“Madam… Madam… Nang koi a pai ding e? Hiai bus hiaitan kia pai ding ahi” chi’n bus conductorpa’n ka ihmut lai hon phawng in hon dong hi.
Ke’n leng hi veivuai kawmpi a ka mit nuai mualmual in, “ Eh, bang chidan ahia? Hiai bus Shalimar Bagh tan pai di hilou maw?” chia ka dotleh;
“ Himah e. Hilehle a engine lam buaina khat omziak a bus na khen ngai ahi” hon chi hi.
Ka kiim-le-kiang ka etleh bus driver pa chihlouh midang kuamah a na om nawn kei ua, “Khaih, ana hah ihmutna mahmah ing e…” chi kawm in bus dang man di’n ka kumkhia hi. Hospital a night duty zou, inn tunna di’a bus in dakkal 1 bang la ding ahihci’a, chi a lungmuangtak a ka tutna a na ihmu hithit kha tuh ka na hi ngei a! Tua hun lai in bel khovel bouruak le a dan omdeuh lai in, guuktaak, kisualluih chihte vaang mahmah lai a, lauh a patauhluatna ding om law lou hi.
Mungte leh Chingte aneu uapan lawmhoih ahi ua, Mungte in piching hong hih ua sepna hoihtak hon muh in Chingte toh hong kiteeng uhi.
“A nuam ah hi’n haksa ah hitaleh, ka gin-om tawntung ding” chi’n Pathian’ leh mipi’ maai ah kichiamna nei uhi. Pastor inleng, “Pathian in a GAWMSA mihing in KHEN kei hen” chi in napkipna nei a, banghiam kituahlouhna ziak hiam kitheih siamlouhziak chih khawng a kikhen (divorce) chih pen OPTION a leng omkhalou hipah mai lou hia… A nuam in haksa a gin-om tawntung di’a kichiamna nei nanana chu!
Mungte leh Chingte’ kikal ah khuak pilna kia leh kitheihsiamna kia hilou in lungtang tawngnungpen apat itna hong piangkhe gah ziak a tua bang kitenna hong omthei pan ahi hi.
Toupa Jesu I Lal Leh Hondampa a I pomdan leng hiai toh kibang ahi. Amah aa ding a I lungtang tengteng, khuak ngaihtuahna leh pumpi kipekhia I hi.
I pianthakna, a dik na hia chih I enchian hiam?
Enchianlua a piangthak zihzeh zezen I hi zaw hialeh?
Etchet ngai ahihdan le kuul salou a om I hizaw hiam?
A bul a k’on gen ka omdan bang in ei gingtute leng tampi I om uh ka gingta hi. I tuanna bus uh zaw dik mah veh aw… Hilehleng, I pianthak zoh un ginna lam ah ma I sawn uhia?… Ahihkeileh, bus lut phet a ihmu pah a phawn ngai zeen I hi uhia?
Hiai hi zumhuai / kisuanlahhuai thil a I ngaih zenzen louh ding ahi. Khristian I hihna a, amasapen a fel di pen zaw hiai I pianthakna mah ahina hi zaw!Hucia buaina hiam thawmhauna I neihleh I pastorte hiam I thuzak ngeingei ding ahi.Tulai diak bang in houh I pianthakna I kitel mahmah phamoh hi. I pianthakna felta… huaizoh bang hita?
Atangpi in pianthakna ding a kihahgen mahmah a, pianthakzoh chianga bang hih ding, bangchi panlaak ding - discipleship hi a kigen tawm mahmah kasa hi.
Himahleh, NUNGZUIHNA hi a poimoh mahmah khentuam theihlouh thil ahi. A kigen tawm ziak a na ngaidau maimah leng I hikha ding uh…
Matthai 5:14-16 ah - 14: “ Khovel vaakna na hi uh. Tangtung a kho om seelguk theih ahi kei.
15: Mi’n khawnvak de in loh nuai ah a koih ngei kei uh, a koihna ah a koih zaw uh . Huchi’n innsung a mi om tengteng a taan hi.
16a : Huchi mah bang in, na vaak uh mi’ mitmuh di’n vaak hen…”
Matthai 7:21 ah “Toupa,Toupa hon chi napeuh vangam ah a lut kei ding uh; ka Pa van a om deihlam HIHTE tuh a lut ding uh”
Hiai I Bible taangte’n a thukia a ginna hilou, nasep (action) hiveh o a gen! I thagum suah in I sem ding chihna kia hi tuanlou in ginna nasep I sem thei hi.
Etsakna ding in:
I pianthakna pen skul a admission bawldan in ngaihsun le hang. Admission bawl zoh a thil teng fel vek pen a zohna hi zenzenlou in a KIPATNA ahizaw kei maw?
Huai zoh tuh laisim ding, gelh ding, exam piak ding chihte kitatsatlou himai! ‘Huiha’ chih hun bang leng hong tam mahmah!!
Admission I bawlna ziak in tua skul ah I min kigelh lut a, tua skul uniform kisilhthei a, a laibute kinei thei a, niteng in skul kikai thei hi.
Himahleh, mahni UT DANDAN in tua skul ah I gamta theita kei a, tua skul compound a I om sung in tua skul in danlehthupiak zuih di’a a bawlte I bohse thei kei a, I bohsiatleh a kigensa bang in GAWTNA I mu ding hi.
TOUPA JESU a pianthakna I neih chiang in, Pathian’ Ta hihna admission nei I hita hi. Admission hoihtak a I bawlzoh lel leng naak kipahhuai law mahmah! A thawn hizenzenlou. A mantam lawmahmah! Heutupa Rev. K. Kamchinkhup in Good Friday message in a gen chiang mahmah. I na ngaihkhak keileh na ngaithak ni. https://www.youtube.com/watch?v=B9l9jECZupE
Hilehleng, hiai a tawpna hizawlou in I nasep ding KIPATNA hizawlou ahi hiam?
Ahihleh, admission bawl zoh chiang a a poimoh pen bang? Laibu.
Skul na kai in kai keita zong in, uniform na silh in na silh kei ta zong in, na pawl aban suan na utleh na LAIBUTE SIM a na THEIHSIAM a kuul hi. Mahni lehkha sim mawngmawnglou a examna a pass chih na thei ngei hia? Huchi chih om ngeilou hi. Tua bang in I pianthak zoh chiang a I hih masak ding tuh BIBLE SIM a THUMNA neih gige ahi. A sim a simsuak thoh a bangmah theihsiam sawmlou I hihleh I Bible sim in omzia nei tuanlou ding hi. Hiaite I khalam an leh galvan leng ahi uhi.
Ahihleh, Pathian in hon houpihna bangchi theih a zaak ding ahi di’a le?
Thil bangkim ah Bible toh kikalh in Pathian in hon houpih ngeilou ding hi. Pathian in A thu siangthou tungtawn in Hon houpih hi. Thil bangkim na muh na zaakte Bible toh enchetna na neih chiang in,“Hiai Pathian’ apat ahi.., ahi kei” chih na chiang mai ding a, na lungsim leng a nuam in a tawldam ding hi. Tua ding in Bible mah sim kuul hi.
Admission bawl zou chia muangtak a na ihmu phiuphiau I na hihkhak ding lauhuai hi. Ihmu maimai thei vual I hikei … A Kipatna Lel Ahi.
*Heutunu’n August 2007 apan in Staff Nurse nasem a, Senior Nursing Officer (SNO) dinmun letsak a omta in, tulai in Obs. ICU (SJ Hospital) ah duty hi. TOUPA ei di’n hoih hina e...
