Thupatna : A thupi a hong kipia Black Sheep (Belam vom) kichi pen a vom leh a ngou thu gen nuam I hikei, simtute’n huai ngaihtuahna-a ana koihlou dingin I kingen masa hi.
Khovel a mihing piangkheta phot, gam khatpeuh a om hita zong leh, hiai a thupi kipia I theichiat ngei uh ka gingta hi. Baa... Baa... Black sheep I chih Nursery Rhymes minthangtak ahi a, naungek pautheituung inleng a theih ahi. Hiai rhymes bangchik a kua gelh leh bangziaka a gelh chihlamte leng kikupsawm I hi kei uh.
Houpihna Muhna: I thupi uh Nursery Rhymes Pathian hatkhuma gelh ahikei. Ahihhangin Pathian in A vualzawl leh Ama’ houpihna vanzat hithei law-thamtham ahi. Ama’ hatkhuma gelhlouh nasan a Pathian’ houpihna muhtheih ahih intuh, Ama’ hatkhum ngekngek a gelh “Bible ah” kibulphuh thak le’ng, A houpihna bangchi’n I zalou di’a? I za law-tham tham ding. Huaiziakin, Bible ah kik in kibulphuhna diktak nei chiat ni.
Thupi pansana houlimna:
Yes Sir, yes Sir, three bags full.
Hiaite’ kidotna leh dawnna in lungsim ngaihtuahna hon sukha mahmah mai hi. Mihingte I hinkhua – salam leh Khalam ah, kiginkholna ding tampi I nei chiat uh. Maban I kalsuan tupnate uh tuhun a I kiginkholhna ah akinga lian mahmah hi. Na khosakna di’a poimoh ipte (bags) na dimsak zou gigehia? Na Khalam ip (bag) a hawm a omlai lai ahi hia? Eite’n leng ka ipte ka dimsak zouta I chi chiat thei uhia?
One for my master,
One for my dame,
And one for the little boy who lives down the lane.
Mihing in I innkuansung mohpuaknate I enzui zou na hia? Nek ding taak ding I kaikhawmzou na hiam? Khovel’ hoihlouh hun ading pomohte I kaikhawm in I kholkhawm hiam? Innkiim-innkiangapiangthei ding haichi tuamtuamte donlou a mangbatni a taina ding innkiim a piangkhesak zoulou maimah I hi kha hia? Khalam ah innkuanpihte bangtan I tunpihta a?
One for my master... Pathian in vualzawlna honpiak I tate mangthangsak maimah I hi hia? I tate khalam a sinsak lou a, I ip hawmpi toh Pathian tuak ding I hi dia’m? Pathian in hihpung di’a hon piak vualzawlna talent- I tate ahizahzah leng Amah kiang tunkik zoulou a I ip hawm(empty) toh Amah maituah sawm I hi hiam? A vualzawlna I muhte uh Ama adi’n bangzah I pethuk samta ua?
One for my dame... I nu-le-pate’ tunga mohpuakna ipte I dimsak zou uhia? Nek-le-tak, silh-le-ten, itna, hawmthohna, duatna, thumannate piak a etkol ding bat a nei I hi uhia?
And one for the little boy who lives down the lane. Pathian vualzawlna tamtak I donlai un, meigong -tagah leh gentheite itna toh theikhaloute I hi hiam? Pathian kia it a, ahihhanga, genthei-tagah leh meigongte simmoh leh hehpihloute I hihleh, I ip dimlou hi ding ahi. Amaute’ tunga I mohpuakna ip (bag) hawm lailai ahi kha maizen di, unau. Pathian in nikhatni chiang aman honsiik ding ahi. Huai hun chiangin I ipsung a hawmlel ahihlouhna di’n hanchiam thak ni.
Thukhitna : Mimal in I ipte uh bang in I dimsak ua, chih kuapeuh I kidot chiat kul ahi. Amangthei pah thilte (tangtawn daihlou ding thilte) a I ipte uh dimsak a Pathian thupiakte (Marka 10:19, Luka 18:20, Johan 14:21) koihna ding mun-awn lou I hi maimah hiam? I Bible bung pansan a kigen Talent pen Pathian in vualzawlna thilthawn a honpiakte tengteng kawkna ahi – sa-lam, khalam leh neih-le-lam ah. Mihing in vualzawlna I tan akibang kim kei ding, himahleh I tanphakna chiangchiangte bangchi bang in I zang a... Pathian’ mittunna ahi dia’m? Pathian in thugelh hon vualzawlsak hen!
