Pathian thu May 7,1910 in i na za pan ua, i theih louh luat man un atung in bel i na deih bawl kei uhi. Himahleh Manipur gam neitu inntek Meiteite sang in i kiang hong tung nanung zaw mahleh a phattuampih masa a I pan man un Toupa min i phat uhi. Tukum tan ah Pathian thu kum 110 sung bang kemta in, hotdamna leh tangtawn hinna i tan banah gen seng louh lam chi tuamtuam ah hamphatna i tangta uhi. Ahun toh kituak in kemtu muanhuai kichih ngamhuai ding mah ahi dia’m? A thuneitu Pathian a lungkim in hih hoih hon chi diam? chih ngaihsuttham ching mahmah thu ahi. Kivelchian chiat ni.
A. Pathian’ Thu Tuh Thuhing Ahi:
Heb. 4:12 - Pathian thu tuh ahing a, thil ahih thei a, namsau hiam tuah bang chi bang sang in a hiam a, hinna leh kha, guh loi leh guhngek tuam khen hial hel khop in a sun thei a, lungtang a ngaihtuah leh tupte a theipah thei hi. (Thu hing, thil hihtheihna thupi leh lamdang tak nei kemtute mi hampha I hi uh).
B. Pathian Thu Tuh Thusiangthou Ahi:
Sam 12:6 - Toupa thute thu siangthou tak ahi a; dangka leitung a haltuina mei a etkhiak a, sagihvei hihsiangthou zohsa bang ahi. Pau.30: 5, 6 Pathian thu chiteng ettel ahi: amah a muangte ading in lum ahi. A thute ah behlap ke’n, a honsal dia, zuau thei a muh in na om kha ding hi. ( Behlap het louh di ahi).
Pathian thu tuh kang mang thei mei bang, suang sek phelna sek bang, lum leh phaw bang, nitna siang sak thei tui bang, mi hinna pumkhek thei, damloute damsak, misi kaithou thei leh adangdang.
C. Pathian Thu Kemtu Tuam Tuamte:
1. Noa: Gen.6:8-14. Ama’ hunlai a leitung dinmun – Pathian’ mitmuh in lei a sekhinta-a hiamgamna in a dim khinta. Sa tengteng in a omdan uh ahih sekhin uh. “Ngaiin lei amau toh ka hihmang ding” Pathian in Noa kiang ah a thuguk, leitung mite siatna ziak a gawt a sawm thu a gen hi. Noa leh Pathian kizopna: Noa midik ahi a, Toupa mitmuh in hehpihna a mu hi, a dam tonpihte lak ah gensiat bei ahi, Pathian toh tonkhawm ahi. Noa kiang a Toupa Pathian apan thu hongtung tuh “Nang a ding in meilah sing in long bawl in” chih thupiak ahi. A thupepa a theichian a, muangtakin sel het lou in kum tampi gimtak leh tawl tak in a sem a, huai tuh amah leh a innkuan adi’a bitna a hong hita.
2. Abram: Gen. 12:1-4. Toupa’n Abram kiang ah, “Na khua akipan leh na tanaute akipan leh na Pa inn akipan pawt inla, k’on etsak ding gam ah pai in.” Hiai tuh Toupa Pathian thu Abram kiang a hongtung ahi – pawt khiak san ding, a khiaklahhuai mahmah mun thum leh theihngei nailouhna gam a mikhual hiding a pai ding. Hiai a Toupa thuchiam manphatak tuh – “Chi thupi mahmah in k’on bawl di’a, na min ka hih thupi ding. Nang vualzawlna na hi ding. Nang hon vualzawlte ka vualzawl di’a, hon hamsiat peuhmah ka hamsiat ding. Nang ah lei a namchih vualzawl in a om ding uh” A chi hi. Toupa’n a kiang a a gen bang in Abram a kuankheta. (Paina ding lam le theilou a kipankhe top ngam ahi).
3. Sawltak Paul: Rom. 1:16. Tanchin hoih tuh ka zahpih kei a; kuapeuh a gingta phot adingin hotdamna ding a Pathian thilhihtheihna ahingal a. 1 Kor.9:16 - Tanchin hoih gen mahle’ng kisaktheihna ding ahikei hi. Hihlouh theih louh ka tung a kinga ahi; Tanchin hoih gen kei le’ng ka tung gik ding ahi. Keimah ut thu a hih hileng kipahman ka nei hi, himahleh keimah ut thu ahih keileh Tanchin hoih kepna nna piak a om ka hi. (Paul in tanchin hoih a zahpih kei a, a kepna ah leng ginom takin pang hi).
D. Pathian’ Thu Kemtu Muanhuailou:
Jonah: Amittai tapa Jonah kiang ah Toupa thu a hong tung hi.”Thou inla Ninevi khua, khopi thupitak ah hoh inla, atung thu kikoupih in; a gitlouhna uh ka ma ah a hong tungtouta hi” a chi hi. (Jonah 1:1-2). Himahleh, Jonah bel Toupa ma akipan Tarsis ah taimang ding in a thou a, Joppa khua ah ahoh suk hi, Tarsis zuan ding long a mu a,huchi in a tuan man pia in, Toupa ma akipan Tarsis zuan dingte toh ton ding in long ah a lut suk hi. (Toupa apan taimang sawm in, a sawl louhna lam ah apaita)
E. Jonah Ziak A Hongpiang Haksatnate:
1. Tuipi a huihpi hat mahmah hongnung
2. Long tamzak ding bang a hong om
3. Longmite’n lau a, amau pathian chiat sam
4. Long zanna ding a vante tuipi a paikhia
5. Aziak theihna ding a aisan uh, Jonah tungtu
6. Jonah mah leng tuipi a paih khiak a hong om
7. Ngapi gil sunga ni 3 leh zan 3 om ngai.
(Longpute leh a sung a tuang tengtengte tunga mangbatna tuntu Jawlnei Jonah ahi).
Pathian’ thu kemtu muanhuai, gahsuahsaktu, metsaktu, pungsaktu hi thei ngei ding in simtu tengteng a Thu neitu i pa Pathian in na vek un hon vualzawl kim chiatta hen. Amen.
