COVID-19 HIIPI DOUNA: PANLAKNA LEH DOCTOR-TE’ THUGEN PAWLKHAT

Tukum March kha tan in, Lamka ah Covid-19 case gen/ muhkhiak a om naikei hi. Covid-19 bel tualsuak natna hilou, puaklut leh kilawhsawn natna ahi. Tua theikilkel in (Ccpur) district administration leh damtheihna lam a seem heutute’n, aneu-alian kiven banah I pilvan ngai ahi ci in na tangkou uh. March kha akipan houh doctor li leh nga in, Lamka khawpi leh asehvel veng tuamtuam ah: (a) A natna kilawhsawn baihsam dan, (b) Kiven a baihsamdan, (c) Kiven a poimawh dan, (d) Lamka a QC neih tegel in mi a dolhzawh tamlouh dan, (e) District Hospital (Lamka) a  mi ki-enkol thei zah cihte puangzak kawm in; Vengbing a kisakkholh a poimawh dan, kisakkholhna fumfe deuh apai keileh, den ci’a hihkhial thei i hihdan khawng gen in kal na suan keukeu uhi.

A tunga tawh kizawitawn in, May 2020 khabul lak in Lamka a seemtu medical doctor khat in, Spanish flu a kipan sin tuak (Lockdown khahkol hun a innlam manawhte’ bildawh dideuh) hici’n na gen: “1918-20 lak vel a Spanish Flu Pandemic huaisetak in mihing 50,000,000 vel ana that chih i simkhak dan ahi. Spanish flu wave 3 (outbreak 3 vei) pha a chi ua. Huaite laka huaisepen a wave 2na ahi a chi uh. Wave masa ziaka lockdown, quarantined te’n ninggawp. Lockdown khahkol honghih taka, mipi zalen kisa aphiat-a-phe sawsouh mai uh hih tuak. Huai hun a ana pilvan louh ziak ua, wave 2na {mipi bawl (?)} hongnun; mihing tampi'n sihlawh. Kannalou. Poi top. Kikhel.”

Tu October, 2020 khabul in Lamka akipan mah Sr Doctor khat in Covid-19 tungtang (tua hun a a omna Bangalore khawpi apan in) thugelh social media ah hon koihkhe leuleu. “Khanglouta mahmah ni…” cihna bangdeuh ahi.

1. I lauh louh luat ziak ua lauhuai ahi.
2. Khawlak, Bazar, Lamlian kiang, ATM booth, leh mipi kikhopna munte i et leh, mask ginomtak a bulh kitawm mahmah.
3. Tua banga Solkar in SOP a bawlte a ngaihsaklou leh lauloute, SUPERSPREADERS (hoihtaka hawmzaktu) a chihte uh hitou lellel ahi uh.
4. A lauloute ziak a vulnerable (ahatlou leh kaibaih) group (DM, Heart pt. HTN, kum 60 nuailam leh low immunity - natna douzawhna hatlou people group) a mite’n na sihloh thei uh chih phawktuak mahmah ka sa.
5. Ei lak ah leng diabetes nei bang kitam in, tuate ading banga pilvaan mahmah ngai ahi.
6. Genkholh theihlouh, a kum upat thu le hilou, a serious vanglak puk toptop mai omtham uh ahi.
7. I khensiam di’a hoih pen tuh, Symptoms neite hoihtak a treatment piak ngai. Symptom neiloute lah hospital a le huchi lawmlawm a amau primary illness deny zeen a Covid Care Centre (CCC) a pawng thunlut kuul lou...
8. Symptom neite (fever, cough, breathlessness) a lauhhuai diakna bel, midang lohsawn baih uh; treatment pat pah ahihkei leh D-dimer value ana saangte bang blood clot kipan a theihlouh kaal a puk phut a simai thei uh ahihna ah, houtak a I lak khak ding lauhhuai lua hi.
9. Tulel in Bangalore ah ka omlel a, khawlak pawt, gari a tai, tu, ni 10 ka omsung un, kuamah mask haplou (bun lou) ka mu kha nai kei.... Khutdawh, Lamlian zul a tusa a kivial tholhtholhte na-ngawn in mask hap chiat uh ei....
10. Last point ah, Doctor-te hi’n akua-akua hitaleh, (Covid) positive number a phatuamngai om tha-hah lou, kuamah positive omnawn mahmah keileh chih ki-ut lua; tua ziak a panlak theih bang a kila, theihtawp kisuah chiat ahi chih... reasonable leaders te chiang beek in theisiam di’n ka ging hi. Take care, stay safe!

Tu Sintawpni (October 16) in Lamka Sr Doctor khat in hibang in hon-gelhta hi: Tulai in Covid huihpi in honnuai a, niteng in Positive I kibehlap den a, I kilawhtuah vengvung uh. Covid vei, isolation ward ah damlou gim taktak I kem ua, Higher centre a refer tuak lua himahle uh lupna awng omlouh ziak in, Lamka damdawi-inn ah a lumtop mai uhi. Hospital a ki-ensak di’a hong hawh tampi a positive-ta ua, damlou kem di’a hongkuan nasan positive bangzahhiam a omta. Huaiziakin, Hospital naih sese lou in, innmun a kipan doctor siam taktak toh video in na kirawn thei; link kipia-a hih didan kigen zui in  https://esanjeevaniopd.in/

A tunga I gensuk daudaute, damtheihna lam a hahtakpi a na pang toutou seemtute leh mipi-vantangte pangkhawm I hi, kimawhsa di omlou I hi, cih taklang kawma kitheituah seem a, hehpihna mit a ki-et uh poimawh lua sak ziak a hon kigelh ahi. Hiai tawh simkhawm di’a hoih, tutung DEW issue ah heutute Pa Dong Kolson (Covid-19 veikha, damsuah) in amah hinkhua thiltuah apan a gelhkhiak leh Rev Mangthianlal (CEO, Glocal Volunteers) in Lamka leh asehvel en vengveng kawma a thugelhte tuansak ahi. Tuate sim ciat in, ciamteh tuakte ciamteh in, piaksawn di’a kilawmte innsak-innkhang, imi-isate lak ah pekhe ni maw. I gam zong TOUPA’N  ahon it lai. Obedience is the very best way to show that you believe (in Christ). In Christ alone our hope is found. Ama’n hon damsak ut ahi, Amah angsung beel ni hang. Jehovah Rafa!