I theih ciatsa bang in leitungbup ah theihkholh lohin Covid 19 hiipi hong oma, mi tampi in sihna tuakin, khitui-naptui tawh innkuan kikhenna piangsaka, dahhuai in, mulkimhuai hi. Mi tampi mah in hih natna hong vei kha in Pasian in a damkiksak mi tampi mah ki-om a, lungdamhuai hi. Topa min kiphatta hen! Tua bang kawmkalah nang leh kei tuni dong Pasian in i nuntakna hong kem lai ahih manin i lungngaih ding thu tampite lakah pawl khat kikum leng ci in k’ong luikhia hi.
Genesis 50:20 Note in ahihleh, kei’ tungah a sia dingin na ngaihsun uh hi. Ahihhangin Pasian in tu huna mah bangin mi tampite a nuntak theihna a pian nadingin a hoih dingin a ngaihsut ahi hi.
Lai Siangtho pansanin Pasian vaihawmdan i gel ciangin na hoih zaw a piansak nop ciangin na haksa khat hong tuaksak masa zaw zel hileh kilawm hi. Tua bangin – Josef tangthu lungngai khawm ni (Gen. 37 – 50): Josef pen Israel gamsung ah Potifer zaa laih a (tha khenga) kumpi a a hong tut theih nadingin hun haksa tampi hong phukha hi. Mang (dream) a neih manin a sanggamte hazatna hong tuak pah hi. A sanggamte’n Ishmael sumsinmite kiangah zuak uh hi. Sumsin mite khut tung panin Faro nuaia inncing mangpa Potifer in lei hi. Potifer zi in amah ana zawlmit ahih manin – luppih dingin na zawn hi. Josef in, “Bangci in hih gitlohna lianpi bawlin Pasian tungah khial ding ka hi hiam?” ci hi. Ni khat khit ni khat Josef a zol hangin Josef in mang lo in suakta hi. A tawpna ah Potifer zi in zuau thu bawlin a pasal kiangah tun hi. Potifer in Josef manin kumpipa thongkiate khumna thong sungah amah koih hi.
Thong sung panin Faro mang khiat sak hi. Faro in a nasemte kiangah, “Ama sungah Pasian’ Kha Siangtho a omna, hih bang mi dang mu ding i hi hiam?” a ci hi. Tua ahih ciangin Faro in Josef kiangah, “Pasian in, hihte khempeuh nang hong lak khin ahih manin, nang banga thu ngaihsun siam leh a pil om lo hi. Nangin ka innsung ah Ulian na hi dinga, nangma thupiak bangin ka mite khempeuh gamta ding uh hi. Kumpi tokhawm tawh kisai-in kei in nang sangin ka lianzaw bek ding hi,” a ci hi. “Izipt gam khempeuh a uk dingin nang k’ong koih khin zo hi,” a ci hi. Tua ciangin Faro in a min gelhna zungbuh ama khut tung panin suahkhia in Josef khut ah bulh sak a, puan hoih mahmah tawh amah zemin, a ngawng ah kham khainiang khat ok sak hi. Ama leeng nihna tungah Josef tuangsaka, ama mai ah Uliante kiko a “khukdin un,” ci hi. Tua ahih manin Izipt gam khempeuh a uk-in amah koih hi. Faro in Josef kiangah, keimah in Faro ka hi hi. Nangma thukim lohin Izipt gamsung khempeuh ah kuamah in a khut a khe nangawn uh liik lo ding uh hi,” a ci hi.
Izipt gam ah kialpi nasia mahmah hi. Tua tham lo-in, leitung khempeuh ah kialpi nasia ahih manin, antang lei dingin Josef kiangah leitung mi khempeuh hong pai uh hi. A sanggamte zong antang lei ding¬¬in ama kiangah hong pai uh a, Josef in, “Note in ahih leh, kei’ tung ah a sia dingin na ngaihsun uh hi. Ahih hangin Pasianin tu hun-a mah bangin mi tampite a nuntak theihna a pian nadingin a hoih dingin a ngaihsut ahi hi,” a ci hi.
