Bible Sunday Message - Bible Thu Hinpih Poimohna

Bible (Pathian thu) a sim tan a hunsak a, a thu hinkhua a zuihlouh tuh thil lauhuai ahi. Haward Hendricks in, “interpretation without application is abortion” na chi hial hi. Khatna ah, Bible thu na hinkhua a na zat ngeikei leh, Pathian thu na thei taktak ngeikei ding hi. Na hinpih a na hinkhua a na zat (apply) leh bel, Pathian leh a thu theihna ah na khang ding hi. Nihna ah, Jesu'n LST thu zuiloute leh mihai sehnel tung a innlam toh teh hi (Matt. 7:24-29). Jakob in leng, hih ding thei zenpi a hihlouhna tuh khelhna ahi a chi hi (Jak. 4:17). Ban ah, Bible thu zuihna tellou a theihna mai in kisaktheihna a tun hi (I Kor. 8:1). Huai lah Pathian' dou khelhna leh niamkiakna ahi (Prov. 29:23; Jak. 4:6)

Bible thu hinpih (application) a haksatna

Bible study lak a haksa penpen tuh hinkhua a zatkhiak ahi, kichi hi. Bangziak a haksa pen hiam?

1. Lunglut leh chitaktak a lungsim pia a ngaihsutna (meditation) a poimoh man in. Hiai dia hun daai, lungsim siangthou, Pathian toh kizopna hoih, kuhkalna/ngakzohna poimoh ahihman in.
2. Setan in a huatpen leh a sualpen tuh Bible thu zuite ahihman in. Setan in na theihna tanlel poisa lou a, na hinna a na zat ding ahi a dal pipen.
3. Mihingte I pianken a kikhekna deihloute ihihman in (we naturally resist change). Pathian hon deih kikhekna pen ei deihdan na hi gige lou a, Pathian chihdan zui a thumanna ngai ai'hmanin.

Bible thu hinpih theihna ding a kalbi poimohte:

1. Bangchi bang a hinkhua a zang thei ding chih khalam pilna (insight) ngen in thum in. A thu na theih bangbang hinpih a zangkhe ding a kipiakna nei in thum lechin aman hon panpih ding hi.
2. Na sin ding Bible tang ngaihtuah ngitnget (meditate) in. Hiai tuh “thought digestion” a kichi. Pathian in a deihdan thu hon pia a, na lungtang ah na koih a, tua thu na ngaihtuah lumlet ding ahi. Bawng in eknel ahai bang in, na ngaihtuahna ah na haizan (digest) ding hi. Hiai bang in –
   1. Na LST simna mun ah nang om or kikoih or kibulh in. Nang mah mimal genna bangin (noun & pronoun omte) ngaihsun in (Ama'n (ka) natnate pua in,(ka) dahnate leng a po ngei a: himahleh(ken) bel dahna khu, Pathian vuak, hihgentheih in (ka) bawl ngal (a)
   2. A thumalte khatkhat in ngaihtuah (emphasis words in the passage under study). Na tangtel nang mah theihsiam dan in paraphrase/rephrase bawl in.
   3. Na tangtel tungtawn in a nuai abang in kivel in
      Khelhna – ka khelh kipuan di, ka tawpsan di, ditkik di om hia (Sin)
      Thuchiam – miteng ngahtheih thuchiam hia? Tua thuchiam ngahna ding in a ngiatte ka hih hiam? Lungput – ka ngaihtuahdan, ka thil etdan khek ding a om hia?
      Thupiak – ka thuman ding, ka zuih ding a om hia?
      Sinlai etton – hinkhua a ka zuih ding (example) a om hia? Negative or positive
      Thumna – ka thumsak ding, Pathian ka nget ding a om hia?
      Hihdiklouh – tawpsan ding ka hih diklouh a omkha hia?
      Thutak – ka gintak/pom/kingakna ding thutak muhthak om hia?
      Phatna/biakna – Pathian ka pahtawina/biakna ding san a omkha hia?
   4. Sinkhiak ding (application) na muh bangbang gelhkhia in. Na gelhkhiak kei leh na mangngilh pah ding. Na application gelh – personal, practical, possible leh provable ahih ding ahi.
   5. Na LST simna akipan a “key verse” musuah in theihdet (memorise) sawm in. Na tung a thil ka hihkhelh louhna di'n na thu tuh ka lungtang ah ka kem khawm hi [Sam:119:11].
   6. Tuabang a nang hon khoihkha thuthak na muhte hinkhua ah zang di'n hanchiam in.

Simtute, manpha leh zuihtuak I muhte zui a hinpih theih ding in Toupa'n hon vualzawl hen!

Photo by Priscilla Du Preez on unsplash.com