang in Jesu Khrist a 'khalam bitna' zon lah nakpitak in a hoihzaw hi!
Covid-19 apan kivengbit zou innkuan hih sang in Jesu Khrist' hotdamna sung a ginna a innkuan kikembit zou hih lah nakpitak in a manpha in a uthuai zaw ngal a!
Covid-19 apan hinna humbit zou hih sang in tangtawn sihna apan a tangtawn hinna a kha humbit zou hih lah nakpitak in a uthuai zaw hi!
Covid-19 hipi pumpelh sawm a naktak a pang a pumpelh zou hi napi a lah sihna pumpelh zou tuanlou a natna dang a si thouthou; tangtawn sihna a kihunkhe man lou a sihna maituah a kikhahsuah sang in, Covid-19 maituah ding a kisak a tangtawn hinna lampi zong a Pathian kiang zuan a tangtawn hinna neih a, sihkhamuanna nei a kimansa a om lah nakpitak in a pilhuai zaw hi!
Covid-19 a kipan bitna ding a mask, sanitizer, SOPs, chihte hahbawl a bitna zon sang in Jesu Khrist a hinna, kha paidan zui a zu, khamtheih, teep-le-muamte leh i pianken khelhna, sa paidante koihkhiak a, paihkhiak a Jesu Khrist a kithuam a, sa duhgawlnate pichin ding a bangmah bawl lou a kisakkholh lah nakpitak in a bithuai zaw in a hoihzaw ngal a!
Tangtawn hinna, sihkhamuanna nei loupi a khamtheih-guihtheih leh gitlouhna chiteng toh kidim a, kihangsansaktak a a mangthang ding leigou buaipih a siatna bawl a kipeipei a, hai taitai a, Covid-19 maituah di'a kipasalsak a, pum diandian tuh haina ahi; i sih nung chiang a kisik phing ding i hih ziak in!
"Pathian in Covid-19 ka vei ding phal a, ka veina ziak a ka khualzinna zou di'a hon sep a hihleh leng; ka veikhakna leh lakkhakna pen Tanchinhoih thu ziak mah hi henla, Pathian min ziak a kithuahkhawmna mun apan a ka veikhak hileh ka thuak nuamtuam in ka lungkim zaw ding hi" chi thei ding in Pathian in tuhun a ei gingtute tengteng hangsanna kha in hon thuam chiatta hen! Taksa sihna lah pumpelh lou a i tuah teitei chiat ding ua Pathian' sehkhawlsa lah ahi ngal a!
NOTE: Thugelh hon petu, Pa Ginkhanmuan, pawlpi ZRO/ ZRA a na pangsa ahi. Tu in, Jesu hon itna thu gen in innkuan chialpi khawng bawl in hinkhua zangtou lellel. A thugelh dang khat DEW, 20th Sept 2020 issue a tuang sim theihna link: https://blog.ebccdelhi.org/i-kithutuah-theih-louhna-uh-zaw-i-khalam-mit-uh-a-mial-ziak-a-na-hi-zaw-veh-aw/- Thugelh leh a gelhtu TOUPA’N manpha tak in zang tou zel hen!
