Tukha (August) thupi "U leh naute kemtu muanhuai" chih toh kisai saulou enkhawm nawn le’ng I chi hi.
U leh naute: U leh naute chih toh kisai in gendan tuamtuam a om dinga, a zazaw leh Biblical deuh in gen le’ng i mihinpihte leh adiakin i chipihte, saptuam leh society a I ompihte a I chi thei hi. Jesu, temple a a omlai in na unaute’n honngak uh chia avahilh lai un "kuapeuh ka Pa van a om deihlam hihte ka nu leh pa leh sanggamte ahi (Matt.12:50) a chi a, khalam thil a gen ahi.
I thupi in agen tuppen hi di’a I theih tuh salama i nu leh pate leh pianpih sanggamte, I kinaihpih diakte gen ut hi in I thei hi. Midang deuh innvengte, khopihte, I chi I namte vahuam tel thou mahleh adiakin i kinaihpih (immediate close relatives) hiin I koih hi. Amasapen a i it di’a Toupa hon lamet tuh hiaite ahi. Aziak tuh hiaite tunga i itna leh nasep hong kilat keileh miteng chih haksa di’n i gingta hi.
U leh naute poimohna: Unaute kichi deihman a tel theih le hilou Pathian honpiak ahi, Inop-idah huna I kianga omte leh hon liahkhuhtute ahihmanin poimoh petmah ua, u le nau sanggamte tellou khovel bukimlou ahi. Lengtong Pauno in "lei theih hilou pianna zuapa leh laizomte" a chih bangin sum-le-pai thu le hilou hi. Salama ka u-le-naute Pathian honpiak ahi a, Pathian ka itna amaute tunga ka suklat gige ding tuh Toupa deihna leh hon lamet ahi. "Kuapeuh a unau itlou tuh zuauthei ahi, Pathian itlou ahi" (1 Johan 4:20).
Htp. Vungzamuan Valte, DANICS a i officer liantak, Delhi ka tunnung sawtlou in sepna kitawp in innlam a pai di’n hong kisa a TBSUC member ahihmanin amah khakna kineia huaia a’ thugen tuni tana lungsima omden tuh: "Kei hih innkuan tanaute ngai diak mi khat ka na hi. Hiai ka sepna semsem hileng ka pension masiah Delhi a omden di inga, amau lah hongveh zoulou, ke’n lah vaveh zou gige lou di inga, sepna ziaka damsung tomkha sung a tamzaw kikhen sangin sepna nusia in kei amau kiang ah om le’ng nuam zaw di chi ka hi, sep di zaw Govt. a sese loule om inteh" achih ahi. U le naute itna diktak mah hi in ka thei a ka ngaisang mahmah hi.
Thukhitna: Tuni'n tampite khosakna ziakin nu leh pa leh tanaute nusia a I omkhiak laiin bangchi’n I kisaipih a? Amaute kithuzakpih in kizopna i kembit hia? ahihke'h i tanau sanggamte sanga lawm ngaihte khawng itzaw leh ngainazaw, innkuanpihte ninbawl maimah I hikha hiam chih kingaihtuah ni. Khenkhat bangin innkuan tanaute toh kisai kha nawnlou chia nopsakthoh maimah, neih neih zohlouh ziak le hiloua innlam bang le pai ngei khollou chih bang omthei maw? Toupa hon deihna leh lamet masa hi di’a i gintak zaw i u le naute adiakin nu le pa leh pianpih sanggamte it a kemtu hih ding ahi. A hoih ziak uh hilou, ei adi’a liability lel khawng le ahimaithei uh, himahleh it teitei di, apoimohte uh I piakzoh dandana pia a kep ding tuh i mohpuak ahi. U le naute kemtu muanhuai hidingin Toupa’n hon makaih chiat hen!!
