Zomite In Church Music I Nei Mah Hiam? I Zang Mah Hiam?

Church Music i cih ciangin Pasian i biakna ah tumging leh laa kizatzia genna ahi hi.

Philippine ah Church Music ka sin sungin, mite in Pasian a phatzia uh ahi zongin, Israelte in Pasian biak (music leh tumging) hong kipatzia ahi zongin, Martin Luther in Reformation hong patcil lai-in church music hong puahphatnate ka sin uh hi. Tuabek hilo in Classical Music, Western Church Music, Asian Church music leh Hymnology cihte zong kisin hi.

Ei adingin ci le’ng adiakin North-East India a kipan South East Asia khempeuh pen i nam (tribe) leh gamkuam (region) tawh kituakin Music leh Ngeina hoih taktak a neite hi cih kimu hi.

Ahi zongin a dahhuai mahmah pen ei Zomite in i Church Music bang hiam cih ka kan ciangin zuih mel kinei loin, TV ah i muh Western leh mikangte church music peuh kipibawl zaw hi. Hih ka gen ciangin mikangte a asia aci ka hikei a, zat loh ding a ci zong ka hikei hi. (Kei zong a zang mahmah pawl ka hi hi).

Ahi zongin ei Zomite pen ipu-ipa akipan tumging, laa leh Zo laa hoih taktak a neite in banghang tutan "ei aa" cih theih ding Church Music nei thei nailo i hiam? Mi aa teng puah saksak, amau lah bangzo takpi lo, ei a lah phawk khalo, zong theilo i himai hiam?

Indian music, Chinese music, Mexican, Reggae leh genre tuamtuamte i zaak ciangin a hong kipatna leh a zang mite kitheithei hi. Music leh tumging in minam represent hi cih a kitheihna zong hipah hi.

Ka Siate uh khat in, "Na laate uh khat hong sa in, na Church Music uh za ut ing," hong ci a, laa khat ka sa hi; a laa pen ei lakam hinapi, a style pen country ahihmanin, tua pen WESTERN hi hong cihsan hi. Tua hong cih ciangin a gammang (lost in the midst) ka hih lam ka kiphawk phing hi.

Hihte ka gen ciangin (Seminar/ tentan ah), mi pawlkhat dotna pen:

1. Kum 100 val bang suakta takin i zatsa a siatna om lawmlawm ding hiam?
2. Keyboard, Guitar leh Drum cihte i tumtheih pen khantohna hizaw lo hiam?
3. Bang hang i pupa ngeina ah kik ding i hiam, tuate dawi biakna leh zunek-sanekna a kizang hilo hiam? ci uh hi.

Ka dawnna:

1. Kum 100 val i zatsa Western music pen sialo hi. Ahi zongin kum 100 a picing khinsa Christian khat in a ngeina a kan ding kisamta cihna hizaw hi.

Seminar ka piakna khat ah Rev. Dr. Helen Singsit, FMPB General Secretary (North East Region) tawh ka kiho uh a, amah in, "Na thugen hoih mahmah hi, ahi zongin thu-um a suaktungte in bel makaih kisam, hilh kisam lua tua banah a ngeina uh pawlkhat dawi biakna tawh kizom tampi om mah hi. Tuate adingin a omsa Western style khawng a belh pen uh a bitna uh ahi hi. Ahi zongin ei kum 100 a picing khin sa in bel, midang a belhbelh kullo in Theology a kipan Church music pen i puahtheih hun hita hi," hong ci hi. Maan hi.

Pasian biakna pen copy-paste hinawn lo in, originality tawh ei sunga omsate pholhkhia a biaktheih i kisin hun hita hi. Midang aa i zat kawmkawm mah in, ei aa bang hiam cih kan ding mah hi. (A kisap zia saupi sut man ke’ng).

2. Keyboard, guitar, drum etc siam ding mah hi, leitung ah om I hihmanin tumging bek hilo in leitung in hong offer (piak) bangbang zattheih pahpah pen khantohna khat himah hi.

Ahi zongin i biakna lian ah Western te a i zattheih manin a khangto i kisak khakleh i ngaihsutna manlo ahi hi.

Hillsongs, Planetshakers,Gateway etc te biakdan a sia hilo napi amau hih dan i hihtheih ciangin BIAKNA cingtak (perfect worship) anei i kisak khak ding lauhuai hi. Amau zatzia pen Biblical pen hi hetlo napi in i zui uh a, a hoihpen bangin i sang uh hi.

Amau zong a tumgingte uh (KB, Guitar, Drum etc) secular adingin kibawl hinapi Pasian phatna dingin zangthei uh ahihleh, ei aa-te zong i Secular leh traditional music pen Biakna ah puaklut pen a siatna omlo hi cihna hizaw hi. Mite hong neihpih loh, mite in zong a zatdan a theihloh tumging leh laakaih hoih nono i nei uh hi.

3. I pupa ngeina i cih a sia tampi om mah hi, lungdamna thu tawh kikalh tampi a om hangin, a kikalh ahi hetlo i nutsiat tampi na om hi. (Sut mankei ni).

Sia Enno genna bangin, Jesu Khrist nangawn ngeina zui in hong piang hi. Judah ngeina mah hong zui a, lungdamna thu tawh kituaklo teng nial lel hi.

Israelte in tumging tawh Pasian biakna (Temple Worship) a neih pat uh i et leh Kumpi David hun nahi hi. Tuama teng bel amau zong tumging leh laamna cihte a zang ahih uh hangin, gualnopna, mangpha khakna, gaal sung ah tha laakna, zunek-sanekna cihte ah a zat uh ahi hi. (LST mun tampi ah kimu hi)

Tua bek zong hiloin, Israelte tumgingte a tamzaw Sumerian leh Egypt panin a laklutte uh a zang uh na hi hi. Tua tengteng Late (Ps.) 150 na ah Pasian in Amah biakna dingin zatphal hi cih kimu hi.

I pupa music - tumging leh laate zong secular hikha ding hi, ahi zongin a style leh genre pen Pasian phatna leh biakna dingin i zattheih pen i hihna "identity" lakkhia banah, "ei a mahmah" (originality) tawh Pasian biakna hong hizaw ding ahih manin tuate i zuun ding, puaklut dan i sin ding kisam hi.

(Hih ka gen ciangin kei i pupa music leh laate a theilo penpen ka hi hi. Minam leh leitung vai a pibawl nuam ka hi zenzen kei a - I Pasian biakzia ka et ciangin tuni tandong WESTERN COLONIZED kihi laizen cih va mukhia ka hih manin dahhuai ka sa hi. Migam ah ka om ciangin ka WORLDVIEW hong kikhek a, "ei aa" tawh Pasian phat ding hilua hi cih ka muhna pan ka gelh ahi hi).

- Pro. Pastor T.N. Muan Thang
Master in Church Music (Ministry Leadership)

20th October, 2020 | TN Muanthang Facebook Page