Adam Khelh Vang In

Hiai laa ahihleh tutung Lockdown kipat chiil nisim March 24, 2020(Sepnawnni) a Toupa hon na piak ahi.  Hun bangtan hiam paisa apat ka thumna Toupa hon dawnna leng ahi a, Vangam lampi laktu ahihngei leng ka lamen hi. Hiai laa’ thutuunte’n mahni mimal thui genkhak aneikei a,  i Toupa Jesu Khrist tanchinhoih bute akipat a lungsim a piak a om bangbang a kilemkhia ahi. Toupa’n A’ Thu leh laate tampi a gahsuang di’n zangta hen aw! Laa thutuunte saulouin a nuai a bangin taklang ni:-

Tang khatna:Hotdamna thu toh kisai, Romte, 5:12, Johan, 3:16 & Johan 3:36 pansan a lep/ volh ahi.  Hiai tang khatna limtak a sim khempeuhte’n Pathian Hotdamna olsamtak a theihsiam ding lamet ahi.

Tang nihna:Tulai-a i thiltuahte uh toh kisai biikdeuh ahi a, Luka 21:7-38 pansan a lep ahi.  “Khovel paidan dik zou nawnlou, hiipi leng ziak a muang leh bit kisak zohlouhna toh dim gawp kisakna in Jesu’ thugen Huntawp Chiamtehnate hon ngaihtuahsak mahmah hi.  Jesu’n, “Kiging gige a om ding”, a chih thute’n niteng hinkhozatna lam ah pilvanna honpia hi.

Tang thumna:I tulel hinkho zatdan lam toh kisai biikdeuh ahi a, Matthai 6:20 pansan a lep ahi.  Jesu’n Van a gou khol ding a thupiak honpiak himahleh, tua sangin leitung damsung tomkal chik daih ding neih-le-lam, sum-le-paite kibuaipih zaw khanaak hi.  Hiai tang in i tenna tomkal chik khualzinna mun lel hizaw ahi chih hon theisak hi.

Tang lina:Hiai in Jesu Thupiakte limsak a zuihna pen hotdam tate adi’a poimoh law mahmah ahihdan toh kisai biikdeuh ahia, Johan 14:23 pansan a lep ahi.  Hiai Thupiak zuihna pen i hotdamna subuchingtu ahihna a langchiang mahmah hi.  Hotdam tang khintate Bible toh kichimat a, a sung a Thupiakte sun-le-zan a ngaihtuah ngitnget a limsak ding ahihdan hon theitelsak mahmah hi.  Hiai in hotdamsa, Bible sim ngeiloute dinmun genchiang khin hi’n theihin om hi.

Tang ngana: Jesu toh kichimat a hinkhua zat ding ahihdan gen a, Johan 15:1-6 pansan a lep ahi.  Hiai ah, Jesu’n Amah toh kizom a gahsuang dingin hondeih hi.Amah toh kizopna omlouin gah kisuangtheilou.  Gahsuangloute satkhia a mei a halmang ding ahihdan gen hi.  Khat veivei Jesu toh kigamla tak om kisak hun omthei zel a, tuipaai pha zoulou kisak hun omthei hi. Keutak a hinkhua i zat in zaw halmang ding a satkhiakin i omkha maimah di e.

ADAM KHELH VANGIN

1. Adam khelh vangin aw’ sihna’n miteng zelsuak,

Gawtmun zuan a pailai lei mihingte;

Hon it vangin A’ ta neihsun hongsawl,

Jesu’n khros ah khelhna hong sihpih zou;

Kuapeuh Jesu gingte’n hinna tang uh.

2. Huntawp chiamtehnate tungin simlei buaita,

Muanna omlou, dipkuatna’n kizelsuak;

“Kiging gige’n om un,” Jesu’n A chi,

Jesu thupina toh hongpai hileh;

A’ ta ginom, mansa’n hon tuak diam aw?

3. Tuni’n unau koi ah nagou na kholkhawm a?

“Leikha leh tui-ekte neksiatlouh na’h,

Gutate’n phenvang a guklouhna uah;

Van ah gou khol zaw un,” Jesu’n chi.

Simlei thupinate bei ding hita.

4. “Kuapeuh Ka thupiakte zui in kei hon it hi,

K’en leng it ing; Ka pa’n leng a it hi,

Amah toh ka tengkhawm ding,” Jesu’n chi;

Thupiak limsaklouhna in kidimta,

Thupiak zuilou mite Pa kiang tunglou.

5. “Kei grepgui dik ka hi, ka Pa a kempa hi,

Kei a hiang gahloute paihkhiat hi ding;

Hiang gahloute hal ding,” Jesu’n a chi,

Jesu leh A thu a omloumite,

Huntawp vaihawmni chiang’n halmang hi ding.