Personal Background :
Keimah hoihna, chitman leh felman hilou kei in Pathian Lalgam nna ginum deuh a ana tong ka pa Rev. B. Chinlal leh ka nu ittah (L) Chingkhovung ta 4 lah ah aneupen in Thanlon khua ah ka na piang hi. Hun leh nite hung paitou zel in, tahsa thil a skul te bang ka hung kaitou hi. Neh-leh-tah chu a kingawl louh vangin deih leh poimoh teng chu ahuntah ah deih bangin kining chingtah a kineih veh zou louh vangin Pathian in ahung malsawmnate a lungkim dan kizilin, mite neih bang nei zoulou a zong lungkim dan kizil tou zel in, Pathian hezing innkuan lah a ka hung khosatou hi. Pathian in damnate hung petou zel in hun-leh-nite hung paitou zel in Pathian natohna ziahin ka pa khua tuamtuam a a umna munte ah ka na zui zel hi. A nopna atam zing lai in a khua atuam dungzui a ki-adjust na diing jong a um tou zing hi. Skul kaina lam hileh ka pa a kisuanna khuate ah ka zuih lehleh ziahin B.A. ka zilna tan ah Skul 10 tah ah bang ka na kaikha hi. A langkhat ah chu mi heet (mi theih) a kihau mahmah mei hi. Bible zilna lam ah Master of Biblical Studies (MBS), Evangelical Theological Seminary (ETS) Hosur, Tamil Nadu leh secular education lam ah BA (English Hons) DM College of Arts, Imphal ah ka na zou hi.
Ka Pianthah Dan :
Khua tuamtuam a Pathian nna tong a ka pai lehleh lai un, Singngat a ka umlai uh Pastor ta chih mahtah Pathian thu chu ka za mun a biahinn zong kai gige a ngai hi. Kai ut louh hun a zong kai ngai dinmun a ka ding hun atam mahmah mei hi. Nisim December 26, 2000 (Tuesday) Christmas mang zou, a zing ni kouhtuam dang a tamzaw in a mang nalai uhi. Kou biahinnte’n ahihleh social-work nei zou in ka pa Singngat Pastor in Khanglaite counselling class neihpih diing a chihna ah, ka ut man hilou in Pastor ta ka hihmanin ka tel a ngaih ziah in ka vatel hi. Hu ni suun nitum a ahung counselling nungin nitahlam daah 3 lah veel in, meidil (hell) a Jesu hundamtu a pom loute um diing uh ahihdan leh gawtmun alauhhuai dan nasatah chu blackboard a diagram gelhzen a ahung kigen khum zohin, Eden a kipat a misual kihi; sual tate’n Pathian lungthahna a tuah diing chihleh Jesu Khrist Lal leh Hundamtu a pomlou photmah gawtmun atun diing thu nidang a zong ana hesa chu ka hihvaangin huni leh hu hunchetin chu kei sita leng vangam kai lou diing ka hihdaan ka kiheta. Zing leh thai ah sithei ka hih dan vel ka kingaituah leh lauhna in ka dim hi. John 3:16, a kimu bang in, “Aziahchu Pathian in khovel a lungsiat mahmah a, huchi’n a Tapa tangkhat neihsun apia, koipouh Amah gingta in a beimanglouh a, kumtuang hinna aneih zawhna diing in” leh John 14:6 ah “Jesu’n, Kei lampi leh, thutah leh, hinna chu ka hi; Keimah a pailou in koimah Pa kawm atung ngei sih hi.” Hi Bible chang tungtawnin Jesu chu ka Lal leh Hundamtu diingin ka na pom in, Jesu ka Lal leh ka hundamtu a pom chu meidiil pelh a vangam lutna lampi umsun ahi chih ka hung het chiangtah in, kei a diinga thuah a sihna a tuahte ka ngaituahin, hu ni apatin chu Jesu chu ka Lal leh Hundamtu in ka pomta hi. A kum kiit ka chimei diing a, January 1, 2001 kum thah mang zou in Baptisma tui a phuum ngei in ka na tang hi. Ka hamphatna biih khat ahihleh Jesu ka Lal leh ka hundamtu hung he chiansahtu leh Baptisma hung tangsahtu ka pa mah ahihziahin amah ta a ka piang khah hampha ka kisadiah hi. Gingtute chu kihenna hinkhua (changed life) Jesu toh i kituah apat i neih zel mahbang in kei zong ka pianthah tung a Jesu ka heet daan sangin tuni a ka hetdan achiang zaw tham hi.
