Michih in amah a ding kia khual kei henla, midang ading leng khual sam hen (Phi.2:4 - Par.Bible).
Tukum 2020 kha giatna tan Toupa’n honpi tung nawnta a, I kipak mahmah ua, kipahthu gen kawm in a min thupi I phat uhi. Leitung natna, satna, lungkham-mangbatna leh haksatna tuamtuam in a tuam kimvelna mun ah leng Toupa zahngaihna ziak a hihmanthat a i om louh man un I kipak mahmah uhi.
Tu August, 2020 a i saptuam thupi “U leh naute kemtu muanhuai” chih a gen, honna leh abul patna tuni in nei le’ng chi in k’ong kisa hi. Leitung mihingte a bawngbawng, a chichi leh a namnam a kikhen in i om ua, huaite banah, a behbeh leh innkuan kuan a kikhen in, kikepna, ki-etkolna nuam zaw ding in i om tiltel uhi. Gam leh nam khang toute tuh mimal leh innkuan khangtou chihna ahimai hi. Huai mah bangin gam leh nam kisia I chihte zong mimal leh innkuan siatna a hong kipan, u-le-nau kal siatna in khotang hon zel, aban honpeh lian semsem in chi leh nam siatna, gam leh lei puksiatna ahi.
Innkuan Kikepna: Innkuan kikepna a tangpi in eimite lak ah Pa thunei sang pen, mohpuakna lianpen ahi. Jingvai nitak vai pa in a hawm a, nu leh tate’n pa thu mang a hong om chiang un, innsung tuh hong nuam in tawldamna mun hong hithei hi. Huchih laiin, ei innkuan hichiah lou, I tanaute, I papite, I paneute, I nite, I nu’ nunglamte, I pite leh I pute, I nu pite, I nuneute khawng toh I kizopna a hoih in a chidamna hia chih etzui ding tuh innsuangtu nu leh pate mohpuak ahi. I kim leh kiang a tanau laina gentak louh I pianna nu leh pate nangawn mikhual, zin leh lengla bang a kisuanglah tak a koihkhak theih ahi. Numeite bang in i pasal sanggamte leh a tate bang uh hoihtak a kem in i enkolna hia? Ei nunglamte khawng kia limsak kha I hihleh, I pasal leh a nu leh pa khase law ding uhi. I pasal leh i tekpi-tekpu khasiat banah eimah mah zong minse lawtel ding hilai ahihman in pilvang chiat ni maw.
Kituamhui: Mi toh kipawl, mi toh kithuah, thu hoih thupha gen khawm, houlim khawm, miteng in maingap, polh nuam kichi mi om hi. A haupen leh neipen hi hetlou napi thil phal mahmah nek-le-dawn, a neih bangbang uh midangte nekngaih, hawmpah ziahziah. Khenkhat lah mi toh kipawl khollou, amau om-om a om, a nei lou hihet lou, chil-a-chil, a deih nawn louh na-ngawn uh mi piak sawm vetlou. Amau a te thei mahmah, midang a leng a poimoh lua ahihkei leh sawk sawm lou. Tanaute na-ngawn in leng sawk thei lou, kawm thei lou, hi tuptup, hi supsup chih bang leng om hi.
Laisiangthou A Kigelh Khenkhatte: Lev.25:35 Na unau a hong gentheih a, nang a honbelh leh na kep ding ahi. Mikhual ahihkeileh khualzin bang himahleh amah na kiang ah na teng sak ding ahi. Kuama’n I tel louh himahleh i tankhak haksatna leh buainate I tuah chiang a kinepna leh i lamet tuh u-le-naute ahi. Pasal tamtak zite ziak khawng a mahni sanggamte kep ding zah a kem ngam lou, don ding zah a don ngam lou. Innsung bang a leng zite a lamte inntek mahmah, mahni nu-le-pa leh sanggamte bang pau ngam lou, asia-apha le gen ngam lou a koih khawng om theih hi. Pasal tengteng vaihawmsiam hivek lou ahihman in numei pilvangte’n panpih siam mahmah nawn uhi. Ei gingtu Khristiante tuh u-le-nau, sung-le-pu kal, beh-le-phung kal mai hilou mikhualte tung a leng siam suah ding a lamette I hi uhi.
I tung a kinga mohpuaknate ginom leh muanhuaitak a sep Khristian gingtute adi’a kilawmhim ahi. 1 Tim.5:8 – “Himahleh kuapeuh in amah mite ading a ngaihtuahsak kei a, ama innkuante khol houh a ngaihtuah sak kei leh, ginna a zuausan a, ginglou mi sang in a gilou zaw hi.” Hiai in a gennop, gingtute tuh mahni mite leh innkuante taksap ngaihtuah saktu, petu leh guantu a hih ding chi ahi. Tuabang a ahih kei leh ginglou mi sang a gilou zaw a seh hilai ding chihna himawk hi. 1 Jn. 4:20 – Mi’n “Pathian ka it” chiin a unau haw leh amah zuau thei ahi, a unau a muhsa bawn a it ken, Pathian a muh ngei louh pi bangchin a it thei di’a? Pathian i itna hong kilatna ding tuh thilhih leh nasep ah, biakna leh thilpiak ah, kia hilou in unaute leh midangte i itna ah hong kilang ding chih ahi.
Thukhitna: Kikhenna ding leh kithupisakna ziakin bang mah hih kei un; lungsim niamlak in mi chih in amah sang in midang hoihsa zaw hen. Na lak ua kuapeuh in amah ading kia en lou in, midang a leng en sam hen (Phil. 2:3-4). Thilhih chiang a pilvanna ding hiai ah muhtheih in om a, kipahhuai mahmah. Khatvei vei hehngoh kawm a hih chih bang, a huchihleh en leng hihsuk mai ding chi zawng a hih hetlouh ding, lungsim niamlak in michih in amah sang in midang hoih sa zaw hen. Eilawi ate bel eimah dik kisa, hoih leng kisa, himahleh Pathian thu in bel midang hoih sak zawk ding chih a hon hilh. Lai Siangthou sinsak zui thei chiat di’n simtute, na vek un, TOUPA’N hon vualzawl hen aw!
