Tulai in muh thamlouh a neu (cm.1 sung a 500,000 bang omthei) natna hik neupen leh anautum in khovel a hon henchip a, mihingte I kibukhumna uh ni 57 bang ahita. Leitungpumpi ah hiai natna maituah thei dinga kiman gam khat leng ana om kei. Kisakkhawl louh ziak in gam tuamtuam ah mihing nuai 400 val a china ua, nuai 3 val a sita. Nezonna leh sumsinna nakpi in a kiseta. Tu in leng dinmun in hoihlam a nawt nai kei. Covid-19 ahong kipattung a kipan in media ah kigen tou den mahleh gam vaihawmtu kuamah a patau pah kei uh. Thugen khenkhat: “The situation is absolutely under control” (Guiseppe Conte, Italian Prime minister, January 20). “We should be going about our business as usual” (Boris Johnson, UK Prime minister, March 3), “A lot of that is fantasy when it comes to the coronavirus” (Jair Bolsonaro, President of Brazil, March 10), chihte ana hi. Hassan Rouhani, Iran President ngial in February 25 in, “This is one of our enemies’ plots, dragging the country to a situation” ana chi.
USA ah March 19 in Donald Trump in, “Hichi tuk a hiipi hat hongtung ding ahi chih kuamah in a thei khol kei” a chi. Adiktakin expert te’n viral epidemic hong om ngeingei ding chih hun bangtan hiam apan a muhkholh dan uh leh a lau uh ana hi. WHO in 2005 in theihsakna khat ana bawlta a; International Health Regulation (Article 6-Notification) dungzuiin gam tuamtuamte hiai bang natna a om ngeingei leh kintak a theikhe di’a kimansa a om ding leh a om phet chianga kintak a WHO theisak pah ding in ana chi. Gam tuamtuam 196 (China leng tel) in suai kai mah le uh kuamah in huai ana limsak kei uh. WHO mah in September 2019 in viral pandemic a hong suahkhiak khak ding lauhuai taktak (serious threat) ahi chih leh huchibang hiipi maituah ding a kiman khovel ah gam khat leng om lou ahi chih a gen nawn. Kha 3 sung in December kha in WHO in a lauh banggeih hong kipan khe petmahta.
Nikum khallai in misiam tuamtuam kiang ah dotna ana kibawl a, amaute’n lauhuaina thu ngen ana gen uh. April 2019 in Joel Montgomery in viral epidemic hong om leh coronavirus ahi dia’m chi in a dong ua, ama’n “certainly” chi in a dawng. Nikum may kha in Bill Gates in hichibang hiipi a hong om ngeingei leh kidoupite toh tehkak theih ahi ding, gam koimah hawi in a om kei di’a, economy nasatak in a buai ding, chi in a gen.
Zoonotic Natna
Virus tuh ei theihdan bang a thilhing a hi kei a, thilhing khat sung a lut kei leh khosuak lou in a kise zel. April 10, 2020 in Dr. Peter Daszak, President Ecohealth Alliance in virus tampi (48,000 khawng) kitheikheta mahleh theih nailouh a tamzawtham, maktaduai 1.5 bang, gammang a ganhingte lak ah omlai di’a gintak ahi, a chi. Gamsa akipan virus mihing ahong ahong tun ua, natna a omsak chiang un zoonosis a kichi. Kidoupi masa hun a Flu pandemic, vasa leh vok akipan ahi, 2002 a SARS pandemic bak a hong kipan ahi, 2012 a MERS pandemic bak leh sangawngsau akipan leh HIV hik chimpanzee a hong kipan dan a theih ahi.
Virus natnate paizia a kibang kei. Khenkhat (HIV hik) theihtheih louh in mihing sung ah a lut a, theihlouh mah in midang tampi a kilawhsawn zel. Khenkhatte’n kintak in symptom tuamtuam - khosik, luna, khuh, chihte a omsak ziak un natna dang sak khak theih ahi zel. SARS natna pen tutung a Covid 19 sang in a hatzaw a, hileleng natna a kilat khiak nung in midang a lohsawn thei pan. Ebola natna a hat mahmah ziak in damloute a oppah ua, midang tampi akiloh man kei.
