Chibai Bukna

1. Hondampa la hi, I ginna uh siampa leh bukimsakpa la hi, Toupa Jesu Khrist, min in chibai!
2. Jesu’ hong pian ding thu Jawlnei bangzah hiamten genkhol in Juda sahkhua makaite – Pharisaite leh laigelhmite chih khawng in theikhol uhi. Himahleh a hong piang na thu kipahhuai tuh amaute’ lak ah hilou in gamlak a belamchingte lak ah puanzak masak pen ahi hi. Tua thu kipahhuai pulakna ding a kammal kizang masa penpen tuh “Lau kei un….” chih ahi.

Nang’ hinkhua ah patauhna, thawmhauna leh bang hiam launa neikha na hih leh hiai tangthupha “lau kei un……” chih thumal in tuni in hon khamuanta hen!

3. Hebru laikhak gelhtupan, nidanglai a pi leh pute kiang a Pathian in “seh tampi leh lam chiteng a zawlneite zang a thu na gen” ahihdan taklang hi. Thukhun Lui ah Pathian tuh lauhuai tak in kilak hi. Naihtheih ding hilou, naih ngam ding hilou hi.

Exodus 19 bang ah en le chin, Pathian tuh Israelte kiang ah Sinai tang ah va kilak hi. Sinai tang tuh siangthou a sep a, daikaihkhum ding in hilh hi. Kuamah huai tang a va pai louh ding, tua thupiak palsat teitei omleh mihing hi in ganhing hitaleh sih loh ding chitan in vauna bawl hi.

Hebru laikhak gelhtupa mah in “Tu hun nanung ah eite kiang ah a Tapa in thu a hon genta hi” ana chi hi. Pathian in a thugenna ding a a tapa hon zat in thil tampi khek hi

Pathian tuh mihing’ naihtheih leh maingal theih ahita hi. Damlouhna nei chiteng in zuan ua, numei sipawt in a guk in a puan va khoih in damna muh loh a, kineldan tungtuang tak in, Mari in a khitui in Jesu’ khe va sil a, a sam in nulhul hi.

Jesun “Nou semgim leh puakgik po tengteng aw, ka kiang ah hong pai un, keiman khawlna kon pe ding” chi in hon chial hi. Va kinget ngai lou, Amah chialna zui a va zot lel ding ahi hi.

Mimal hinkhua ah, nekzonna vai ah, sepna leh sinna vai ah, zi-le-pasal kal ah, tate toh kisai ah, bangpeuh ziak hitamah leh, puakgik pua na himai thei hi. “David khua a hondampa hong piang”in na puakgikte apan tawldamna hon tunta hen!

4. Tua Hondampan maw, Pathian bang leng ‘ka pa’ chi a gen in tuabang in sam a, himahleh Khros tung ah bel, a zat ngeilouh thumal nang leh kei’ zat ding kammal mahmah zang in, “Ka Pathian, ka Pathian…” chi in honna sapsakta a, a itna leh phulouh zahngaihna nasep ziak a thuak ding om tengteng thuakzou in “Zoh ahita!” chi in ana kikoukhia hi.

Tua zohna a bukim khiakdan tel, ngaihtuah sau lai dih e! Hebru laikhak gelhtu mah in “Ginna lou in Pathian pahtak lam mi hihvual ahi kei” chi in Pathian’ pahtak ngahna ding a poimoh ‘ginna’ a hihdan agen hi. Tua a tawp lou in, Jesu tuh “I ginna uh siampa leh bukimsakpa” chi in na genchian lai zomah hi.

Pathian’pahtak hinkhua zang ding in melma khemoeuh tung a vualzou “Pathian hat” in a hatna nang mimal’ hinkhua ah hon musakta hen!

5. “Lamdang, lemthei, Pathian hat, tangtawn pa, lemna lal” chih min manpha a pu khovel a om sun, Bethlehem gankuang a naungek a hong piang in na hinkhua ah ‘kumpi’ leh ‘Tou’ hihna luah hen la, “ä deihlam hihna ding in thilhoih chiteng in hon thuam hen”