“Mi damtheite’n daktor a kiphamoh kei ua, mi damtheiloute’n a kiphamoh zaw uhi” (Mt.9:12; Mk.2:17; Lk.5:31)
Natna himhim maingap huailou, kihtak huailou leh lauhuai lou chih omlou hi. Aziak bel hon nasak, hon gimsak banah neih-le-lam khempeuh hon ne bei in sihna tanpha hon tunthei hilai hi. A kihtakhuai diakna bel i theihkhiak ma in kidamlou khinta a, i theih chia’n a zekai tampi om hi. Akipat sawtpi hi in i taksa leh pumpi’n a thuaklah chi’a thei pan I hi uhi. Theih phet a pan I lak keileh ni khat zekai, ni khat damhak hipah a, zong kilap lou thei hilai hi. Sum neih chia’n kikem ni, loh lak chia’n kikem ni, na pa na u hong tun chiang in chi bang a ngak theih zong hilou, sun a china (damlou) sun a kep kul, zan a china zan mah a kep kuul hi. Dakkal khat, ni khat zekai man a lap zou nawn lou a sihloh tampi ki-omta ding hi.
Khota lam a omte a zekai khak leh zong ahi ding mah, khopi sung Doctor hoih taktak omna leh damdawi-inn lianpipi omna a khawsate’n i hamphatna mangngilh lou in ahunhun in zang siam leng chih I kideihsak mahmah hi. Khatveivei Doctor leh damdaw-inn maingap louh man a zekaina hang a i hinna i tan loh ding ding lauhuai hi. Khopi i utna siamsinna hoih, damdawi-inn leh Doctor siamte omna chih khawngte ziak ahihman in zang phatuam mahmah le’ng i chi uhi. Eimi a tamzaw thamte’n i thuak ek nung a, i hoih theihlouh chiang a Doctor leh damdawi-inn naih pan hang a zekai lawta in kilap nawn lou thei hi. A theite dong pah in, a zat ding diktak mah zang kha le’ng, baihlam tak a dam ding, tampi sen kul lou dingte na-ngawn ah kikhonung buai in, tampi seng, damzou tuan lou hilai hang. Meima neuchik zong awlmoh louh luat man a lianpi suah, damdawi neuchik, sum tawm chik senna dingte na-ngawn neih louh man hi masa lou in ngaihsak louh man, limsak louh man hizaw hi.
Huaiziakin khangluite’n, “Suhum-tawhum a ka hum” a chih bang un, damlouh phatmohna khat om huna zat ding singkuang taw ngak sum neih teitei ding thupi hi. Inn-le-lou, silh-le-ten, nek-le-dawn, van manpha tuamtuamte sang in chidamna thupi zaw tham hi. Laisiangthou in zong “Nek ding sang in hinna thupi zaw a, silh-le-ten sang in sapum thupi zaw” (Mt. 6:25) ah na chi hi. Natna neu chikchikte zong Doctor hiam Nurse hiam a theizawte dong in kikem pahpah thei le’ng hoih pen ding hi. Hithei bang hileh kumkhat in khatvei bek bang check-up bawl in doctor te kiveelsak thei in ahilou tawp in leng I kum toh kituak vitamin chihte bang ne thei zel le’ng hoih mahmah ding hi.
Tua ahihman in, a man kituat zou lou Pathian hongpiak na nuntakna a hun loupi a na nat, na sih louhna ding in natna awlmoh mahmah inla, kidon-kikem siam mahmah in. I Toupa Jesu leitung hong pai lai a, a nasep thupi leh poimoh mahmah thumte tom chikchik in anuai abang in en khawm le’ng:-
Biakinn zang se tuan khollou in Galili dil gei khawng ah piautak a mipi omte kiang ah thugen zel hi. A thugen ngaikhia mipite theihsiam ding in haichi chindan, belamchindan, singkung loupa, ankam tang chihte khawng leh a kiangnai a om muh pahpah theih thilte gentehna a zang in thugen zel hi. Huai chiang in mipite’n theihsiam in sang thei pahpah uhi. Gentehna tuamtuam zang in thugen sek hi.
khawng a thukihilhnate kibang lou hi. Toupa Jesu’n thugenna pen mipite tung ah zang a, thuhilhna bel nungzuite leh teltuam deuh mite kia tung ah zang sek hi. Theihsaknop tuam a neih chiang in mipi lak apan kihemkhia in tang tung ah nungzuite thuhilh hi (Mt.5:3-8). Huchi bang zel in thuhilhna nei hi.
Mi tampi natna chituamtuam Mittaw, khelbai, phak leh zeng, banah dawimat leh a tuamtuamte damsak hi. Natna damsak lel hilou in misi na-ngawn a kaithou thei Jesu Khrist tuh i Pathian uh ahi.
Mi kuapeuhmah in natna kinei chiat ding hi. Tuate ahuntak a kep leh etkol in a tam zaw thamte damkik thei hi. Himahleh ngaihsak louh leh limsak louh man in a kumzawnpih bang om thei ahihman in pilvang ni. Pasalte’n I zite uh chidam leh thahat a, poimoh bangkim hon sep zohna ding uh leh tate naute innkuan chidamna zong ei tung a kinga ahi chih mangngilh louh kisam hi. Tuate thei a ahunhun a enzui zou ding in chidamna leh lemgelsiamna Toupa’n honguan kim chiat hen!
