Na kam thil hoih in a taisak a; huchi in na valnouna muvanlai bang a siamthak in a om nawn hi (Sam 103:5)
Muvanlai toh kisai thumal Isai laibu sung vuak ah zong 35 vei bang kigelh hi. Muvanlai a kigenna peuhpeuh ah a hoihlam, a thahatna lam, a kin-ganna, a mit chimna chihte leh atuamtuam etsakna in kizang sek hi. A leng thei ganhingte lak ah sawt dam pen pawl a chiamteh ahih bang mah in kum 68-70 tan bang dam kichi hi. Himahleh a teek theilou, a vuai theilou hilou in, a tek hun leh a vuai hun chiang a bangzahvei hiam kipuah thak thei, tha la-nawn thei chihdan ahizaw hi.
A hong hat louh a, tek di bang a hong om chiang in Mualsang mahmah tung bang, kawlsang tak tung bang ah tuang in tawlnga hithiat hi. Nna dang sem hetlou in jingsang nisuah tung apan khah (tatsat) hetlou in ni a tum tan en nilouh hi. Tua bang a jingsang nisuah tung apan a tum tan dong a etzoh man in nizung tungtawn in a tha hatna awl-awl in hong dimkik hi. Tha lui, a hat nawn lou pen tha thak liklek ahat mahmah tuailai tha toh kibang in khek thei kichi hi. Hiai hun laitak bel a haksa mahmah hun leh a hehpihhuai mahmah laitak hi in, amul teng pulhkhia, thahatna teng bei ahihman in a kiang chin a vasa leh lungnoute na-ngawn delh zou lou, ne zou lou a, a tutna mun ngeimah a tutu lel hidan ahi. Himahleh hichibang a omna pan hong hat hiaihiai nawn in tuailai tha hon pukik ahihman in a nek ngei, a zon ngei bang in an zong leh bu tom (kaikhawm) in nasem nawn thei hi. Hichibang a a tek kuan chia ahih theih zel man in Muvanlai pen mihingte dam tantan a dam zou, a nungta thei a suak hi.
Eite zong i leitung khovel nuntakna sung ah dahna-kahnate, lungkham-mangbatnate, natna-satna, hipite, taksap lungzinna leh simmoh engbawlna huihpite’n honnuai a, lamet na himhim om lou thil hoih himhim hongtung ding om nawn lou bang a kingaihna vuahpite i thuak laitak om thei hi. Hiaite ziak a i neih ngei kipahna, lungnopna, chidamna leh thahatna bei a i om laitak mual tung toh akibang mun sim tham, kuamah hon sukbuai louhna mun ah Toupa kiang lam nga in thumna toh tha la leng i neih ngei thahatna, lungnopna leh kipahnate hongdim nawn ngeingei ding hi.
Tuabang hilou a, i dah i kahnate, lunglelh, lungkiaknate, dam louh zawngkhalnate, simmoh engbawla omnate, leh lungkham-mangbatnate tengteng vantung lam nga a Pathian kiang apan tha la lou a, lei lam nga a tha I lak sawm leh Toupa Pathian apan tha hilou ding hi. Mi tampite’n leitung lam pan thalak sawm in zu-le-sa toh kihehnepna zong kha sek uhi. Nizung apan muvanlai in thahatna lamdang tak a neihkik bang in Toupa bel in amah kiang ah tai leng hehnem siampa, panpihtu muanhuai, itna leh lainatna toh hongkem nuam tawntung, i zawngkhalna tengteng hontheipa Amah hi.
Muvanlai tanchin tamlou gen beh lai le’ng. A mit hat mahmah, chim mahmah in, khawmial mahmah lak na-ngawn ah vasa nou leh zusanoute mu thei. Gamla mahmah mel 5 a om vakhu chiang takin muthei kichi hi. Eite bel i khut a i tawi phimbil vang a khau khum haksa sa mahmahte I hi uhi. Tuaban ah Muvanlai in bu a tom chiang in singkung a sang mahmah dawn ah, singkang khutpi chia apan a neu mahmah bizang dong in tom hi. Tuate banah bilpimulte a lum theithei ding leh a bit theithei ding in bawl hi. Khangluite’n thau in kap le’ng let zou lou chi uhi. A’ nou a hong keuh chiang in gul man in a tate/ noute toh kisual saksak a, a tate’n a zoh louh ding chiang in huh in tuksak zel in, tua bang in kisinsak hi. Gul in a tuk khak leh nahtangtui dawn leh a gu bei ahihman in nahtang kung ah amuk phut in a tui dawn zel a damsak pahpah lel kichi hi.
A tate sinsakna toh kisai in a honglet deuh chiang un a kha tung ah pua in lenpih a, sangpi apan khia in lei a tuk ma un a kha doh in na man zel hi, a hong let dan toh kituak in a kha ah tuang sak nawn lou in a khe a man in sangpi apan khe suk in boh zel, khe zel chih bang in khel bawl mah toh kibang in sinsak hi. Hichidan a ahih pen a noute a it louhman leh a hehpih louhman hilou in, a sekdouna ding, a tha hatna ding, a thuakzohna ding uh a deih man a sinsakna a piak hizaw hi.
Tuamah bang in Pathian in zong, A’ tate i tha hat theihna ding, i thuakzohna ding, i sekdouna ding leh Amah i muan semsemna ding deih a hon sinsak ahi. Paul in “Zawn dan ka siam, hauh dan leng ka siam, thil chih leh thil tengteng a gilvah leh gilkial a om theihna leh niang leh tasam a om theihna thuguk ka thei kheta. A hon hih hatpa Khrist ah thil tengteng ka hih thei” (Phil.4:12-13). Simtute, sawltak Paul banga Khrist a kihihhat thei zel di’n TOUPA’N thupha hongpe tekta hen!
