Vanglian Pathian in hon veng a, covid-19 hiipi leng lak ah, sihna limguam tawn a pai bang in kithei mah lehang, 'Na khetbuk leh na chiang in hon khamuan zel hi' chi thei a hon koih man in hampha kisa in Amin i phat ahi. Tua pen mihing khat pepeuh in a chih theih himawk lou a, 'Toupa tuh hon chingpa ahi' chite chauh in a chih theih uh ahi hi.
I biak Pathian pen ei mihingte bang a taksa leh hun in a thunun hilou ahihman in, mun teng ah om hi. Hun khat ah mihing khat mun khat ah om thei lel hi. Pathian bel huchi bang a kigak ahih louh ziak in mun teng ah om a, tua ziak in hun kibang ah leng mun teng ah houpih bat in om a, koimun peuh leh bang hun peuh ah leng huhna leh venbitna kisamte a ding in 'mangbat lai a huh pahpah pa nai gige ahi' hi. English NIV ah 'an ever-present help in trouble' chi a, 'nai gige' chih sang mah a leng 'om gige' ahi chizaw bang hi.
Hipi leng ziak in March 15 a biakna kikhop kinei pen a nanung pen a suak hi. Bangtan hiam biakinn i khak bibek nung in, July 12 apan in mimal kipumpiakna hun zat theih ding, Nehemia Thum Pawl leh dept tuamtuam vai a zat theih di’n i hong thei nawnta hi.
Sept 30, 2020 a solkar thusuak dungzui in, innsung khat a mipi ta-thei zah kim khat ahihhang a 200 sang a tamzo lou paikhawm ding phal ahita hi. Tua pansan in, ei biakinn ah mipi 100 valzek khawng paikhawm a bekhawm thei ding in kilamen hi.
Biakinn a paikhawm a biakkhawmna neih nawn a lunggulhhuai mahmah lai in, ni dang bang a i vek ua va paikhawm pen hithei nai lou suak hi. Tua ziak in mipi bangzahhiam paikhawm a biakna nei ding, apai khawm ding kuate chih pen a banban a kisehthoh ding in i ngim hi.
Tua toh kiton in, mahni omna mun pansan a biakkhawmna a I tel vek theihna ding in livestream khah ding kisawm a, vanzat poimoh bangzah hiam leng kilei khinta hi. Livestream thei ding a siamna nei leh tua tungtawn a Pathian gam nasepna a kizang ding a kipumpiak media team te ziak in Pathian min phat in om hen!
Jerusalem sese lou, Samaria gam a tang (mountain) te sese lou a biak theih Pathian, mahni lemtan hunhun leh lemtanna munmun a biak theih ahihman in thupina i pia hi. Tua mah biaktak ahihna kilangsaktu khat ahi pah hi.
Temple a vahoh a vabiak ngai sese lou ding in eite mahmah 'Pathian hing temple' a hon suah a, hampha i kisa hi.
Thukhunlui hun lai in temple pen Pathian biakna ding in zang tangpi mah le uh, Laisiangthou bang ana mansuah hilhialna mun uh ahi (2 Khr 34: 8 – 18). Kumpi giloute’n vai a hawm chiang un Pathian hing temple pen thil hilou hihna mun a suak thei zel hi. Israelte’ melma Tobia bang in temple sung a pindan liantak ana luah thethup hi (Neh13: 4-6).
Tuamah bang in, ei sapum temple leng Pathian deihna bang a zat hun om mah leh a deih louh bang sep leh ngaihtuahna ding a leng zatkhak nak ahi hi.
Man a leisa hihna phawk a kem siangthou ding leh sapum temple pansan a biakna leh pahtawina suahkhe zom zel ding in Toupa’n tu kha thak Oct 2020 sung hon makaih hen aw!
