Tuni July 24, 2020 zingkal thouphet ka phone WhatsApp ka va-et leh thu ka muh in lungsim a khoih lua (hon ‘barakhaih’ lua) a, ka zawi gai vek ahipen mai! Ka ngaihtuahna sau apai vongvong tel!
Huai lai kigelh ka vasim tuh hiai ahi: Ka lawmpa, ka sanggampa leng hi, South East Asia - Buddhist Gam a ginna a kal suan a ka vaklut chiil, kum 2006 a kipana “akhum-a-al” ka nekpih, khatvei chi’a ka thangpaih khawmpih, khatvei chi’a ka kipah khawmpih sek, mi nunneem leh mite theihsiamna hau, Khrist lungsim kikoppih a mission lungsim khauhtak nei mi, Pu Chinsuanmang (CS Mang) in tangtawn gam honna zotsanna thu ahi.
Lung-am gawp sim in ka om a! Mobile phone a thu kigelh ka simthak nawn a, a’ zi Pi Mercy Vung ngei in a hon-gelh, “Lawmhoih honna thumpihsekte aw, Pathian in U Mang honpia a, A kianga nuamtaka khawl tawldam hit-hiat ding in hon laaksak nawnta” chih ana hi. Awi Maizen, gintak haksa ka sa tel mai!
A nasepna tawh kisai phatuam dinga gintakna tawh Manila, Phillipines a M.Div zil di’a a kuan dek a sepna mun Cambodia a om, Siam Reap khawpi nusia a innkuan a kuankhe di’a kisa a a omlai ua, ka omna mun Phnom Penh akipan amau kha ding a ka vahawh a ka kimuh ban uh, Toupa Ni a denchiang a kimunawn phet ding, huai ma a kimu nawn lou di lah ka hita maimah ua le! Zanlam zek in nau banga ka et, leh ama’n le a u bang a hon et, Dr Robinson S. Zote (Ph.D) inle honna beisan zaw-mah a; lamdangsa in anih tuak un, nakpi tak in ka suun hi!
Kum 2006 July in Chiangmai, Thailand ah New Enterprises International Asia (NEI-Asia) te saina a “Cross-Cultural Communication Training” ka neihkhawm lai ua Naga tangval khat tawh pindan khat a ka omkhawm ua, Frontier Mission adi’a phatuam ahihkhak leh chia Htp Mang in TESOL Training honhihpih lai… naupang sinsak hileh kilawm a practical training ka neih lai ua, ka heutupa uh Canada mi khat tawh, Chinese, Korean, Filipinos, Malaysian, German, Brazilian, Thai, India leh British mite enzui a hon ’catch-up’ a, ka vek ua kipak a, hon nuihsak damdam lai nite bang mitkha ah ahong langkik chiaichiai mai hi!
Thailand a hong tunma in NECTAR Shillong ah, SE Asia te laka nasep didan (training) siamneel leh u-luk taka ana la khinta, Nepal leh UP state India a missionary nna nana seem ngeita, sinsakna leh gamgi-kantan a nasepna tampi ana nei khin mi ahi. Mi nunneem tak, kuamah hehsa leh aw sang a dawng ngeilou mi ahilai. Amah dik zawkna a le daihsan sukmai teel zaw zel khop a kingainiam sek, midangte adi’a poi thei thu gen utlou mi ahi.
Lawm bawl leh mi houpihdan a siam a, a poimoh hun a chiamnuih gen di le thei, a lawmte hon nuisak damdam sek zong ahi.
Chiangmai, Thailand akipan in Cambodia ah Pioneer mission a seem ding in amah leh ka pindan kikoppih uh Naga pa NEI-Asia a ka heutute’n pi lut ua, kei tuh Communist gam Laos a om Akha tribal te lak lut ding in ka kuan hi. Hi lele, Laos adi’a Visa muh a haksat luat ziakin Cambodia ah ka lawmpa Manga-te ka vabeel hi. A kum 2006.
Cambodia ah tourist visa lel toh lut ka hih ziak un a poimawh Business Visa (E-Visa le kichi), va-om den dinga kuan hilou kei tanpha adi’a le poimawh hia thei in, Ho Chi Minh City (Saigon), Vietnam gama om Cambodia embassy ah ka vasaikhawm kha uhi.
Siam Reap khopi pansan in, singtang khua ‘Sounsa” ah kum 2/3 vel ‘adopt village’ dan a la in, huai khua Khristian kuamah om nailouhna khua ah, mi piching ngen 43 Baptima tangsak thei di dinmun tana NE-Asia Team te’n a etzui uh ahi. Hilele a paulettu uh leh gammi a goihte uh ginomna taksap ziak in Sounsa khua a panlakna khawlsan a om in, hiai Sounsa khua akipan KM 40 a gamla ah a seem nawn ua, huai khua a om mipite ading in Community Wells 5, Toilet 2, Non-formal education min vuah in Sappau sinnate bawlsak in, huai a hongtel te Worship leh Bible study hihpih in, “nna hoih” septe Tangthupha genna siksan a zangin, huai nnate tuh ak (hen) I mat dek chi’a ak antah bang lel in zang uhi.
