Natna thuaklahhuai mahmah, a thuak khate kia in a natdan a theihsiam natna chikhat ‘depression’ (kipiaksiat-natna) kichi maituah khak a, gum thuaksuah dan ka hon gen ding. Mitdel saipi zawtkhak bang in tuah khak dandan kua hiam in phattuampih khak leh chih ngiimna ahimasa hi.
Na taksa a nat chiang in a natna mun om a, mundang na lou hi. Na lungsim a nat chiang in na pumpi zeelsuak vek a, tawlhuai chih kan gentheih louh hi.
Kipiaksiat-natna in mi sukkhak dan tuamtuam om kha ding. Kei tuah khak bel thil khat kia ngaihtuah gegu na ahi. Thildang bangmah kingaihtuah theilou, huai kia lungsim a om dedu. Ihmut chiang na-ngawn a huai mah, ahihman in ihmut ding bang lithuai petmah sek hi. Lungsim tawl pen in i pumpi tengteng sukha ahihman in na petmah hi. A natna mun kitheilou natna, hiai muntak ana chih chet gentheih louh lungsim natna ahi. I lungsim ei thuneihkhum theih a omlou in thil i ngaihtuah khat kingaihtuah gegu, kikhek theilou ahihman in tawlhuai petmah chih kan gentheih louh hi.
Natna hong uat hun deuh bang om in huai hun ah ki-op mai hi. Office nasep lai hon phak chiang in ka Server room ah phek phah in ka lum top mai zel hi. Huchilou kal in leng ngaihtuahna kikheng thei tuanlou, sawm ek-ek a leng phatuam lou hi.
Lungsim nat mahmah hun chiang in kahkhiak zoihzoih mailouh a loh ding dan omtuan lou! Himahleh hiai natna apan ka dam ni om ngei ding chih bel ka tup hi gige hi. Chimoh lua a Pastor khenkhat i phone chiang in k’on na thumsak ding chi uh. Huai hunlai tak in hon thumsak le uhzaw nuamtuam law ding zaw hive’n!
Hun khat lai a kipiaksiat-natna a tuaksa khat ka phone leh hon theisiam mahmah a, phone tungtawn mah in thumna hon neihsak hi. Aw, huai thumsakna in khamuanna hon piakdan ka damsung in ngilhngei kei ning! Huchibang panpih ngai na tuah leh zaw huai hun geih mah in thumna neih sak teitei in aw.. Jesu min in k’on ngen .. Phattuampih law ding ahi!
Ha na pen ha natna veikhate mah in a natdan theisiam uh. Kipiaksiat-natna na tuahkhak zenzen leh ana tuaksate mah rawn in aw.. hon theisiam in hon panpih thei pen ding uhi.
Ngaihtuah khat ngaihtuah gegu chih thahah naak tawlhuai law petmah ahi. Pathian kiang ah damna ngen, thumna naak pitak a nei. Himahleh dampah geih hetlou. Gilna damdawi nek khit phet chiang in kidam pah hetlou dandeuh ahi. God will heal but He takes His own time to teach you lesson. Lungke kei in, Pathian in hon damsak ding chih ginna toh pang trintren a mualsuah zoh ding natna ahi. I’m a living proof to that fact!
Thumdam thei a chihte uh kithumsak lechin dampah ding chi uh. Damna deih I hihchia naih pah, maitam ah sum a chih zah uh luikhia, kidampah tuan hetlou! Sum bel a hon ngetzah uh dam ut I hih chiang a iai lou a kipepah ahi. Thil dik hia diklou chih bel simtute ngaihdan om pen dik in ka pom hi. Chimoh-tongkhong dinmun a kiding kha hiven!
Lungsimlam-suite gendan in kei tuahkhak kipiaksiat-natna damna ding in kha 10 apan kum 2 kikal luut sek chi uhi. Pathian loungal belh ding neituan lou I hih chiang in thumna toh damna ngen tou ngitnget. Dam pah tuanlou! Setan kiang a tai utsam lou I hihchiang a lungke lou in lam-etna toh thumna neihtouh ngitnget himai.
Khovel siamna neite’n kha 10 beek vei ding a chih pen uh kha 8 zoh in ka dam hi. Pathian in kha nih concession hon pia ahihdan ka theisiam hi. Van-gik pua ngakkhiak mah bang in kizaang hiheuh, anopdan-anopdan!
Sinlai ka zilkhiakte:
1) Na lamette pan limsakna na tan keileh zong Pathian in hon nuse kei ding a, midang hon panpih ding in honsawl ding ahi.
2) Hiai bang hun ah na lawmte, lawm diktak leh lawm diktak hilou hong kilang chet ding hi.
3) Buaina genkhiak lam ah pilvan ahoih. Ngia belam vun silh tuahkhak theih ahi. Tua bang na tuahkhak leh na zumna ding hon thawnpiak ding uhi.
4) Dam pah ding lametna neih tawlhuai ahi. Pathian in hun asak chiang a dam ding chia kha petzen apan ding.
5) Ni khat hin ding sawt/ sau na sakleh dakkal khat in hing in, dakkal khat zoh chiang dakkal dang khat hinglai ding in panla zel in.
6) Ahihtheih liai leh ei kia omlouh ding ahi. Ei kia a om pen thuak haksa diak ahi.
7) Hiai natna pen a tuaksate kia in theisiam ding uh a, huaite mah kum le chin hon panpih thei in hon makaih siam zaw ding uh.
8) PATHIAN kha polhna kingah mahmah daih hi. Huai hun a Pathian in Thu hoih hon piakte, hon houpihnate ka na gelhkhiak khak louh tuni tan ka kisiikna pen ahi.
Toupa’ nong itna lian hi… Lamet bei a ka om in, lamet na thak n’ong guan a… Ka kha zongkhal leh bah a, Nang ngai a gilkial dangtaak; N’ong muh chiang hinna tuikhuk ah n’ong pi zel… Hallelujah!
…..
*Thugelh hon petu, EBCC Delhi a Tuailai Pawl leh Media Team a kizangsa ahi. Lungdam lua hang.
