Tulai Coronavirus pandemic (hiipi leng) in leitung mihingte hon hihgenthei mahmah hi. Hiai ziaka gentheih-mangbatna sihna tanpha tuak tampi omta hi. Biakna kikhopte neih theihlouh kia hilou in mi chih khat-le-khat kimullit tuah in hindan nuam hetlou in ki-om vek hi. Huan, hiai Covid-19 apan bit theihna ding lametna in gampumpi kikulkhum (nationwide lockdown) in ni 30 val bang I omta uhi. Hiaiziakin siamsinna munte khak in om a, I tate leh tuailaite maban ding bang chi ding chih theih haksa hi. Huan, niteng nektawm zong tampite’n nek ding neilou in lungkham tak in om uhi.
Medical lama semte asun-azanin pang ua tawlgawpta uhi. Damlou a kepna uah amau hinna mahmah leng lauhthawnhuai in om ua, huai kia leng hilou, veng leh pamte leh midangte mulit in om zaw-mah uhi. Gam vaihawmtute lah tawlgawpta uh. Thil bawlkhiakna munpi leh sumdawnna munte khak in om a, hinna kepbit ding hia ahihkeileh khawsakna ding chih khenkak theihlouh thute in vaihawmte buaisak hi. Hiai bang hun haksa a I dinlai in ei gingtute’n bang hih ding I hi ua? ‘Toupa ka tawlta uh, hon damsakta in’ chia Pathian zahngaihna nget hun ahi. Ki-uangsaka midangte mohsak hun ahi kei. Pathian thangpaihna gawtna, natna leh sihna in a honveh lai in kiphasak in om kei ni. Pharo inleng gawtna hii lengte, Israel Pathian apan ahihdan thei-a, Mosi kiangah, "Ka khelhna ngaidam inla, hiai sihna kei akipan a laak mang theihna dingin Toupa na Pathian ngen in" (Exodus 10:17) ana chi hi. Huan, haksatna tuakte hihtheih bangbanga Pathian min a panpihna piak theihna ding, midangte adi’a sepsak theihna di hun lemchang ahihdan phawk a pan hun ahi. “Na puakgikte uh kidawn tuah chiat un, huchi’n Khrist nungzuite na hiding uhi (Gal.6:2).
Hiai hun haksa om denlou ding ahi. Toupa’n hun Asak chiangin hon lakkhiaksak dinga, huai hun chiang in, ‘Toupa na min in haksatna ka na thuaka, na min in midang haksa leh gentheite ka na panpih hi’ I chih theihsamna dingin Pathian min in pang chiat ni hang. Hihtheih neilou I kisakna zahzah Pathian thil hihtheihna kilatna ding ahizaw.
“Nitengin Toupa muang nihang, Lam dik a honpi dingin…”
