Inkuan kichi khovel pumpi huap genchetna (universally valid definition) bawl ding thil haksa ahi. Inkuan i gen chiang in inkuan sung ah numei leh pasal kiteenna tungtawn a ta neih chih kia ahi kei a, nek-le-tak saina toh kisai leh sum-le-pai saina toh kisai leng uap kha hi. Huai kia leng hilou in inkuan sung a khat-le-khat kisai khakna leng uap kha hi. Inkuan i gen chiang in insung khat a tengkhawm teng kia huap hilou a, mundang-gamdang a tengte nangawn leng inkuan khat in kisim thei veve hi.
Khovel mun a tuam dungzui in inkuan paidan leng kibang veklou lai hi. Mun khenkhat ah tate' zi-leh-tate teng toh tenkhawmna a om a, mun dang ah ji nih-le-thum toh tengkhawm a om lai un, mundang ah tate'n ji a neih chiang un inntuan pah tiltel leng a om hi. Hiai bang a inkuan pai zia kibang hetlou a a om lai in hiai a dikpen chih ding leng gen haksapi ahi.
Tumlam gam a reformation (1517 a kipan) om a kipan in Protestant makaihna in inkuan paizia leh mudan kikhekna om hi. Inkuan in khotang a ding a mun poimoh luah ahih dan leh khotang hoihna ding in inkuan in nakpi a mohpuakna nei ahih dan gen in om hi. Inkuan sung kepna hoih leh kituptak omna gamte gam changkang leh gam nuam ahi uhi. Tua ahihman in khotang pai ding zia inkuan kikepna in thupua hi. Inkuan kepna ah i lohsap chiang in khotang ah a lohsam sa i suak uhi. Huaiziakin, Bible sinsakna a kibuhphuh inkuan kemtu muanhuai hiding in I kichial uhi.
Thukhun Lui ah inkuan genna ding in mispaha chih kammal kizang hi. Hiai mispaha in inkuan, beh-le-phung, leh nam genna in leng kizang hi. Bethin chih kammal a kizat chiang in pa khat suante genna in kizang hi. Inkuan genna a kizang kammal dang khat ahih leh bayit ahi. Bayit i chih chiang in inkuan khat suan khang thum khat li tan bang genna in kizang hi (Joshua 7:14-16).
Thukhun Thak ah inkuan genna ding in patria chih kammal kizang hi. Patria in khang kipatna tan genna in kizang hi (Nasepte 3:25 - Pathian in Abraham kiang ah, Na suante ziak in khovel a namchih a vualzawl ding uh, chi in, na pipute uh kiang ah a chiam hi). Ephesate 3:14-15 ah khovel a namchih teng Pathian a kipan I hih dan gen hi. Thukhun Thak a ding a inkuan genna a kizang mun mahmah oikos ahihkei leh oikia ahi. Hiai in leng insung khat a tengkhawmte kia genlou hi (Nas. 2:46; 10:7, 24; 16:15, 31, 34). Lai Siangthou in inkuan a gen chiang in tulel a insung khat a tengkhawmte kia gen ngeilou hi. Lai Siangthou in inkuan a gen peuhmah chiang in khang thum khang li tan uap a, tanau-laina teng ban ah insung toh kisaikhakna suak leh sikha tanpha uap sak hi. Tua ziak mah in inkuan toh kisai thuhilhna peuh ah - pa, nu, tate, leh suak leh sikha te, uap a thuhilhna kimu tangpi hi. Tua kia leng hilou in Thukhun Thak ah Saptuam leng inkuan ahih dan kimu thei hi (Eph. 2:19).
Pathian in hon piak inkuan kemtute ahihna in inkuan kichi theichian sem leng chihna a i gen ahi. U-le-naute a ding a belh leh tai theihna ahih kei leh inkuan kichi theichianlou hikha ding I hi. TOUPA’N inkuan poimawhna hon theisiamsak semsem hen!
