(Sutzopna)
Cambodia ka lutchiil kum uh 2006-2008, kum 25 vel civil war nana om ziak a buaina veng panpan, puanselom tui a diah I suukkang zawhphet bang sim ahi a, changkang nai hetlou ahi. Motorbike bang tuh athak chih khawng a vanglai mahmah a, khawlak a bike kikoih suntang lai tanpha-a kigu, kilok, kithat chihte a tamthei mahmah. Motorbike khat in mi 3 bang paw sek a, huai tuh, a hekpa tawh mi 4 tuang chihna ahi; helmet khuk chih lah om vet lou! Motorbike tel Japan/ Korea te zat nawnlouh (second hand) te ahitangpi hi. Huchi bang hun a, ka lawmpa Manga in bicycle tek deuhta sangsim vengvong zezen khat nei in a zang manpha mahmah hi.
Siam Reap International Children Fellowship, 4-Star Hotel khat ah Nipini sunnung chiangin ka kikhawm sek ua, bicycle mah a kipawtou kukuih in ka vatel sek uhi. Gamdangmite lah tuh Lexus, Camry, Toyata car khawng leh Honda Suzuki bike leh adangdang zang in hong kuan sek uhi. Kou, India gam zawngkhaltak akipana missionary nna vasem vete tuh, a guk in ei-le-ei kingaihsiat mai hun bang abaihlam thei hial sek hi. Hilele ka kuanna san uh ‘ka thei cian ua”, ka zum tuan kei uh. Mihing lungsim ngaihtuahna ah bel a nop vak louh chang a omthei sek hi. Nungak melhoih pipi bang nana tam theisek lai zawmah unchin!
Huai ban in, internet connection a gina kei a, cyber café hoh hun bikdeuh ka nei sek ua, mi tawm hun deuh in innkuanpihte leh lawmte houpih in ka vahoh sek uhi. Nitak chiangin Buddhist te uivulhte leh kholak ah neitu omlou ui vakthap a tam ua, honna bauh vengvung sek uhi. A kallak in, hongtai khawm in keih bang hong sawm sek ua, tua ziak in, a denna ding suangtum tawh bang ka om sek uhi.
Seam Reap a a omlai un tukthei-taithei neilou nana tuh, nisatak nuai ah khe-a vak in a omna khopi uh a theisuak hoih mahmah, khopi sung ah ‘kongzing ka theihlouh a ompi kei’ chi thei mi khat ahi. Mohpuakna alak peuhmahte tuh hoihtaka pichin zel tumtinten mi ahi.
Khatvei, Cambodia mi tangval khat Tv Noun kichi, NEI-Asia a training lai a ka sawltak-sawntawloi khat uh kum 5 vel a sep nunga leng kilamdang leh khangtou lou (change & growth nei tuanvaklou) tawh kisai Manga ka donga, “Tv Noun kha midang toh kibang kei na e, a omdan le masawn lou hial in ka mu, Leadership quality nei lou khatkhat hia? Midangte lah hong piching tou hong gintakhuai tou zel mai ua?” Ka lawmpa Manga in, “Pu CT, hiai pa mi lamdangtak himah e! Paulap bawl a siam mahmah, meeting khawng chi’a le hong tung zekai deuh gige ahi. Ahi a, ma a sawnkei a, nung le a nungtolh bok kei. A ngeingei ahi a, ahoih zawkna khat le om ahi. Midang khenkhat in hattak a masawn unchin, Team a omsawt peihlou uh ahi. Thil dang, hiai ka hih ding, huai ka hih ding chipah in, NGO hoih zaw, gamdang mite NGO bang a theih chiang un hon taisan ek zel uhi. Masawn tuanlou, nungtolh tuanloute ahoihna uh om vanglak ahi,” hichi’n hondawng hi. Thilteng a hoihlam, a positive zawng a en in hon genhiau zel a! Ka ngaihtuahnate a sukha thei ngei!