Genkholh theihlouh
Virus ah kikhekna (mutation) ana om toutou. Mutation omlou in hiai virus te’n mihing kia gen louh ganhing chidang ah leng akisuan theikei ding ua, natna leng apiangsak kei ding uh. Yuhan khopi a gamsa leh innsa chituamtuam khoi khawmna leh sa semna, zuakna mun ah virus chi tuamtuam hong kisukhawm ua, huai a mutation hong om hidi’a gintak ahi. Hun paisa a Spanish flu hiileng - khenkhatte sut dan in - mihing flu leh bird flu hikte (chituam tuak) vok a hong kisutuah kha ua, strain thak H1N1 (swineflu) hong om khia hidi’a gintak ahi.
Quarantine & Social Distancing
Kum 700 paita in Italy ah “Black Death” hiipi dalna ding in quarantine ana kipanta. Khovel a masapen ding in Ragusa khua ah July 27, 1377 in thupiak ana kisuahkhia. Hiipi tunna mun a hong kipan khualzinmite Ragusa a hoh dingte, khosung ahong lut pah kei ding ua; long a zinmite Mrkan tuikulhgam ah, lampi tawnte Cavtat khua ah kha khat a hong om masa ding ua, huai khit chiah khua leh district sung a honglut thei ding uh chih ahi. Huai nung in mun tuamtuam ah leng hichi dan zat ahong hi. Bangtan hiam zoh in hiai etkhiakna pen ni 40 a hihsau ahong hi a; trentino apan quarantino (English ah quarantine) ahong suakkhia hi.
Social distancing leh quarantine etkhiakna ding hoihtak America ah kum 500 nung in a hong om. Spanish flu hun in St. Louis, Missouri ah dalna tampi om mahleh khauhtakin school, biakinn, cinema hall, bar te khak ahi. Van zuak/ lei hun hihtom leh mipi kikhopkhawm kham ahi. Khopi dang Philadelphia ah September 18 in Liberty Loan parade anei ua, mipi anuai-a-sim in kholak a fang uh. Ni 10 sung in mi 1,000 a si pah ua, damlou nuai nih a om pah. Huai nung in zuzuakna leh etnopsuahnate khak ahipan. Natna a otpen hun ah Philadelphia a sihna St. Louis a sihna zah lehgiat a pha.
Mailam Etna
Mailam ah Covid 19 in koilam anawt di’a chih a kithei kei. Duhthusam sang pen in vaccine (or damdawi) a hong kimukhe dia, hiai natna khovel a kipan hihmang ahi ding. Covid 19 hik in a thahatna/ virulence a hon mangsak di’a, siatna thupi a tunzou kei ding chih leng duhthusam dang ahi. Hiai natna khovel ah abei nawn kei di’a, mun tuamtuam ah malaria, cholera, etc., dan in a omden (endemic) ding chih leng WHO in thil hithei a chih ahi. HIV/ AIDS leng a bei kei na a, a thahatna bel nakpi a kiamsak ahi. Bangteng hileh tullel in zaw lamet ding thupi lua a om nai kei; mi tampite a kisi (die) lai di’a, atamzaw semte’n hiai natna I vei lai ding chih tuh gintak dan ahi. Hun tomchik sung in ahong kikheng a, vaihawmte leng tu in tuh a patau uh. Thugente a kikhengta. “Go home and stay home” (Justin Trudeau); “You must stay home” (Boris Johnson); “No Indian citizen should step out of home during public curfew” (Narendra Modi)
Lifestyle
Covid 19 hik mihing sung a lutna mun mit, nak leh kam te ahi. Dakkal 1 sung in mihing in I mai 20 vei bang kikhoih kha zel a chi uh. Khut in thil tuamtuam khoih kha gige ahih ziakin tui leh sahbon a sil zelzel a poimoh. Thilchin tuamtuam khuttal electrict post a tat (siang) khinphet kamsung sawk pah chih sanga lauhuai zaw gamtat leng a om lai ding. Hun lemtanga la in michih in i Lifestyle bawl hoih le, pandemic hun hamphatpih I hi ding.
Note: Covid-19 hiipi tungtang, eimi doctor te’ thugelh kimu tamlou hi. Bungmual khua a om, heutupa (Upa) Dr Paul Ginthang, hun khat lai a Medical Suptd., District Hospital, Lamka lenkha in a gelh Bungmual Weekly News a kisuah a kimuh ciang in manpha kisa hi. A gelhtu, doctorpu lemsakpihna tawh tu in DEW ah suahkik ahi (beu 3na). Thugelhpa leh simtute TOUPA’N navakna hongpe tekta hen!
