DAWNNA: Amasa pen in Pa Sum, Upa Chinsum (Media Team In-charge, Delhi) tung ah leh damna honpia Pathian kiang ah kipahthu ka gen ahi. Ka min ahihleh Cindy Kimnunhoih ahi. Khristian tuailai khat ka hi. Sinzawl khua ah Khupson Tombing leh Biakneihkim te kal a goutan upapen ka hi. Ka naute ahihleh Ngaisalom leh a neupen Dousangding ahi uh. Ka nu leh pa lounasem mi ahi ua, a tha ua a sepgah uh ne liailiai a khosa ka hi uh. 2008 in Ngopa, Mizoram ah ka na pem lut ua, nekzonna a awlsam zawk delhna ngei hi ding in ka gingta hi.
DAWNNA: Kei ka hihleh ka nu’ nu (maternal grandparents) te kiang ah Sinzawl ah class A a pat class VII tan kaitou in ka sungte ka na zui kei hi. 2010 in JNV, Tuinon, Lamka (Ccpur) ah entrance ka na ching a huai ah class X (9.2) leh Class XII (Science with 81.4%) in ka na zoukhia hi. Graduation ahih leh Rayburn ah Arts ah kihei daih in Political Science (70%) in ka na zou hi. Ka Pu Lal (Uncle), Laconique K Lalpu, Chiimtung Area, Dorcas Veng te inn pansan in college ka na kaitou a, huchi’n Young India Fellowship kichi Diploma in Liberal Arts, Ashoka University, Sonipat, Haryana ah test di’a deihsakna liantak honnei ka lawmpa Dominic Sominthang Haokip tungtawn in ka na try a, Pathian hehpihna toh huai a kai lellel ka hi. Award lam toh kisai ah 2015 in 18th Youth Parliament Competition ah ka na tel a, huai ah kou JNV te’n 1st position ka na la ua, Delhi Parliament ah performance ka hong nei uhi. School leh College te ah debate leh extempore speech te ah ka na kihel nak mahmah! District level ah le kum 2 (nih) quiz competition ah 1st runner up ka na la zom kha ngei ve!
DAWNNA: Numei ka hihna ah innsung ah hih di neneuh a tam mahmah ngut a pasal sang a tamzaw chih theih ding phial khop in. Mi inn deuh ngen a khanglian ka hihna ah hih di chu ahi sa ahi. Huaite hih zoh louhna di omlou ahi. Laisim hun di routine ka nei het kei a, bawl hi lengle ka hun zat dan kibang thei gige lou banah I deihdan a kizang thei lou di ahihna ah hun awl (asun-azan hitaleh) in lai ka na sim zel hi. JNV ka kai lai in le laisim ahahpan lawi khat ka hi kichi leng ka khial lawmlawm kei ding! College ka hongkai in ka Pu Lal te innkuan (ka omna) te’n a hon deihsak mahmah ua, strict deuh in honkol ua, a tanu bang in honbawl ua, a poimoh tenten lou ah pawtkhe lou in inn mah ah laisim in ka na kikhum gige hi. Huai banah ke’n ahihleh ka neu apat a Novel, Fictions leh laibu dangdang himhim sim ka lunglut gigesa ahihziak a leng laisimna mah ana ngaina ka hi.
DAWNNA: Tulai in ‘Screen addiction’ kichi khovel in a muhsuah, mit hihtai sak thei naupang leh tuailaite kia hilou a mi tengteng hiip leh pikawi thei a hong omta hi. Hiai tungtang ah ngaihdan leh zatdan a kibang hetkei ding. Kei ngaihdan in bel nang adi’a ahoihna di om ahih nak leh zat luat di ahi: typing, net serving, online classes, online documentation, etc hih siam ngai lawta ahihman in theih ngeingei di’a hoih ahi ka chi ut hi. Hilehle, ei hon sukha thei a hoihlou lam photphot di ah tuh, damtheihna tan pha hon hetkha thei ahihna ah, kiven luat di ahi. Ke’n ahihleh online class ka neih ziak in aloutheilou in khoih ngai leh zat ngai a hong suak a, siam theihtawp suah sawm a panla ka hi.
DAWNNA: Nu leh pa te’n leng tate technology khoihna lam ah mohpuakna lianpi nei hi in ka mu hi. A thilhihte uh theihpih in a kiang nai uah om thei gige le’ng tuh, I ngaihsak leh ngaihsak louh kikhe lua ahihna ah, ahoihlou lam khoih ding un ka gingta kei! Gaming, Chatting leh thil hou chikchik post na di maimai in tuh a khoih tam louh uh hoih ka sakpih.
DAWNNA: Tu lellel a programme ka hih pen ka zoh chiah Ashoka University mah ah MLS (Master in Liberal Arts) sutzop touh sawm ka hi. Huai zoh Pathian in ka thumna ahon dawng zelzel leh Civil Services exam pe di’a kisakhol ut ka hi.
DAWNNA: Hiai tan honpitu Pathian ahi ka chi lou thei kei. Ka thumnate, ka innkuante leh hon deihsaktute thumnate, (ka genseng kei) hon hasuantute tung ah nasa tak in kipahthu ka gen a, Pathian min ka phat tuantuan ahi. Ka siamsinpih, ka tuailaipihte kiang a ka gen ut tampite lak a khat ahihleh: Ke’n ka na hih zel (ka na paipih)te lak a khat ka thukhak nuam. Huai tuh ke’n thil himhim ka hih chiang in laisimna hi’n thil dangdang ah hitaleh, ka thaneih tengteng, ka lungsim tengteng, ka pe vek zel a (giving out the best in me); a result di tuh thei khang! Hilele huai ka kipiakna toh Pathian in naa a honsep chiang in thil thupi tamtak ka hinkhua a ka muh ngeilouh hon musak zel hi in ka thei. Huaiziakin thil hihna peuhpeuh ah, I ching hia ching lou thutuam, a hoihpen pekhe thei le huai ah lohchinna om hi’n ka mu. Khristian I hihna zumpih hetlou a, Amah min a kal suan ngam, muang ngam a, thum gige kawm a laisim na hi in, nasepna ah hitaleh, Amah toh ton gige a A’ thu zak ut leh sin utna lungsimpu kawm in pai le’ng I secular line toh Christian life lohching tak leh gahsuah tak a hinkhua zang thei ding I hi chih ka thukhitna hileh. Lungdam lua ing!