Hih ciang dinmun Josef a tun theihna pen:
1. A thumanna hang ahi hi – a pa, a ute leh a tunga thuneite thu mang hi.
2. Topa tawh om khawm den ahih manin –
a) a nasep a zo mi khat suak hi,
b) a pute maipha ngah hi,
c) Topa in daupai sak hi,
d A omna innte in Topa thupha ngah uh hi.
3. Citakin muanhuai ahih manin Potifer zi zolna panin suakta hi.
Leitung News lam lungngai le’ng:
1. “A niin mahmah lui tuite hong siang hi.
2. Huih a niin sak thei ding nasepnate hong kiamta ahih manin huih zong hong siang zaw hi.
3. Gamsung sung leh lo te zong ahih sia ding tawm zaw ahih manin hong khangin no suak uh hi.
4. Leitangin tawlngakna hun ngah hi.
5. Thu umlo mi pawl khatte in Khris kiang hong zuanin kha damna ngah uh hi
6. Leitang leh Mihingte kilamdanna, kikhekna om hi,” kici hi.
Lockdown a metpih pawl khatte’n:
1. Lockdown om ma in pawl khatte adingin inn pen khawl buk (pit stop) bang hi a, tawmvei khawlna, ann nekna mun, ihmutna mun bekin kizanga, tu in ahih leh- innkuanpihte tawh omkhawmna mun, bitna mun suakin, innkuan om khawmin, kiho tuahin, thu kikum khawmin, ne khawm dawn khawmna munin zang thei uh hi
2. Tate a kem man lo a dawn man lote in – tate kepna hunin zang thei uh hi
3. Leitung a kisia thei hi cih thei in – sum-le-pai zatna ah kidawmin, a neihsunte ah lungkimin, a kisam lo vante lei lo uh hi.
4. Lai Siangtho a sim man ngei lote in simna hunin zangin, innkuan biak piakna limcitakin nei thei uh hi.
5. Lai sim ngei lote’n laibu manpha simna hunin zang thei uh a, kha leh sa ah meetpih uh hi.
6. Nidangte sangin pumpi cidam nading limbawlin, nek-le-dawn hoih zaw nek ding haciam uh hi.
7. Mun pawlkhatte ah kumpi (government) budgette a dik a manin kizang thei hi.
8. Numeite in-
a) Nidanga silh-le-ten a siangsak man lote in puan sawp siangna hun in zang uh hi.
b) Um-le-bel hih siang man lote in – um-le-bel nawt siangna hunin zang thei uh hi.
c) Annhuan meh bawl kisin ngi lote in kisinna hunin zang thei uh a, mai lamah innkuanpihte maipha ngah ding uh hi
d) Teekpi-teekpu a don man lote in kep leh donna hunin nei uh hi.
Lockdown kipat cil pan tu ni ciang dong ni 160 bang valta hi. Hun bang tan hi lai ding hiam cih kigen thei lo hi. Josef in a gen bangin Covid 19 hipi lauhuai hong om hitase leh – a hoih lamin nang leh kei adingin Pasian in a omsak hikha thei hi. Kisakkholhna ding hun ni 160 val Topa’n hong piata hi. Lockdown hong bei ciang hun dong adingin Topa tawh kikal ah bang hanciamna thak na nei ale? Na innkuan adingin hanciamna thak na nei hiam? Na meetpih theih nadingin bang lamah na kisakhol ding hiam? cih thute ngaihsuthuai hi. Hun omlai hi sanggam…
Topa’n a simkha mi khempeuh thupha hong pia ciat ta hen!
……
Note: Thugelh honpetu, Nu M Hoihnu, heutupa Rev Suan Khan Thang’ innteknu ahi. Lungdam lua hang.
