Mahni Pumpi Kemtu Muanhuai: Lei Kemtu Muanhuai

(Paunakte leh Jakob Laikhak apan tamlou)

Mihing pumpi kahiang neuchik himahleh thil hihthei tak lei (tongue) ahi. Lei zat siam kichi haksa mahmah a, miteng phial in i sual uh ahi.  Lei zat dan in hon suaktasak thei a (Rom. 10:9), lei mah in thil tampi suse thei hi (Jakob 3:5). Tuni chiang in thugenna ding in lei kia leng kizang nawnlou in khut zungte kizang nak mahmahta hi. Tua ahihmanin i lei kia leng hilou in i khut zungte zatdan ah leng i pilvang mahmah ding kisam hi. Jakob in a laikhak ah lei toh kisai zat dan ding leh pilvanna ding tampi gelh hi. I lei zatdan in i khalam dinmun gen kha mahmah hi. I lei zat dan in bang chibang Khristian I hi hiam chih leng langsak hi (Jak. 1:26). Hiai ziak mah in Jakob in ngaikhetu a pang zaw ding in Khristiante thuhilh hi.

PAUNAKTE LAIBU APAN

1. Paunakte 18:21a na ah "Sihna leh hinna lei thilhihtheihna ah a om" chi hi. Rom laikhak ah Paul in "Na kam a Jesu Toupa ahi chih na gup a, misi lak a kipan Pathian in a kaithou chih na lungtang a na gintak leh hotdam in na om ding. Min lungtang in a gingta ua, diktatna a mu uhi; kam in a gum ua, hotdamna leng a mu nak uh ahi," a chi hi (Rom. 10:9-10). Philipite ah leng "lei tengteng in Jesu Khrist, Pa Pathian thupina ding a Toupa ahi a chih theihna ding un" a chi hi (Phil. 2:11). Hiai in lei zatdan poimoh ahihdan hon hilhchian mahmah hi.
2. Paunakte 12:18 ah hiai bang in kigelh hi: "Namsau sut bang a pilvanglou tak a pau a om a: himahleh mi pil lei damna ahi." I kamsuakte in i ngaihtuahna khenlam ah thilhihthei ahih dan hiai apan muhtheih in om hi. Pilvanglou tak a paukhiak (or thugelh) in midangte ading a siatna tunthei ahihdan phawk ding ahi. Tulai khovel ah Freedom of Speech kichi ki-uang gen mahmah hi. Ut teng gen thei ding a phalna mu bang a kingaihsutna khovel a om I hi uhi. Huchihlai in Khristiante'n bel midangte ading a damna tuntu dingte I hi uhi. I kampau in mi khat a ding siatna tunthei ahihlam phawk mahmah ding ahi.
3. Paunakte 16:27 ah "Mi thulimlou in siatna a ngaihtuah: huan a muk ah meisa bang a om hi" chi hi. Jesu in lungtang a dimval kam in a gen zel chi in A gen hi. "Mi hoih in a goubawm hoih akipan thil hoihte a hon lakhia a, migilou in a goubawm hoihlou akipan thil hoihlou a hon lakhe zel hi" (Matt. 12:34-35). Hiai in i kamsuakte apan i khalam dinmun leh i miziate kilangsak ahihdan honhilh hi.

JAKOB LAIKHAK APAN

1. A hoihlou lam a lei zatna

(i) Khemna tuah chiang a Pathian mohsakna kampau zat kichi lei zatdan diklou ahi (Jak. 1:13-15). Pathian in kuamah khial ding in khem ngeilou a, mihingte eimah utna a hip leh pimang a a om chiang un khemna a tuak kihizaw hi.

(ii) Lepchiah tak a lei zat louh ding ahi. Lepchiah i chih hihna loupi ahi bang a kigenna ahi. Jakob 1:26 ah "Kuapeuh sabiak limsak hi a kigingta a, a lei veng hoihlou a, amah lungtang kikhem zaw mi sabiak dan bangmah ahi kei hi" chi hi. Jakob 3:11 ah leng "Tuikhuk khat in nak khat mah akipan in tui lim leh limlou a suaksak zel ahia?" chi hial hi.

(iii) Paukam a khentuam neihna leng lei zatdan diklou ahi. Jakob 2:1-4 ah milian leh mineu khentuamna gen a, kampau leh omdan tungtawn a mikhentuamna pen lei zatdan dik hilou hi. Jakob 3:5 ah ki-otsakna kampau kichi meikuang banga thil tampi kang sesak ahihdan gen hi. Kampau ziak in mimal khat-le-khat, innkuan, pawl khatpeuh sung leh saptuam sung tan ah buaina leh kituamkhenna tung thei hi.

(iv) Gensiatna leh midang tunga vaihawmna kichi leng lei zatdan diklou hi. Mi thilhih teng dem a gensia kichi Khristiante'n chiin louh ding hi (Jak. 4:12; 5:9). Rom-te 14:12-13 ah: “Huchi in, i vek un Pathian kiang ah eimah tanchin i gen chiat ding uhi. Huaiziak in, kigense nawn kei ni, kuapeuh in a unau lampi ah kisuihna hiam dalna hiam koihlouh tum zaw hen,” chi in gen hi.

2. A hoih lama lei zatna

(i) Pathian phatna ding a zat ding ahi. Jakob 3:9a ah, "Huai lei in Pa Pathian i phat ua," chi hi. I lei a Pathian phat a Jesu Pathian ahi chih i phuang ding ahi. Sam 148, 149 and 150 te bang i sim leh Pathian phat ding ahihdan Sam gelhtu in gen hi.

(ii) Pathian kiang a thumna ding a lei zat ding ahi. Pilna neihna ding a thum ding ahi (Jak. 1:5-6). Haksat hun a panpihna ngetna ding a thum ding ahi (Jak. 5:13-16). Damlouhna apan damna ding a thum ding ahi (Jak. 5:14-15). Ngetna tuamtuamte ngetna ding a Pathian kiang a thum ding ahi (Jak. 5:17-18). Nungtolhte a thohna ding ua thum ding ahi (Jak. 5:19-20).

(iii) Pathian laate sakna ding a lei zat ding ahi (Jak. 5:13). Ephesate laikhak ah leng Kha a dim mite'n Pathian phatna laate sa in leh khalam late sa in kihoupih chiat uhi chi hi (Eph. 5:18-20).

(iv) Mite kianga Pathian thu theihpihna nasep sepna ding a lei zat ding ahi. Jakob in a laikhakna ah chian tak in gen kei mahleh, a laikhak pumpi in agen nop ahihleh omdan leh kampau tungtawn a Jesu Khrist gingtu hihna lahkhiak ding chih ahi. Niteng in lei tungtawn a kampau leh khut zung tawntawn in thugelh tampi kinei hi. Hiai bang a i kampaute leh thu i gelhte'n Pathian thupina a puang kha dia’m chih ngaihtuah thak ding in I kingen hi.

Mahni pumpi kemtu muanhuai hiding a I kisak lai in i pumpi a taksa kahiang neuchik himahleh poimoh mahmah i lei zatdan kivel thak a, pumpi kemtu muanhuai hiding in TOUPA’N thugelh I tan chiat uah vual hon zawlsakta hen!