Pathian nasep kilang mahmah a telkhiak, hilele a kallak a puk thei zel, nungtolh thei zelte sangin “a ngeingeite” hoihzawkna om mahmah ngut vanglak e, chi in ka ngaihtuah teita. Saptuam sunga Tuailai Pawl heutu khat ka hihlai inle, saptuam khut leh khe hidi’a honsekte uh lak ah ka na telkha ngeita-a, thil hihna peuh a ‘tel peih gige, a hihna a omdan ngeina kikheklou’ mi hih ana poimoh mahmah ngut hi.
Khatvei mah lah, “Khmer mi thadahte INKHAWMPUI’ chih nei den sek ua, nasep lah kuama’n awlmawhlou uh ahi” chi in hon hilh hi. Nekkhawm loihloih, music ngaihdeuh gingsak kawm a kikhop loihloih khawng Cambodia te kilawp in nuam a sak zawng uh ahi. Khavei, “Mang kuate maw kikhawmpi, koi maw ’inkhawmpui’ nei na chihte” ka chih leh, a inn luahna kiang ua mi 10 vel khawng laikap (playing card) kimawl kawma zu (beer) dawnkhawmte na mu hia, hon chia; Inkhawmpui (zudawn a kikhawm) Cambodia-te nopsak zawngtak himahlou maw, hon chihsan daih hi.
NE Asia Ministry Cambodia ‘Team Leader’ bang in a seem a, home church (Lamka, Churachandpur) a om RPC in Pastor ordination pia in, Baptistna leh Sacrament banah Saptuam zek thil khawng seem thei in hong om hi. Tuma a ka Adopt Village ua budhist gingthakte baptisna pe utlou pa’n, tu’n a puanak tual toh baptisna tangsak zauhzauh zel ta hi. Manila a M Div zil di’a a kuan in, a ji leh a tate 2 (kum 10 ching nailou tuak) te toh ahi ua, amah zil sung mah a a’ ji Mercy Vung in MA Counselling zil di’n a va-om uh ahi. Covid-19 hiipi leng ziakin Philippines a sinna innte khak vek ahong hi ua, hilele India mi huai a omte tuh India solkar thusiamna tawh vanleng a puakkhiak a om in, Guwahati tan puaktung in a om ua, huai ah quarantine in a om uhi. Paisuak thei lou a a om sung un amah a hong dam kei a, zunkhum leh lungphulam damlouhna neisa ahi a, damdawi-inn ah admit in a omta. ICU a om lai in Covid-19 le hon veikha a, ICU a ni 14 om phatuam theilou, ventilator vuah in a om, dam suahzoulou in a honna beisanta mai hi!
Hichibang, Cambodia gammial leh gamkeu a Tangthupha na vakvaihpih ka lawm leh ka unaupa, Pu Chinsuanmang (44) in July 24, 2020 zinglam dak 1 vel a honna paisan thut mai hi, a mangbathuai in a hamhaihhuai tel mai! Leitung zaw lungkham leh kahna gam, lawmvual lungtuakte gibing kikhenna gam ana hi a, kikhen I hitamai ve maw! Hitamahleh, Khrist a hinna neite zaw khantawn in a dam ding ua, denchiang in vangam ah kituakkhawm nawn ding hihang. Kimukik ding gibang khen zong... A nawtsiat, a ji Mercy Vung leh a tate Hannah Niangngaih & Daniel Muan Sonding adi’n thumsak chiat ni aw. [Hiai a pasal, Mang ana suun, unaunu Mercy Vung ahihleh Media Team a ‘Voice Recorder’ (MT-VR) lenlel Tg Chingousiang’ u, a pianpih sanggam ahi. Pa neiloute’ Pa in Nu Mercy Vung leh a tate limtak kem ding hi. Thumna in phawk/tuam tou zel ni].
…..
Note: Pu CT Lalrinmawi in a FB a gelh, Pu Vanneihthanga in Lamka Revival Crusade Group a honkoih (Mizo pau a), a thutuun manpha sak ziaka, EBC Delhi newsletter DEW a suah di’a Paite pau a lehkhiak ahi. Paulettu: Mr & Mrs (Upa) Langkham tung ah lungdamna lian. Hih khelh omleh ngaihdam.
