‘What is so Amazing about Grace’ kichi laibu ah mihing in ngaihdamna a kisapdan leh a haksatdan a taktak a thiltung khat pansan in Philip Yancey in hichi in gelh hi.
Simon Wiesenthal kichi Juda mi khat a hi a, kidoupi nihna lai a Juda mite' tung a Germante tatsiatna nakpitak a thuak in a mitmuh mahmah in a’ pi kaplup in om a, a nu leng puakmang in om hi. A tanau nai mi 89 tak Nazi te khut ah si uhi. Amah leng mat in om a, damdawi-inn khat a a om lai in nurse khat in Juda mi na hi hiam chi in na dong hi. Damdawi-inn nuai lam ah lutpih in pasal khat dam lou, kipum tuam lenglung a si ding kuan hita khat toh kihou sak hi.
Tua damlou pen in Juda mi khat pepeuh houpih nuam a lunggulh tinten ana hi a, Wiesenthal pen Judami ahih ziak a nurse nu’n kimutuah sak ahi hi.
Damloupa’n German sepaih a na pang, Russia lam a va gamkuan liamgawpsa a hong tungkik ahihdan gen kawm in a gamtatna hibang in kipuang hi.
“Ukraine a Dnyeppropetrovsk khua ah bomb thang kikam a awk kha in ka seppih German sepaih 30 vel a si uhi. Tuate phuba lakna ding in huai khua a Judate 300 khawng ka mankhawm ua, inn khat, sawng 3 a sang ah ka hawllut ua, thautui buak in ka hal ua, grenade khawng a deng in, um kimvel in a taisuah sawm om leh ka ban kap uhi. Huai inn sung a mite' patauh thawm leh husa tuh ngaihngam vual ahi kei.
Tua lak ah pasal khat, a puansilh mei a kang, a khut langkhat a naupang khat pom kawm, a kiang a numei khat ding ka mu hi. Pasal in a khut langkhat in naupang' mit a hum a, inn sawng apan in a tawmkhia hi. Tuazoh in numei leng amau zui in a tawmkhe zui hi. Midang bangzah hiam leng a tawmkhia uhi. Tuate ka na ban kap uhi. Oh, maizen!”
Wiesenthal in paikhiaksan sawm mah leh damloupa’n kai kik zel a, a gamtatna uh mulkimhuai taktakte ban gen hi. Himahleh tua naupang leh nupate tanchin ah hong kileh kikzel in gen thakthak hi.
A tawpna ding in hichi in hon chita hi: "Ka damsung a dakkal nanungpen ah nang toh ka omkhawm kha a. Kua na hia chih ka hon thei kei. Judami na hi chih ka thei a, tua teng le a hun lua hi. Ka hon thilgente a chizauhuai mahmah uhi. Sih ngak a ka om sung in Judami khat pepeuh toh kihou khak a, a kiang a ngaihdam nget ding ka lunggulh petmah hi. Judami a damlai koi a om hiam chih lah ka thei kei a.....Ka hon thilnget tuh nang adi’a leng haksa lotel ding ahi chih ka thei a, hilele a dawnna za lou in lungmuang tak in ka si thei kei ding hi"
Wiesenthal in leng a chipihte' puakgik tengteng amah liangkou a hong kibat bang in thei hial a, tohlet apan gallam a nisa peuh en in, a kiang a damlou kipumtuam pen en zel in, thoupi lengging in damlou va velvel maita khawng a en zel a, "Atawp in thupukna ka bawl a, bangmah gen lou in tua pindan apan ka pawtkhia hi" a chi hi.
Damloupan Judami apan ngaihdamna tang lou in sawt lou nung in si hi.
Wiesenthal bel kidouna beikuan lam in America sepaihte’n hunkhia uhi. Mangngilh theih khak leh chi in tua mipa' nu kiang ah Stuttgarh khopi ah va hoh a, damloupa tanchin leh a tuailai hun a sahkhua limsaktak ahihdan khawng anu apan ava zakchiang in, tua damloupa hun na nungpen a nu kiang a va hilhngam ding vual hilou hi.
Hiai thiltung ah nang pen Wisenthal dinmun ah kikoih dih. Ngaihdam mawk di baihlam lou hial hi. Kidouna bei nunglam tanpek in leng a lungsung luahden lai hi. Himahleh tua damdawi-inn a thilmuh a lungtang tawng ah thamden hi. Sahkhua tuamtuam a makaite khawng laikhak a, “ka hih dik mah hia? Kei’ dinmun a ding hilechin bang na loh dia?” chi in dongkual hi.
Damloupa’ dinmun hiam ah kikoih dih. Natna hizahta thuak a, a hun beikuan mahmah hita chih leng thei a, taksa damna sang a leng ngaihdamna mah lunggulh vungvung maimah hi.
Hiai thiltung apan in thilnih chiang mahmah muh theih om hi - ngaidamtu a pan baihlam lou hi, chih leh, ngaihdam a om manpha mahmah hi.
Pathian bang in leng mihingte hon it mahmah na pi in khelhna pen mudah mahmah ahihman in sisan suah louh in hon ngaidam lou hi. Khatvei setden ding a Jesu Khrist sisan luang ziak in mihingte’n a 'thawn' in Pathian' ngaihdamna i tang thei hi. A 'thawn' i chih chiang in mihing lam a pan et in a 'thawn' hi a, Pathian in bel a 'thawn' a hon ngaihdam ahi zenzen kei. Khelhman piak ding om bangbang piakkhit ahihtak man a hon ngaihdam ahizaw hi.Tua ngaihdamna lah ngaidamtu Pathian' lungkimna ahi. Ngaihdam a om mihing' suahtakna leh thovenna leng ahi.
Ngaidamtu a panna tungtawn a kipahna leh ngaihdamna tangtu hihna tungtawn a kipahna tang tuaktuak ding in Pathian in hon deih a, tua mah tang thei ding in hon koih hi.
Ngaihdamna zaw a ngaidam tupa' a ding in suahtakna leh zalenna hi a, ngaihdam a om pen a ding in puakgik lakkhiakna leh thovenna ahi.
Tuabang suahtakna nei in, tuabang thovenna midangte kiang a tuntu na hi hia?Pathian apan ngaihdamna hamphatpihtu hi ding leh tua ngaihdamna tungtawn a hamphatna midangte lak a luangsawn saktu hi ding in Toupa’n hon ompih hen aw!
Note: Heutupa (Upa Kam Suanthang) in hun paisa ah thugelh DEW/ Gamchiam ah na pe zeuhzeuhta. Tuate sim theihna link:
https://blog.ebccdelhi.org/biakna-mun-leh-biak-a-om-pa/
https://blog.ebccdelhi.org/thil-neu-leh-thil-lian-a-ding-a-muanhuai-pathian/
https://blog.ebccdelhi.org/hattak-leh-hangtak-in-om-in/
….
