“Nam thupitakin k’on bawl ding a, k’on vualzawl ding. Na min ka liansak ding a, vualzawlna na hi ding. Nang hon vualzawlte ka vualzawl ding a, nang hon hamsiatte ka hamsiat ding. Nang tungtawnin leitung mite khempeuh ka vualzawl ding…” (Gen.12:3)
Kum 2000 malam, internet, mobile phone chih te khawng tulai dan a I hahzat theih ma, mi I houpih nop chiang banga PCO khawng I hah zat mahmah lai hunte ngaihsunthak kik zual dih. Sum tamlou lakhe ding a leng nileng phial a Bank a va-ngak a, hun I piaklai nite sawtlua ahi nai kei! Mobile phone bang movies khawng a i muh, zang kha ding a le I na ngaihsut khak louh himahleh, khovel khantouhna nasatak ziak in tuni chiang in mob phone tellou a khosak theih nawnlouh a bangta! Sum lak khiak ding, deposit ding, transfer ding, etc I neih Ieh leng tu chiang in Internet/ Mobile phone, ATM khawng zang in I hih nopte Bank a hoh ngai lou in baihlam tak in I hih zungzung theita hi. Khopi bang ah online shopping, nek ding order, Bill piak etc I chih te khong tulai vanzatte zang in, i inn lum apat bang I hih ziahziah theita a, tha-le-zung tamtak sen ngai nawnlou ahihman in a kizen mahmah hi.
Tulai in Covid hiipi ziak in khovel in haksatna nasatak I tuak lel hi. Mipi punkhawmnate phallouh a hong hi a, Skulte khak a om in, I Biakinn a kikhopna I neih sekte hong hithei nawn lou phot hi. Kinai lua a om louh ding chi in social distance a kihah gen mahmah hi. Office a semte bang le rotation a office kaisak a om bang, ahihkei leh work from home (WFH) chi in internet zang in, mahni inn a office nate sem tampi tak ki-om hi. Skul kai naupangte bang leng online class nei thei in, siamsinna kipaipih noknok thei a, buai I kichih lailai inle, tulai vanzatte tungtawn in paipai thei ana hi hi. Hiai hiipi pen internet leh mobile phone khawng I zat phak ma ua hong tung himaizen leh bangchi bang phet in i buai ding ua? Bank ah sum deposit ut, la khe ut, transfer ut bang kipumdim ding a, social distancing ngai zomah ding ahihman in, mipi kipumbuai ding a, online class chih khawng lah om theilou ding a, siamsinna bang dinkhawl hit-het ding a, work from home lah hithei mawk lou ding ahihman in, tua sang in sepna nei nawnlou tam sem piang ding a, khovel kibuaizak gawp ding ana hi chih hon ngaihsunsak hi.
GINGTUTE KHOVEL ADI’N MANPHA
Pathian in a thuzui Abraham kiang ah, Amah ziak a lei a namchih vualzawl a om ding uh ahi Ana chi a, mi khat Pathian thuman ziak a namchih in (gingloute tel in) vualzawlna dong chih tel, a thupi ngei mai! Pathian a kinga tangval Joseph ziak in, Aigupta gam pumpi in kial hun in leng nek ding nei ua, Aigupta gam kiim a omte nasan in a zar ana zou pha tel uh, thupi lua hi. Sawltak Paul, a khualzinna long a a tuanpih mi zanih sawmsagih val te (Nasepte 27), ni tampi huihpi vuahpi ziak a damsuah himhim kilam-en lou a a buaisiat nung un, Pathian in gingtu mikhat long a tuangkha Paul ziak in suakta sak vek hi. Gingtu muanhuai mi khat ziak a midang tengteng inle vualzawlna ana dong zel uh ahihman in, gingtute khovel a din I nak manphat ngei mai! Hiai Covid 19 bang le kum 2000 malam a Pathian in khovel a ahong om sak louhna ziak, ei gingtute ziak hikha mahmah ding in ka ngaihsunta hi. Huaiziakin, Pathian in a mi siangthoute a hon laktouh ma, hiai khovel a khosa ei gingtute’n, khovel adi’a I manphatdan phawk thakthak in, Pathian adi’a palai (Ambassador) muanhuai, midangte adi’a vualzawlna tuntu hitou zel thei di’n Pathian in simtute hon vualzawl chiat hen!
