Khovel pumpi buaipih natna lauhuai Covid-19 toh kisai tuchiang in lockdown khawng awl-awl a hong bei aleh akoi-akoi ah poimohngaih louhna leh pilvan louhna uang deuhdeuh adia’m chih in om hi. Niteng khosakna leh nasepna awl-awl a Solkar in hon patpih nawn ziak a hiai natna lauhuai na bei ding hi mawk lou, a gu kibang, a damdawi le om nailou, om ding hia chih le kithei nailou himaimah hi.
Thil himhim I tuah ma in kilau lou a, kipoimohngaih lou a, kihou bawl sek mah ahi. Mihing ngeina ahi. I kimohsa kei. Himahleh, I ngaihsak louh ziak, i poimoh ngaihlouh ziak a hiai natna in hon ban lou ding I sak khak ding lauhuai ka sak luat man in, Covid -19 toh kisai a ka na tuah khak personal experience k’on share ut hi.
“Covid-19 ana positive khate dam khe pahpah” I chi maithei; “Treatment ngailou a inn a ki-enkol a damkhe thou” I chi maithei. Symptom thupi omloute ading in Covid-19 I chih simmohhuai maithei.
Kei kha midam thei thou a kikoih ka hi. Natna tuamtuam neisa hilou a hospital bang ale ki-admit kha nailou himhim ka hi. Covid-19 bang le huaiziak mah tak a ana lau lolou, office leh koikoi hiam ale ana serious taktak lou kihisim. A Upa lamte, damtheilou deuhte bang awlmoh chidan a om, (kei pen) Covid-19 in hon bun di’a ana koih lou ka hi.
Nisim July 19, 2020 zingkal apan Khosik hong kipan hi. Khosik maimai leh Dengue case khong ahi ding chi in ka ki-test sak pah kei hi. Hilele Luna leh Taksa gim demdum a k’on omtak in ka lawmnu lemgelna toh July 21 ni in a sepna hospital uah test ka vabawl uhi. Huai ah Oxygen poimoh chi in oxygen honna bulh pah uhi. Kei lah huchi lawmlawm a serious a kikoih lou.
A zing 22 ni in a result hong suak a ka positive petmah hi. Hilele vangpha ka hi hia vangsia ka hizaw hia, ka thuak ding haksa teng, ka positive ma in ka na thuak khinsim hi.
A kal laklak a luna (headache) hong om. Na vilvel. Chi na (body ache) in hon zui. Gimhuai himai. Thoh khiak di bang le lit huai ngoihngoih. Naupang thou lai kihi, ki-fit thou ale kithei, hiai Covid-19 in hon khoih taktak zaw akizoi zot mai. Dengue bang le ka na veikha sam a, hilele tutung a hon khoihdan a gimhuai diak in ka thei.
Innkuante toh omkhawm lou a room a kikhum. Eilah kitang zoulou. Sungte loh ding lah lauhuai. A buai huai khopmai. Pathian panpihna in sungte bel asymptomatic /immune uh ahingei di’a, bang achi hial kei uh.
Chih bang in, July 19 apan 24 kikal chu thuak ek petmah himai. Duhlou pipi a Ann ne, Tuidawn, khosik zek aleh damdawi ne, huai himai. Adang hih didan omtuan lou.
Negative zoh a khuh hong kipan san. Khaksuah khawng om a I khuh reprep aleh adan om. Tutung a chu gawl (throat) hul helhul a khuh theuhtheuh bang zaw nak gimhuai lua ahi.
A tung a ka gen bang in, sungte ban ah, naute bang Pathian ompih na in Covid-19 a thuak kha kei ua, hamphathuai ka sa mahmah. Ei piching khat in haksa I sak amau ading in bang chituk in a haksa di’a chih khawng ngaihtuah mai inle a haksa. Huai bang mah in a Upa lam, teksia leh Pi-le-Pu te bang in a vei khak ding uh ngaihngamhuai lou hi.
Ni 25 sung vel a Kg 5 bang kimansuah zou mawk eive. Hon thazoh mahmah dan ahi.
Hiai atung ate kha Covid -19 ana positive kha, symptom nei kha leh negative ta te tuah tangpi hi di. Hiai pen ka gen utpen hilou.
Ka gen ut pen hiai ahi.
Covid -19 ka negative nung kha nih paita. Ann le duh dandan a neta. Office bang le regular tak a kaita. Hilele pre-Covid leh post-Covid kha ana kibang hetlou. Tu khawng a na semzek ahihkei aleh thilgik zek ka dom aleh le ka nak kin pah. Gim pah demdum. Nak bang le diklou pah pah hile kilawm a ki-om demdum , ki-om hemhuam pahpah mawk ahi.
Hulaak (Breathing) toh kisai normal thei nawn taktak nailou hi. Kinepna, ahun zil a hong normal inteh chih himai. Awm lak khong X-ray bang le kila, normal vek thou zel.
Damthei na kisa maithei, Covid-19 positive tele dam kha pahpah uh na chimai thei. Ana huchi vek khollou dan ahi.
A damdawi omlou, om nailou, om di hia chih le theih louh. Covid-19 negative nung a taksa hiang tuamtuamte bangchi tuk a khoih kha ahi chih le kithei chian taktak nailou.
Ka lawmnu Covid -19 ICU a duty sek. A thuak taktakte hon gen chiang banga zaw ngaihtuahna bang le ana gim zou ahi. Hiai dan pen eilak a om lou ding chihna om hetlou ahi.
Kiven kan omlou ahi.
Na omna mun peuh ah Mask hoihtak in zang teitei in. Sanitiser le hoih zat inla, khut silsiang leh mipi om khawmna khawng a poimoh ahihkei aleh avoid teitei ding ahi. Pilvan kan omlou. A damdawi omlou hilele kiven pen a damdawi hoih pen leh omsun hiphot. Aban chu Pathian khut ah.
NOTE: Thugelh honpetu in Union Bank of India a kum 10 seemta, tulai Chandni Chowk Branch ah Branch Head hihna letsak in om; a ji leh tate tawh Bersalai ah khawsa lel uhi.
