(Sutzopna) January 19, 2020 | Nipini @8.30PM
Pastor Biakson: Zohna ding in, I Toupa Jesu Khrist thumna, Johan 17:4 hi in ka thei a, tulai in huai ka sim kha sek a thupi ka sa mahmah! I Toupa Jesu Khrist thumna, gingute a ding in a thum a, a nungzuite a ding in leng a thum; Pa kiang ah a thum ngetnget a bung kal khat mawngmawng ah A thumna a kigelh hi. Huai lak ah “Pa, Nang thil hih ding nasep ding na hon piak tengteng ka hihkhin a ka hon pahtawita hi” chih, huai in ka lungsim laak a la hive aw.
I Toupa Jesu Khrist kha Laisiangthou sutte’n kum 33 khawng dam a hisap uh ei vo’i. Taksa dan a gen a kei sang a le naupangzaw chih theihta ahi. Kum 33 a dam a, kum 3 khawng ding lel ministry a nei a, na a sem a, hileleng a Pa mai a A thumna, “Pa aw, Nang hih ding na hon chih teng hihkhin ka hi, zou ka hi” chi ei vo’i. Nidang a leng I sim khak zel thou, ka ngaihtuahna-a hong lehlut, ka lungsim a lian mahmah bel, kum 3 sung a hih ding teng hihzou chih ahi. I Toupa Jesu mihing bukim (100% mihing) hia maw. Ei lah kum 30 val bang kidam a kum 5 bang ministry nei sam ing a, hiai ah ka buai lua, sem khalou mah kibang den maw. Huchi khop a kibuai in chin, focus le neilou hile’ng kilawm khop a ki-om.
Tuni’n hichia ka ngaihtuahna-a hong lut hive aw. Leitung a Pathian in hon damsak hun khah hun tomchik sung ahi a, huai sung a thil tampi hih di’a hong damsak hilou ahi. Thil khat lel I chi hiam tawmchik lel mah fulfilling tak mai a, huai life zang ding a hongkoih ana kihi inchin. Huai pen I theihkei mawkleh hinkhaw manpha zangkha lou kihi di. I hinkhua wasted life hi gige di, I hunzatte mawkzat kihi gige di. Jesu Khrist in kum 3 sung in thil hih ding khempeuh a hihkhin a, fulfilling takmai in A Pa mai ah, “Toupa, Pa aw hihkhin ka hi” A chih bang in tuni’n leng I damsung kum tomchik ahi. Hiai hun ah Pathian in a hon deihpen tak mah sem kha ding in, huai theichian ngeingei le hon subuai di le tawm di hiveh aw.
I hih ding tak I theihlouh ziak a kibuai, miteng kibuai gai. I hih ding tak hih le’ng thildang in hon subuai zoulou di. Huai khah sawltak Paul inle ana thei hi di, “Thil khat ka hih” chi eivo’i, “Nunglam a omte ka mangngilh a mailam a om pen ka delh ahi” chi lai. Thil tampi ana buaipihlou inchin, thil khat a buaina ding, a sih le-le a sihpih ding, a minsiat le-le a minsiatpih ding khat thei hiveh aw. Huai tuh Jesu Khrist ahi. Tuni’n, tua bang a mihing lohching leh fulfilling life tukum a zang ding in Pathian min in ka hon chial hi. Tua hihthei Pa Pathian Khasiangthou in noute hon makaih tawntung henla… I kimu gige nawn kei di ua, muntuam a omta ding kihi ahihman in Pathian in chidamna honpia henla, Delhi hih ta leh nau a na lohchinna uh, na lamzanna uh, na khantouhna uh, na gahsuahna mun uh hong hi hen!
Pathian in hon koihna san om ahi, I hinkhua ah thil tampi hilou thil khat kia thil poimoh mahmah khat-le-nih lel ahi. I innkuan a I buaipih ding honpiak, huai pen musuah a tua mah a kizangtum a, Pathian min thupina innkuante hithei chiat ding in Pathian in noute hon vualzawlta hen! Beita.
…
Note: Hiai houlimna, Pastor Biakson & innkuante’n Vengnuam, New Lamka saptuam kem di’a DELHI a pawtsan madeuh ua thiltung/ kinei ahi. Aw kikhum, sim theih di’a hon gelhkhetu, Pa Thanggoupiang, Voice Recorder (Media Team), EBCC Delhi tung ah lungdamna lian. TOUPA hoih hi.