Pathian Kouhna Tang A Ka Kihetna:
Hi khovel ah ei gingtute a diinga i khualzinna gam hiziang zongleh nelou dawnlou a um theilou i hihna vah, kei zong ka neu apat ka hinkhua ah tup le ut ka na neive sam hi. Sepaih sap hih ka na ut mahmah mei hi. Uniform a silhte veel uh ka muh chiangin Pathian kawma ka na thumna chu sepaih saap a hung pangsah in chih ana hi hi. Alang khat a ka nu leh ka pa’n Pathian natong diinga kimawh gum sawl diing ahihlouh dan hezing pumin ka unau lahvah khat behin ka pa nungzui diingin a hung deih uh ka he va, ahivangin koimah kouhna tanglou in ahung belguat ngam sih uhi. Ka unau un ka ut sih mahmah mei uhi. Hilam thu ahung kigenkhah chiangin innsung khosah hahsatna lam chouh ana kigelkha in ka utlouh man un lehkha bang ka hah sim diah un ka he a, ka nu leh ka pa’n lah, “Saap (English)te bang akhang-akhanga Pathian nna tongta uh a, malsawmna dongtaah ahi uh, tua ei khang khat a mo Pathian nna tong i tawp diing uh” ahung chih chiang un, dih ka sahvang un ka unau un tahsa hindan lam ka na enkha pahpah uhi. “Nu-ei, Pa-ei hichi a neh diing zong tasam leh hahsatah a i um sang un ka unau un lehkha hah sim in hung sim in khaam (job) ka hung neih veh chiangun Missonary khat i chawm diing” chi a ka gen chiang un hi lah a sava, hoih chu asa sih uh chih ka he uhi.
Hunte hung pai zel in Pathian nna tong ut um sih leh ung zong zahngaihna a dim i Pathian ahihna ah, Pathian in A’ mite diingin bangmah hi sih mah zonglei, i chitlouhna leh I hihna bangbang a hung thuh lou in ka innsung uh hung malsawmin ka unau lahvah sepna kichuptah Govt. nasem diing bang ka hung umta uhi. Pathian apat malsawmna ka tangte uh zal in ka innsung uh chu kipahna in adim hi. Apaisa hinkhuate bang ka suutkhawm va, hampha ka kisa mahmah mei uhi. Huchibang a maban lamet umtah leh kipahtah a Pathian apat malsawmna dawng tou zel a Amah nna ka pa tungtawn a seem tou nalai diing leh tukum innkuan thupi diing “Kipahna kum leh Malsawmna kum” hi hen chi a ka thum lai un, ka gingtat louhleh ka kinep louhna lampang tah vah Pathian in nisim Febuary 16, 2017 a na zong sawt thuah man lou in ka nu ittah mei uh, ka innsung va apoimoh pen a damthei pen, a fel pen ka pa sang a damsawt zaw diing a ka koih pen uh, Amah kawma diinga ahung lahmangsah mei chu... Gen diing zong ka he sihva, lamdangsahna in ka dim uhi. Hi kum chu kipaahna kum sang in dahna kum ahung hita hi.
Ka pa ka en a ka sangamte ka en a a melvah kipaahna umta lou, hichipi a tahsa hat louh toh Lalpa nna ka bang chi toh zom diing adiai! chih bang ka ngaituah hi. Ha khat vingveng dahna leh lamdangsahna toh lungsim hasetah a ka innsung a diinga poimoh penpen ka nu ahung um louh mei, kei beh hileng innsung khosah dan zong buaipha lou diing hi a, chih bang ka kingaituah zel hi. Hulaitahin lungsim chu a sau vah khopmei hi. Zan khat ihmu theilou ka hih chiangin, ka lungsim dahna leh hasiatna lam hilou in, Pathian in ka nu pentah ahung lahsah mei hi, Pathian in ka innsung vah gennop nei hi diing ahi chih lamin ka hung kingaihtuahta hi. Ka lungsim ah Pathian kam diing ka phuahsah a, “Hite innkuan malsawmna a phuh louh uh tangsah ing a, bangmah lou apat hitan tut ing a, ka nna seem diing leh a pa uh nungzui ut khat mah zong a um louh mei uh, ka zahngaihna a ka na ngah (waiting) a zong pil theilou ahih uh leh a pilna diing un ka mi Israelte zong ka thu amang louh chiang un Kei lam ahung naih kiit theihna diing un Ka gawt zel bangin a innsung vah apoimoh pen uh a nu uh lahmangsah ning in huchia a hetsiam louh nalai uhleh husanga nasa zawtham in gawt nalai diing ka hi” chi’n ka lungsim ah ahung kilang hi. Dih ka sa mahmah mei hi. Ka innsung umdan abul apat ka ngaihtuah a, Pathian nna toh diing ka unau hon ua ka na kilep dante uh ka lungsim ah ahung kilang vehta hi. Hu zan in chu Pathian kawm a ka thum a ngaihdam ka ngen hi. “Lalpa, nang in na hung deih ahih phot leh a nuamin a hahsatna a zong hiah ka um ka hung kipekhia…” ka chita hi. A zingni ka innkuante kawm ah gen ngam pah lou in nitahlam in ka pa toh innveh diing in lampi ah gari a ka tai lai un ka pa kawm ah ka decision laah ka gen ngampan hi. Tom khat gen diing zong helou a daidide a ka pai zoh un ka nu’n ahung um louhsan nung ka pa a meel a nuihmel ka muh chiangin ka lung anuam tuam mahmah hi. Huzohin ka pa’n, “Pathian in Ka thuumna ahung sangta…” ahung chikhe mei chu ka ngaituahna a mi thumna sangtu apan hi malsawmna ahihdan ka hediah hi. Ka nu Pathian naseem diing a hung sawl hatpen zong a umna mun vanmun nuam ah a kipah ngei diing chih ka he hi. Nitah dah 11 (PM) in inn ka tung un innkuan kikhopna nei in ka pa’n ka lutung ah a khut nga in thumsahna ahung nei hi. Hi ni chu ka innsungvah ka nu sihnung a kipahna hung um pan in ka he hi.
