Hichi in gen le’ng, i meh duhzawng kibangvek kei mahleh, meh ah i kituak veh uh. Singpi duhdan kibangvek nawn uhi. Saptuam ah kibangvek kei mahlehang, Jesu Khrist ah i kibangvek uhi. Mihingte hinkhua leng tuabang thou ahi, khosakna leh sep leh bawl tuamtuam ah kibangvek theikei mahleng, Jesu tellou in zaw ahithei kei hi. Jesu tellou in bangkim tuh a mawkna lel ahi. Tua Jesu bang chi'n na mu a, poimoh hi’n na kithei hia? Ahon ompih poimawh hi’n na kithei hia? Kingaihtuah hun ahi. June 14, 2020 a mahni-kithah ziak a khovel a khualzinna zouta Sushant Singh Rajput, Indian Bollywood movie star in, 'International Lunar Land Registry' tungtawn in khapi (moon) ah innmun diing gam lei tazen hi. Khapi ah a teeng hia le? A teeng kei chih i thei chiat uh. July 2020 in leng India businessman dang khat in khapi ah acre khat a lian gam lei thak chih thu kiza hi. Laisiangthou in, “Kuapeuh a hinna humbit ut in a taan di’a; Keimah ziak a ahinna taan in a humbit diing hi,” (Matt 16:25) a chi hi. Aban i simsuk leh, “Mi' n khovel a pum in nei henla, a hinna taan leh bang a phatuam dia?” (Matt 16:26) a chi nawn hi. Tuni' n, Jesu Khrist bang chibang in na mu in, na nei a, na pom a chih kivelthak a poimoh hi.
Jesu'n a nungzuite kiang ah, “Mite'n mihing Tapa kua ahi hon chi ua?” (Matt 16:13) chi'n A dong hi. Mi leh Pathian kal gen zaw nuamtak ahi ngei diing, a dawng sauhsuah mai uhi. Akhen in, Baptis-pa Johan ahon chi ua, akhen in Elija achi toh, Jeremia chipawl toh, a khente'n lah Jawlnei kuahiam hon chi uh, chi'n gen diing theiloute tan inleng a zongtawm uhi. Jesu'n, 'hunta, hunta' chia khutvan khum hial diing in ka gingta hi! Midangte’ tanchin gen tuh nuam i sakdan uh ahi a, midang leh Pathian' kal gen khawng baihlam i sa petmah uh. 'Hiai mipa zaw, hiai minu zaw, saptuam khawnga kihel a, seemtu khawng hizenpeuh ve’n, a piangthak taktak di’a hia? khawng kichi kha zel thei hi. Himahleh, Jesu'n, “Ahihleh, nou kua ahi na hon chi ua?” a hon chihkhiak chiah in tuh boruak a dai zikzik mai ahi. Zu leh sa a kibualte hiam, kongzing a drugs ngolveite hiam muhdan koihkhe phot in. Nang mahmah in Jesu Khrist kichi bang na chi muh a? chih a poimoh zaw ahi.
Boruak giktak kal ah Peter hong kipan a, “Khrist Pathian hing tapa na hi” hon chikhia tuh, Jesu kipak tak ahi diing, “Simon, Bar Jonah, Hampha chia; sa leh sisan theihsak na hikei a, ka Pa van a om in hon theihsak na hi” (Matt 16:17) A chi hi. Hiai munchiah ah Peter in 'Hit' fuh petmah ahi diing a, Jesu hichikhopa a kipahlam kimulou hi. Abanah, saptuam a lam diing thute, van-gam tahbi toh kisai tanpha Jesu'n a genna muhtheih in om hi. I gen-ut tak zaw, Jesu Khrist bangchi'n na mu a? Na hinkhua a omden diing in Jesu bangchi'n na pom a? chih ahi. Laa in, ''Amah chialte i Toupa'n nial ngeilou, Tua chi’n a kiang uah khawl in a ompih denta; Khamuanna tulthei nawnlou A peta a, A kiang uah teng in a ompihta hi,'' chih ahi. Khamuanna tul theilou hon petheitu khat kia a om a, huai tuh Jesu Khrist kia ahi. Huai Jesu na neita hia?
[“Ka Kiang Ah Om In TOUPA, Nitaklam Ahita Hi!” cih thupi pansan a htp. Rev Thangzasiam’ gelh, Ruth Messenger, Sept–Oct 2020, p. 04-07 ah tuang. Tua apan eukhiak thugelh beukhat, TOUPA’N sathau hong nilhsak hen!]
