“Hiai ah a omta kei; a gen bang ngei in a thounawnta, a lupna mun en un.” Matthai 28:6
Jesu Khrist thohnawnna ginglel mite’n ngaihdan tuamtuam a na gen uh a – a nungzuite’n hankhuk diklou va enkha uh ahi, Jesu si taktak hilou a khophawk lou maimai ahi, a nungzuite’n Jesu’ luang va gukhia uh ahi; ahihkeileh nungzuite bumhai a mukhialsak (hallucinated) a om ahi uh chih khawng a gen uh ahi. Hiai ngaihdante a diklouhdante khatkhat in hiai ah i suut mankei diing. Himahleh, Jesu Khrist mat leh kilhden a a omlai khawng a vantang lak a leng dawk ngamlou kia leng hilou a, kibumang nungzuite’n hichi bang thuzuau phuahtawm in conspiracy a nei ngam dekkei diing uh chih theihsa ahi. Jesu’ nungzuite sihdan i zaksa uh ahi a, a ginna uh ziak a martyr ngenngen ahi uh. Mimawl ngaihtuahna ah leng “thuzuau phuahtawm ahihkeileh kilimchin maimai ziak a amau hinna pe ngam diing mi a om gintakhuai hetlou ahi.” Hiai Jesu’ nungzuite’n a mit ngeingei a a muh uh thutak leh thudik a ginna ziak un a hinna uh leng a na pe ngam chiat mah uh ahi. Huai ziak in Jesu Khrist misi lak a pat kaihthoh a om taktak mah hi na ahi.
Leitung ah sahkhua tuamtuamte’n - hinna leh sihna toh kisai gindan a nei vek uh a, sihnung a thil om diingdan a gen chiat uhi. A khente’n reincarnation – mihing a sih khit chiang a ganhing hiam thilsiam dang hiam suak chih bang a gingta ua, akhente’n - sihna leh hinna cycle a om toutou in a tawp chiang a suahtakna (Moksa) mu chih khawng a gen uhi. Himahleh hiai sahkhuate’n a biak uh a pathian uh ahihkeileh a sahkhua mukhetu kuamah sih nung a om diingdan a gente uh zui (experience) khat leng a omkei uh. I Toupa Jesu Khrist in ahihleh a gen bang ngei in Khros ah kilhden in a om a, ni thum ni in haan apat kaihthoh in a om a, misi thohnawnna om ahihdan amahmah in a taktak in hon lakkhia hi. Huai ziak in i gintak uh, thounawn Jesu zaw zuihtaak mah a na hi ahi.
I Korinth 15:14 ah, “Huan Khrist kaihthoh a a omkeileh, i thugen uh bangmahlou ahi diing a, na gin u leng bangmahlou ahi diing hi,” a na chi hi. Hiai Khrist thohnawnna omlou bang a na hileh, Khristiante lametna sangzaw den chiang a sih nung a hihthupi a om diing, i chih sek bang leng zuau suakkha diing a na hi. Ginglou mite sahkhuate’ thuginte toh i thuginte uh kibang lel ahi diing a, hiai leitung ban ah lametna himhim neilou diing i na hi uh. Hotdamna thu (tangthupha) i na zaak uh a kimlou suak diing ahi. Himahleh, Khrist misi lak apat kaihthoh in a om a, a thohnawnna in ‘sihna tung a vualzohna’ a hon pia a, gingtute’n hiai leitung ban ah tangtawn lametna nei i hihdan uh chiang semsem in a muh theih hi. Huai ziak in ei gingtute i hihna taktak (real identity) uh sihna tung a vualzou, thounawn Jesu Khrist’ tatsate i hi uh a, leitung haksatna, natna leh lungkhamnate ziak a kaihkun a om diingte hilou in, Khrist thohnawnna ziak a vualzou hinkhua zang diingte i hizaw uhi.
