Korin Masa 10: 31 “Tua ahih manin kei mah in ka hong gen nop thu in: Na hihna khempeuh uh, nekna dawnna ah ahi zongin Pasian’ minthanna dingin na hih un.”
Leitung mi khempeuh in Khrist hang in suahtakna / zalenna kinei ciat hi. I nuntakpih leh nuntakpih louh thu ah hong kinga hipen mai hi. Lai Siangthou in leitung i damsung a khensatna i bawl ding khempeuh hong gen ciatciat tase kei mahleh, a hong gentel mahmah thu khat bel, Khrist ukna sung ah nuntak thakna hangin omzia neitak a nuntak ding kiteltak in hong hilhcian hi. Tua ahihmanin abuaihuai leh ahaksa thu khensatna i tuah ciangin, Pasian’ minthanna ding a i nuntak theihna dingin ngaihtuah kawm ding leh zuih ding a akisam thu pawlkhat enkhawm ni.
I nisim nuntakna ah Khrist i kumpipa ahihna theihgige kisam hi (Korin Masa 6: 12) “Kei zong ka ut khempeuh ka hih theih hangin tua bang gamtatna khat peuhpeuh’ sila ka suak nuam kei hi.” Hih lai a kammal kizang ‘Sila’ cih in gen ut thupitak nei hi. Paul in a gen ut thupi pen ahih leh na khempeuh ka hihtheih hang in, ka hih theih khempeuh sila ka hi nuam kei hi, ci hi. Banghiam i cih leh Khrist bek a Kumpipa ahihna a telcian man leh Pasian’ minthanna hi lo peuh mah sepsawm lo ahih na hang ahi hi. Tua ahihman in Khrist cih louh buang kuamah Sila kihih sak sawm lou hi. Tu ni in Pasian’ minthanna ding a nuntakna zang nuam i hih leh i Tou/ Kumpipa pen Khrist bek ahih ding cihna ahi hi. Khrist tawh hong kigam lasak thei ding khempeuh pan in, pilvang takin i nisim nuntakna zang ni.
I khalam nuntakna a phattuamna hong pia ding nate bek mah sem ni (Korin Masa 10: 23)
Hi lai mun a Sawltak Paul thugen pen limtak ngaihsun lehang, tuhun a ei Khristiante adingin a thupi leh akisam pha mahmah diak thu ahi hi. “Na khempeh hih theihna ding thu a om hangin a kihih theih khempeuh hihna in midangte hoihna ding piangsak lou hi.” Korin khua a Khrist hang a suahtakna a ngah pawl khat in, amau kha lam, taksa lam ading leh midangte ading a ahoih ding ngaihsutna nei lou in gamtatna tawh nuntakna zang uh hi. Tua bangin nuntakna azang mite Paul in thuhilh hi. Khalam a hatna leh phatuamna hong pia lou peuhmah sepna leh hihna in phattuamna nei lou ahihdan gen hi. Tua ahihmanin ei Khrist nungzuite’n, i mimal nuntakna ah naa khatpeuh i sepna leh hihna ding khempeuh, Pasian minthanna ding ahi na hiam cih pen I kidot kikkik ding kisam hi. Pasian’ minthanna ding lou peuhmah sep leh hih louh ding kisam hi. Tua bang nuntakna i zat ciangin i suahtakna pen Pasian’ minthana hong hithei ding hi.
Pasian’ minthanna hiding a siam i hi
Isaiah 43:7 “Kei ma piansak ka bawlsa, keima minthanna dinga ka piansak keima min tawh a kiloute khempeuh ahi...” Mihingte Pasian in a hong siamna san pen, Ama minthanna hih ding ahi hi. Tua hang mahin Ama’ lim leh mel pua in hongsiam ahi hi. Paul in kitel takin hilhciatna hongbawl hi (Korin masa 10: 31) “…Na hihna khempeuh uh, nekna dawnna ah ahi zongin Pasian’ minthanna ding in na hih un.” Hih lai ah Pasian bia ding i hihna leh tangtawn a Amah phat den ding i hihna hong kitel mahmah hi.
Korin nihna 5:9 “Tua ahihmanin hih lai inn-ah a ki-om ahi zongin thu dang khempeuh sangin Toupa Lungdamsak ding ngaihsutpi-in a kinei ahi hi.” Hilai mun ah hilhciatna poimawh tak leh kisam mahmah i muthei hi. Pasian’ minthanna i hih ding i lunggulh, i ngaihsutpi leh i lungdamna thupi pen ahihna ding nakpi takin kisam mahmah hi. Tuni in Khrist nungzui i hihna ah, Ama’ minthanna ding sang a thupi zaw bangmah om lou ahih zong i tel ding poimawh hi. Ama’ deih bangin thukhenna i neih ciang in a minthanna kihi ding hi.
Tua ahihmanin sanggam, Khrist nungzui i hihna ah, Khrist hang a suahtakna i neihte ei ut bang leh deihna bang bek in a zang den lai i hihiam? Ahihkei leh Khrist deihna bang, a thupi pen leh hoih pen ahihna tel cian lou a nuntakna zangden lai i hi hiam cih limtak kingaihsun dih ni. Hih thute i telcet masak a i zuih kei leh bangzahta in hanciamna i nei phialta zong in Pasian thupina kihi ngei lou ding hi.
Pasian in i omna mun tek ah i suahtakna uh Ama’ minthanna dingin azang thei ciat ding in thupha hong pia kimta hen!
…
NOTE: Thugelh hon petu (Tg Gou Khan Khual), Bethel Veng, New Lamka akipan Pa Gin Suan Kap’ tapa ahi. Khual in Global School of Counselling, Bengaluru apan March 12, 2017 in M.Sc./ Master of Science in Counselling Psychology (Integration Study) na zoukhia;tu in Counsellor, Project Rescue Suraksha Home, New Delhi ah seem lel hi. A tung ah lungdam hang.
