Manipur a nam tawmzaw (minority) Kuki Zo /Zo’ suante tung a a tamzaw (majority) Phaijang mite’ gamtatna i mu in khawvel in a thei hi. Hiai hun haksa pailel leh a maban diing aneu-alian lunglai luahtu khat ahita.
Manipur solkar ahi hiam, a.k.l. Phualpi solkar a kipan hiam deih bang in thil a paikei, angvanna mulou i kisakna lai leng a omkha diing. Tua kawm in, hiai thu pen tangthu lang nih nei (two sides of a story) bang ahi chih i phawk uh deihhuai. Huan, a VUALLEL NGEILOU PA toh galdou i hi chih mangngilh mahmah kei ni.
Tua chi zou in, eilam kiveelna diing thu saulou houlim ni. Kumpipa David in Sam 116:12-14 ah hiai na chi hi -
“Ka tung a a thilhih hoih tengteng ziak in TOUPA lak ah… (a) Hotdamna nou ka la diing; (b) TOUPA min ka lou diing; (c) A’ mite tengteng ma ah ka thuchiamte ka tangtun ding.”
KIVEELNA DIING: A tung a (a) & (b) buaihuai kei. Tua ah eimah leng buaikei hang maw - Jesu Khrist’ sisan a tat, hotdam, A’ ta hihna toh “TOUPA min” lou a i thuum ek-ek hun uh ahi. A (c)na ah i hunlui uh enkik zual le’ng, hichi bang in -
1997-98 namkal buailai in ‘hotdamna nou’ la in TOUPA’ min i na lou sauhsauhta uh. Ama’n hon dawng, i mangbatna tengteng apan hon hunkhia hi. Tua ban ah, 3 Bills buailai - 2015 kum in leng. Huan, Covid hiipi in leitung maikaih kilchih a tuamlai in (2020-2022).
TOUPA’ ma a na thuchiam bang ahia le? (Mimal na kidong le’ng). Amah ma a thu na chiam chia’n, mi tengteng ma a ‘chiam’ toh kibang na hi. Amah lei leh van bawlpa leh vaihawmpa; Vaihawmtu omsun hive’n. Na mimal hinkhua enkik mah dih le - innsung, khotang, saptuam leh sepna a na lungput leh gamtat zia. Kisiamlouhtanna omlou hinkhua a hing khat na hihleh TOUPA min phat in om hen!
Ahia, na thuumna leh thuchiam, TOUPA lak a tangtun diing, tangtun tuak, nana mangngilh omkhak zenzenleh kisiik/ lunghei in amah kiang zuan mai in. “Himahleh nou Israel-te, Ka sikha Jakob, Ka mi teel, Ka lawm Abraham suante aw: Nou, lei tawpna a kipan a Ka mi pi, a nawl a kipan a Ka mi sap, Ka sikhate na hi ua, hon paaikhe lou in Ka hon teelzaw hi,” Ka hon chihte aw, ”Laukei un, Kei lah na kiang uah Ka om ngal a; mangbang kei un, Kei lah na Pathian uh Ka hi ngal a: K’on hatsak ding a; ahi, K’on panpih diing; ahi, Ka diktatna khut taklam in K’on leen gige diing” (Isai 41:8-10) chih gelh, i TOUPA’ kammal a omlai a; A’ diktatna khut taklam in hon let dek ci’a a lem geihlou om, tua pen Isai 59: 1-3 a kigelh khin zou ahih diing thil om thei ahi, unau.
I lampite zong in, i lungput uh enchian thaklai ni. Amah, a vuallel ngeilou Pa toh ton in pai le’ng bangkim ah muanna. TOUPA’N, PBC (24-26 Aug sung), nang adi’a hon na lemgelsak hithei hi. Simtute, TOUPA thupha!