Pathian nna seem diinga ka hung kipiah khiah phetin chu kei ngei zong ka tung a zangin ka mittuite a hung kinulmangsah abang top hi. Khovel a khualzin mei I hihdan leh i zaw (finish) chianga dah-le-kahna um louhna mun a ahung na paisan i it i ngaihte toh lung khat a khosah khawm kaal bang ka ngahlah mei hi. Ka nu umna vangam lam ngaihtuahna sautah ahung neisah mahmah hi. Huchou zong hilouin Pathian nna tong diing a ka hung kipiahkhiahna in thil tampi subuching in ka kihe a, kei mimal hinkhua ah vangam ngaihna ka neithei a, ka nu leh ka pa hung deihna adiahin ka nu in a hung dampih lai a ahung na gen-gen (a last wish) sutangtung a pang thei diing ka hina ziahin leh ka unaute lah a Pathian nna tong diing a phutna puahgih dawnin ka kihe a, hu chouh zong hilou in ka chitman hilou a Lalpa nna tong diing a ka hung kisahna ah Pathian zong kipah hi ngei diing ahi a; Bible Seminary ka kaina diing bang deihsahtu Amah nna ana tong mi tamtah panlahna ziahin hukum July ha mahin ka hung mu theipah hi.
Tu-Le-Tu A Ka Dinmun:
Thupilte 3:5-6 in Lungtang zousiah a Pathian muang diing leh eimah hetna chouh a kingah louh diing leh i lampi zousiah a Amah i phawh inchu i lampi diing ahung kawhmuh diing a chih mahbang in, Khovel a thil teng i deihdan in pai zungzung sih mahleh Pathian in thil bangkim i hoihna diinga i tuah aphal ahi. Kei zong mihing deihdan a chu maban zil beh touh nahlai diing chih hinapi in, Pathian lemguat zong hi’n chin, mi apil a siamzaw Bible zilzou tampi lai ah akei pentah Khrist lungsim bang pu a a um kouhtuam CBC te’n Pathian nna tong khawm diinga na hung ngaih mei uh bang ka ngaituah chiangin Pathian in CBC tungtawnin ka ma a hungpui ahi chih ka he chian mahmah hi. Ka kipahna diah khat ahihleh ka pa Pathian nna theihtawp a ana toh kum 39 bang a chinzoh nung September 2020 a pension ahihna ah, a kituikai-laah bang khop in, ke’n August 2020 in Pathian nna seem diing dan a ka um theih bang ka ngaihtuah chiangin mihingte’n bangteng bawl sawm (plan) zong lei Pathian muanna inchu i lampi diing ahung guatsah dan a kilang hi.
Tu-le-tu a ka dinmun ahihleh A nna ka tohsah Pathian a loupi tuhin, kei chu hagaulam ah ostrich (valian) lah a ahnou (chicken) bangin ka kihe a, hagaulam leh hetna lam ah ka tasam mahmah a, ka kihawmthoh mahmah nalai hi. Huziahin thumna sangtu i Pathian kawmah na thumpihna uh ka poimoh zing hi. Ka neulai a ka utpen/aim in life ka ngaituah a, sepaih sap utpa khu tu in husang a thupi zaw sepaih sapte’ Sap (Pathian) nna tong diing a ka um mei chu, Pathian in ka phulouh malsawmna tang leh ka childhood dream sanga sangzaw daih ah Pathian in hung domsang ahihdan ka muchiang thah hi.
A tawpna diingin Pathian nasep hi thil thupitah ahihna ban ah, mohpuahna (responsibility) liantah toh hung khawm ahihna ah thil nuam ahihlouh dan Jesu leh a nungzuite apat in zong tampi i het theih mahbang un, kei zong ka theihtawp a i Pathian nna tong diinga hung kisa ka hihna ah, simtu teng kawma ka hung nget nop ahihleh, na thumna vah hung na hezing diing in i Lalpa Jesu min in ka hung ngen hi. Simtu tengteng Pathian in hung umpih zingin hung malsawm chiatta hen, Amen.
[Hih testimony, THE TRUMPET Vol. I | No. 1, Sept. & Oct., 2020 issue (pek 13-16) ah kisuah masa hi. A gelhtu in DEW a suahsawn lemsakpihna honpiak lungdam hang. Pastor Sang in, a pa laa-te ana ngaihkhiak sak zel di’n simtute ngetna honbawl @Youtube http://www.youtube.com/c/RevBChinlal ]