Cambodia nisa lum simtak nuai a ka lawmpa Manga in a tallang simtak tawh khawlak honvakpih khauhkhauh lai nite, siksakol teek simta khat a honpua a, Seam Reap khawlai leivui khulak hi’n buannawi tampipi omna lak hitaleh a siksakol a hon puak sek dante… lawm hoih mahmah ka hihna ding ua kalbi sautak ana hi uhi.
Nisa in khut a tawi mah bang in honhai a lum petmah, Cambodia a om singtangmite adi’n kihilh tuahtuah le ngai tuanlou khat ahi. Ka lawmpa Mang in hichi’n honchi seka, “Pu CT, kisil sil mai le, lum man lou mai ahi” chi in, a pawtdek chiang bang, inn a tun nawn chiang bang in hun teng in a kisil sek hi. A sam lah chu hiat di tam hetlou napi, limlang bul ah samsih tawh hun sawtpipi siamneel takin a hiat hiauhiau sek hi. Cambodia mite tawh kilawmbawl bang a siama, mi tampi lawm in a bawlthei pahpah a, ke’n le lawm tampi ka neihlawh hial hi.
Nna semkhawm nana tuh, thusia-thupha ka kihilh vek sek ua, khatvei vei tuh milaka kiniamlak, kingainiam khengval deuh na hi chi a ka tai hun bang a om hi.
Khatvei tuh India Embassy ah ki-register di’n ka vahawhkhawm ua, hawh nawn a ngaih hun in nasep na ziak in ka hawhkhawm lemtang kei uhi. Amun le thei thouta hive’n chi’n ka vahawhpih kei hi. Embassy a seem vaipa kianga, “Cambodia ah India mi bangzah I omta di ua aw?” chih a kihou kawm ua adot leh, huai vaipa’n, “Huai khawng nang theih poimawh kei...” a na chihkhum hihtuak hi. Huai thu honhilh tuh, ka Mizo tangval sisan hong saphut in ka heh mahmah mai, mi piching khat’ thukan huchibang a kidawn mawngmawng kei ngaihdan/ pomsiam lam ahi het kei! A malam inle huai vaipa mah in kei kiang ah, “Indemi hingal a bang di’a Hindi siamlou…” honna chi ngeita a, “Kou North East India a om Mizote’n Hindi ka theikei tangpi uh, ka na zil tawm ziak uh ahi” chia ka na hilhchiansa le ahi. A zinglam ka hawh nawn unle huai mah honna chi nawn a, “Bang achi’a hondong nawnnawn na hia, zan inlah hoihtak in k’on hilhchian vekta ngal a” chia, hehsim taka gen kawm a, ka daih saksa le ahi.
Huai vaipa’n ka lawmpa lah hi, ka sanggampa lah hi, tribal mel-le-puam nei ka hihziak uh hia, huchi dana ana hou himhim; ka ngaihsiam hetkei hi. Mi dotna bawl simmawh deuh a dawn chihte ka ngaihdan ahikei himhim. Ka lawmpa Mang kiang ah, “Tuni a ka hong omlouh tuh vaipa le a hampha a, kei le ka hampha. Kei tuh mi’n hon huchih ngeingei leh heh ding ing a, kibuai zaw zaw-mah maithei hia…” ka chi hi. “Nang theih poimawh kei” kichih mawngmawng; “Mi hiai zah vel khawng ki-om di, chih gen a haksat louhlouh maizen tawh” chi’n Manga sang in ka heh zaw maimah... Lawmpa Manga tuh Zo huihkhi siang, lungdamsak thei huihkhi siangte, na diik sek ahihna tawh, huai bang zakdahhuai leh kimuhsitna kampaute damdiai in a na paai thei hi; nak phak kei na maizen ing e!
Zi a neih dek tan inleng thu kihilhtuah vek ka hi ua, mi ngaihdan khawng tuh a la thei vak kei. A chihlouh lam ahihleh bel mi khauhtak ahithou. “Nay, nay, kahase” chia a lu sing a, a khut honliik chiang bang in tuh, lem sa hetlou chih theihna khat hidan ahi. (Sutzop di)
Note: Pu CT Lalrinmawi in a FB a gelh, Pu Vanneihthanga in Lamka Revival Crusade Group a honkoih (Mizo pau a), a thutuun manpha sak ziaka, EBC Delhi newsletter a suah di’a Paite pau a lettu: Mr & Mrs (Upa) Langkham. Hih khelh omleh ngaihdam.
