1. Gingtute koipeuh ah omta leng gingtu midangte toh kithuahkhawm leh kipumkhat a om di’a sinsak I hi uhi. Huai mah tuh Jesu’n a sih ding kuan tanpha a, Pa Pathian kianga ana nget ahi (John 17:20-23). Hiai gingtute kithuah khawm (fellowship) tuh saptuam ahi. Huaiziakin, saptuam kipumkhatna (unity) kepbit ding leh huai mah lunggulh pen a nei gige dingin ei gingtu mimalmalte sinsak I hih dan uh (Ephesa 4:3) ah kichiantakin gelh ahi. Laisiangthou Thukhunthak ah hiai saptuam kipumkhatna leh khat-le-khat kala kitanauna chidam apoimoh dan muntam takah kigen hi. Laisiangthou suut mite’n Thukhunthak ah vangam leh gawtmun sangin gingtute kipumkhatna a kigen tamzaw chi uhi. Khovel a Pathian in A it pen tuh A Saptuamte ahia, kipumkhat a om ding Jesu’n ahong ngetsakna ahi. Hiai bang ahihmanin, saptuam kipumkhatna hihsetu leh kikhenna bawltu hihkhak ding lauhuai mahmah hi. Huan, Laisiangthou a I muh bangin, kikhenna leh kideidanna piangsak thei saptuam pawlam apan hilou in asung apan mah hikha nak hi. Ka omdan, gamtat, kampau leh attitude in Pathian saptuamte laka kikhenna leh kideidanna atun kha ding chih ei gingtu mimal kiveel gige poimoh hi. Saptuam a chidam louh chiangin, Pathian toh kal sia a, tua in khotang (society) ah siatna tun hi. Saptuam hat leh masawn I kisak lailai inleng a chidam leh kipumkhat loupi hihkhak theih ahi. Hiaibangte ziaka nam, gam leh khotang in siatna tuak kihi khathei hi. Gingtu (Khristian) kichi ngen lah I hi ngal ua! Pilvang chiat ni hang.
2. Mi tengtengin kibatlouhna leh chituamna (mihindan, deihdan leh pianken etc) kinei chiat hi. Hiai mihing a kibatlouhnate kia, midangte chinlahna leh hatlouhnate khawng gennop leh muhtheih penin kinei khanak hi. Hiai in, kithutuahna leh kipumkhatna sangin kideidanna leh kikhentuamna tun khanak zaw hi. Ginna, lametna, Pathian itna leh zahngaihna, hotdamna etc. Laisiangthou in hon sinsak bangin Pathian apan I tankhawmte ngaihtuah leh et a nei in huaite mah piibawl thei zaw lehang chidamna tun ding hi (Eph 4:4, Rom 14:19). Mihin zia a kibatlouhna I neihte zaw ei teel (choose) hilou in Pathian in ei adi’a hon telsak ahihmanin, kikhenna ding ahi kei a, a manphatna leh kilawmna theihsiam sawm zawk ding ahi. Pathian in kibangkim (uniform) vek ding hondeih hileh tuabangin honbawl lel ding hi. Huai sang ing, kipumkhatna (unity) adeihdan hizaw hi. God wants unity, not uniformity. Hiaiziakin, kibatlouhna, midangte omdan leh hihdan khawng gengen lou a; itna, kilainatna, kiniamkhiakna leh khat-le-khat kitungding tuah dinga sinsakte hihang (Gal 6:6).
3. Thil tengteng ei thuneihna ahihlouh ziakin lamet banga hong omlouh hun om thei hi. Hiai bang huna ei hoihsak dan leh lunggulh dan vuak chih tentun sawmna in kipumkhatna susethei hi. Lamet leh hoihsak dana hong omlouh huna leng Pathian saptuam sunga unau I hihna mangngilh louha, ki-ittuah leh pomsiam a, ahoihzaw dinga kipanpihtuah poimoh hi. Innsung a tate deih hongbat louh huna it teitei a ngaih bangin hiai bang hunin gingtute leng khat-le-khat ki-it tuah teitei poimoh hi. Mahni hoihsakdan kia lunggulh, ahi bangbang hong omte soiselsel kichipen pichinlouhna ahi. Huchimah bangin ahibangbang pomveka ahoihzaw ding lunggulh leh tup tuanlouh leng khanna ding hondaltu hithei hi. Thil ahong piang bangbang kipahpih siama ahoih zaw dinga bawl sawmna tuh pichinna ahi zaw hi. Amah Rev Vungminthang in, “Leadership chinna tuh ahoihlou akipana ahoihzaw bawlkhiak theih ahi” ana chi hi. Laisiangthou in itna ziaka midangte hihkhelhna leng ngaidam thei dingin hon sinsak hi (Eph 4:2).
