KHUA LEH VENG KEMTU MUANHUAI

2 Kro.19:5-7 - Huchi in khochih ah Juda gam kulh nei khua tengteng ah vaihawmmite a koih a, vaihawmmite kiang ah “Na thil hih uh hoihtak a ngaihtuah in hih un, mihing ading a vaihawm na hi kei ua, Toupa ading ahizaw ngal a; vaihawmna ah na kiang uah a tel zel ahi. Huaiziakin Toupa lau unla plvang takin hih un; Toupa i Pathian ah gitlouhna, khentuam neihna leh golh nekna a om kei” a chi hi.

THUPATNA:- Hiai thute Juda kumpi Jehoshaphat in Juda gam a kulhnei khua teng a vaihawmmi a koihte kiang a a gen ahi. Jehoshaphat tanchin leh a thilhihte lak a tamlou chik taklang masa leng hiai bang in: Jehoshaphat tuh Juda kumpi Asa tapa, a pa nung a kumpi a hong pang ahi. A pa Asa in kumpi a apan tung a ahih bangin Baal a be nuam kei a, a pu David tot lampi a tawn hi. Israel mite hih bang in ahihkei a, a pi leh pu te’ Pathian a zong a, a zuihzawk ziakin Toupa’n a gam a khut ah a hihkip hi. A lungsim Toupa lam ah a awn a, Juda gam akipan milim biakna mun sangte leh Asehrte a phiat mang vek hi. Huchi in Juda gam a mi tengteng in Jehoshaphat kipahman a hong pia ua, a hong hau in a thupi hiaihiai hi.

Juda kumpi Jehoshaphat in a’ gam, mi-le-sa, khua-le-tuite a kepdan leh etkoldan ettontak tampite lak a khen I ensuk ding :-

1. BITNA TOH KISAI: - Juda gam leh a pa Asa in a na lak Ephraim gam a khuate ah sepaih munpi a koih banah Juda gam a kulhnei khua teng ah sepaih a koih suakvek hi. Huaite tengteng banah Jerusalem ah sepaih hangsan ngen Juda innkuan apan Adnah in nuai thum (3 lakhs) a heu a, Jehohanan in nuai nih leh sing giat (2.8 lakhs) aheu a, Amasiah in nuai nih (2 lakhs) a heu hi. Benjamin innkuante’ mihat hangsan Eliada in thal leh lum zang mi nuai nih (2 lakhs) a heu hi. Abanah Jehozabad in galkap ding a mansiangsa nuai khat leh sing giat (1.8 lakhs) a heu hi. Hiai tengteng Juda gam kulhnei khua a kumpipa’n a koihte simlouh a kumpipa kiang a Jerusalem a om gigete ahi uh.

2. VAIHAWMMITE:- Juda gam a kulhnei khua teng ah vaihawmmite a koih a, hichi bang in a thu hilh hi: “Na thil hih uh hoihtak a ngaihtuah in hih un, mihing adi’a vaihawm na hikei ua, Toupa ading a hizaw ngal a; vaihawmna ah na kiang uah a tel zel hi. Huaiziakn Toupa lau unla pilvang tak in hih un, Toupa i Pathian ah GITLOUHNA, KHENTUAM NEIHNA leh GOLHNEKNATE a om kei” a chi hi.

3. SINSAKNA:- Vaihawm Kumpi milian ngate Benhail, Obadiah, Zekariah, Nathanael leh Mikaiah Juda gam khuate a mite sinsak ding in a sawlkhia a, Levi mite zong Toupa dan bu tawi a sinsakna pia ding in Juda gam tengteng ah a sawlkhia a, mite a sinsak uhi. Huchi’n Juda gam leh a kim gam tengteng a mite’n Toupa laudan a siam ua, kuamahin Jehoshaphat a dou ngam kei uhi.

HAUSA LEH VAIHAWM UPATE:- Khawsung ah vaihawmna sangpen leh thunei pen tuh hausa leh avai hawmpih upate ahi uh. Innmun, lougam, khua-le-tui kepna leh etkolna amau khut a kinga ahihman in mohpuakna sangtak a nei uhi. Thusia-lasia, khawkim-khawkiang toh kal gen ngaite, khosung              masawnna ding leh khantouhna ding amau khut ah kinga lian mahmah hi. Khawkhaitu, kemtu enkoltu ahimai uhi.

NUNGAK TANGVAL:- Hausa vaihawmte banah khosung bitna, sianthouna leh siatni-phatni, nopni-dahni a khosung enkoltu Nungak leh Tangvalte ahi nawn uhi. Amaute ziakin khosung galmuang leh bit a om banah tagah meithai panpihngaite, kepngaite, hausa toh pangkhawm in panpihna leh kepna a semkhawm uhi. Khosung a thil hoihlou, khotang suse thei, numei naupang patausak thei, khamtheih & kimawlna thanghuai om ding dal in hausate mah toh pangkhawm in khawsung kem uhi.

SIAMSINNA:- Tulai khovel ah michih in poimoh leh a lou thei lou a I koih uh tuh Siamsinna ahi, sangpi zil zou lou dingte leng laisim thei leh gelh thei bek hih ding chih ahi. Huai ding in Government in khua omna peuh ah siamsinna school hon koih uhi. Tulel dinmun ah Manipur singtang gam ah Solkar skul te muantak leh kingakna taak tamlou hi. Hiai in gamsung pumpi niamkiakna, nungtolhna hon tun in hindan kisiatna, sang a lianzawte zahna, nu leh pa zahtakna hong bei in Siamtu Pathian launa nei lou mi kisia kitam mahmah hi. Hiai tuh pukna tengteng lak apan a mulkimhuai, a chizat huai leh Pathian hehsakna, thangpaihsakna lianpi leh thuk mahmah ahi.

THUKHUPNA:- Awle, Tuni akipan in panla leng I bawl dam zou lai dia’m? Toupa hatna toh eilam panna dingte ah kuhkal tak a pang in kisa thak leng I chi hi. Amah, eite hon-it Pa, honhuai Pa, bangkim I hoihna ding a sem zel Pa in hon zohpih ngei ding chih I gingta hi. Nang na mun ah, kei ka mun ah; hatna leh hihtheihna honpiakte zang chiat in awle. TOUPA thupha!