Eimite lak ah Covid natna maituah masa lawi in Delhi a naute ana pangkha uhi. Apa pen RML hospital ah puaklut in ana omta hi. Nutate, ata pen kum khat leh a kim, symptoms bangmah omkei mahleh positive ngeingei di’a gintakna kinei in lungsim a nasak mahmah hi. A nu pen thu khat a koih zezen phot, naupang bangmah theilou, inn apan damdawi inn a kep ding in hong pawkhe le uh bang suak ching chih ngaihsutna in lungsim ana sak mahmah hi.
Deihtel thu hileh teelhuai lou natna khat zaw hiven, kimullitna liantak khovel kal ah; Symptomatic leh Asymptomic bang kigenthang nailouh hun ahih toh bang a chi di uam chih ngaihsutna saupi pai hi. Innveng, lawm-le-vualte’n va-YPA theih chi leng hilou zawmah!
Buaisia kisak taktak chia’n zaw Pathian mah kichi! Amah khebul ah kipuklut a, “Toupa, nang loungal belh ding omlou” kichi ngianngian hi. Naungek hospital a om di’a hong puakkhiak hial tak un zaw nuam hetkei e, himahleh Toupa’n hon lemgel sak in a nu toh omkhawm thei uhi.
Mihing I lungsim ah chimohna, buai kisakna omchiang in sawktheih battheih teng kiban chiat hi. Ka omna apan naute awlmoh lawsam ka hihman in tanau, lawm-le-vualte kiang ah a thu in ka tungden hi. Hon awlmoh chiat uh, khasiatna ding himhim ka nei kei hi. Ahi, hon awlmoh tengteng tung ah kipak lawtel, hiai laigelh tungtawn in kipahthu ka gen ahi. Himahleh ah ka lungsim honkhoih kha diak khat, noute phalna in ka hon genlang chitchiat ding.
Facebook status message ah lungsim “down” khawng ka post khak hun chiang in phone in bang chi na hiam chin U Lian in hon kan gige hi. Tutung naute damlouhna thu ka hilh apan hon kan gige in thumna hon neihsak gige uh ahihdan hon hilh hi. Misiangthoute thumna dawn in om in AIIMS apan nutate Covid natana apan damsiang chi a hon discharge ni uh lungsim a nuam ngei mai. Rody lasak “Nong itna lian, kidang ngeilou hi” chih la lungsim ah hong kilang den hi. Ei hoihna hang hilou, chitna hang hituan samlou in Pathian itna zaw ana kiningching himah e maw..
Kipak lua in hon thumsakte kiang ah naute’n hospital a pawtsanna video ka khakpah hi. U Lian in hon message a, “Son, kei maw ana damlou ing a, hospital ah ana ki-at ing a, tua leng at nawn ngai ding, hon na thumpih un aw” hon chi hi. Ka muh in ka kiguih in zezen hi. Kisuanlahna toh ka mittui bang pawt zozoih hi. Kou kia damlou, liangvai kisa a ka phelen lai in U Lian in damlou ahihna seelzen in hon buaipih ahitel maw.. Thupi hina tel e!