4. Saptuam ah hi'n pawl khatpeuh hitaleh, lungkimlouhna muh ding tampi om hi. Hiai lungkimlouhna leh phunna ding awm taktak, tampi om thei gige mah hi. Bangziak hiam I chih leh kuamah bukim omlou hi. Ahitaka gen in Pathian saptuam hi, mikhial leh achinglou, zahngaihna leh ngaihdamna kiphamoh ngen kigawmkhawmna ahi. Saptuam kipumkhatna leh chidamna dingin hiai theihsiam leh lungsima vom gige poimoh. Mikhial leh bukimlou ngen akihihmanin, utmawng bang, ahihkeileh theihlouh ziak bangin khat-le-khat kihihnat leh khasiat khak theih gige ana hi. Himahleh hiaite ziaka lungkia a saptuam nuaksan mawk di hilou hi. Hiai bang huna taise mailou a, kihasottuah tuh kithuah-khawmna hoihzaw neih theihna ding lampi ahizaw hi. Groucho Marx in, “If a church is perfect to satisfy you, that same perfection will exclude you from membership, because you are not perfect” ana chi hi. Kuamah bukim omlou hi. Bonhoffer in “He who loves his dream of community more than the Christian community itself becomes a destroyer of the latter” ana chi hi. Midangte chinlahna kia mu a, huaiziaka vuina leh phunna neih det khak ding laihuai hi mahmah hi.
5. Phunchiakna leh soiselna tawpsanin: Midangte soisel sangin ahanthawntu hih ding tel zawk ding ahi. (Math 5:9 & James 5:9; Roman 14:4, 10). Midangte soiselna in Pathian toh kitanauna asukkhak banah, ei a kisaktheihna leh kimuanlahna om ahihdan taklang in, midangte vaihawmsak kisuak hi. Huaiziakin, eite I kisum/ kidek mahmah uh kul hi. Khatveivei community leh society sungah leng hiai chindan a tamluat ziaka chidam lou I hi de aw hon chisak hi. Thil tenga muanglah leh critical khakvek di hilou ahi.
6. Midangte thu a kikumlou ding: Midang toh kisai gensiatna leh minsiat theihna thu kigen himhim a pan louh tuh saptuam chidamna di’a poimoh mahmah ahi. Midang tanchin, ei toh kisai khakna om hetlou khawng buaipih a gen leh gensawntu a Khristian mimalte panlouh ding ahi. Paul in Timothy kiangah tua bang chindan apan kihem siangthou ding in ana thuhilh hi (2 Tim 2:16). Huai kia leng hilou, tuabang thute midangin hon gen khak leh leng kuplouha kihep mangsan ding ahi. Khatvei saptuam sunga committee meeting lai in, member khatin saptuam member midang khat toh kisai hon gen kha hi. Tua hun lai a chairman in aw neem takin “Midangte va limit ding hilou ahi” hon chia, dik ka sa mahmah hi. Midang gensiatna na kianga hon gentu in nang toh kisai leng midang kianga gen ding ahi chih haihlouh ding ahi. Hiai bang chindanin saptuam chidamna hihsia in, kikhentuamna tunthei hi. Pilvang chiat ni hang. Hiaibang mite lauhhuai ahihdan uh Paulin Galatia 5:15 ah nou leh nou kihih sia gawp leh kinegai lou dingin pilvang un ana chi hi. Saptuam kipumkhatna susetu apolam apan hilou in asunga mite mah hikha naknak hi. Proverb 26:20 ah, “Fire goes out for lack of fuel, and tension disappear when gossips stops” chih I mu hi.
Khovel a Pathian in a itpen tuh A sisana a leisa saptuamte ahi. Huan, Pa leh Tapa pumkhat ahihbanga, saptuamte pumkhat, kithutuaka om ding Jesu’ thumna ahi. Hiai Pathian saptuamte kipumkhatna Kemtu muanhuai hiding in Pathian in hon ompihta hen!
….
Note: Editorial gelhtu (Upa Ngulminthang) in tulel in EBCC Delhi ah Vice-Chairman leh Chairman, Building & Property Maintenance Sub-Committee hihna lenkop lel hi. Thugelh manpha lua, sim in nuntakpih sawm tek ni.
