“Huai mite’n nidanglai a Noah damlai a long bawl sungteng a,
Pathian thuakzohna in a ngaklai in thu a mangkei ua;
huai long ah mi tawmchik, mi giat tui apan humbit in a om uhi.”
I Peter 3:20
Hun tuh tuiluang bang ahi akichi sek hi. A hingut ngei a tuiluang bang a tai liam zungzung mai a, nunglam ense lou in tum vengveng mai hi. Hun in ngak chih a nei himhim kei hi. Himahleh dohzohna leh toh hon ngak khat om ahi chih I ngaihtuah kha ngei dia aw? Huai pen le achih hun hong tung leh kikhelmai ding hi. Amah tuh Pathian ahi.
I Laisiangthou pansan a kipan a ngaihtuahna hon dawt kha cheuh khat i mit vakna ding ahihkhakleh hun tomkha ngaihtuah zual leng chi in i kichial hi. Hiai Laisiangthou tang in tuh tampi gen louh a leng gen chiang law khin hina zenpi i theihsiamna ding in hiai bang in gen ni.
Pathian zahngaihna leh thuakzohna leh dohzohna honhilh ahi chih kilang hi. Noah long bawl sung mi tengteng Pathian in thuakzohna toh ngak kinken ahihdan i mu hi.
1. Leitung vai – History sutsawm lou, theihsiamna din ah tamlou. Civilization bangzah hiam kikhekta, period/ Age hunbite bang zah hiam kikhekta. Kidoupi leng nihvei omta, kialpi leng bangzahvei hiam tungta, kial lellel omlai. Hiipi (Epidemic leh Pandemic) leng tung zelzel. Tua I tuahlel Covid-19 leng a kigen 1918 vel a Spanish flu nung leitung bup in a tuah ahi (kum 102 nung). A kal ah hii (hiipi) leng gen ding om tham hi. Thiltungte I etkik leh a tun hun om a, tung denlou in ven hun leng om hi. Hiai Covid-19 leng hong veng hun om di’a, bang pandemic dang leitung in a maituah nawn di’a gen thei khang maw.
2. Laisiangthou – Pathian in numei kiang ah na suan in gul lu khen sidup ding ahi achi hi. Laisiangthou ah, Adam akipan Noah, Noah apan Abraham, Abraham apan David, David apan Jesu Khrist hongpian tan leh Jesu van kahtou a leitung hong kik nawn ding ahi chih Laisiangthou hon sinsak ahi. Hiai khangthu (Geanology leh Chronology) kimtak in sut zou kei ni. Himahleh thil omdan et in hun leh kum kezah dikgeih kei mah leh Jesu khang thu ah khang 70 val gen in om hi. Kum kezah zaw theihchet louh ahi. A tangpi in kum 40 vel kihal geihgeih hihtuak hi (Luke gen Jesu apan Adam). Huchi hileh Adam apan Jesu tan ah kum 4000 vel hidi’a gintak a chi uhi.
Pathian in numei suan, kumpigam/ gamchiam Abraham ah, Juda/David laltutphah David kiang a a gen tuh Jesu Khrist ah tangtung sak a, hong piang ngei hi. Hiai tan a bei a diam? A bei/ tawp kei a hun hongtung ding hun tawp/ nanung a gen hi, Kilakna laibu ah. Adam leh Evi te kiang a numei suan achih a kipan tunitan Pathian in dohzohna toh hon ngaklai hi ding ahi.
3. I tuppen ah lutta ni – Peter laikhak ah Noah damlai a long bawl sungteng Pahtian in thuakzohna/ dohzohna toh ngaklai achi hi. Tu hun in leng Pathian in hon ngaklai hi. Pathian in Laisiangthou a agente tungkim phial a khat in sam, Jesu leitung a hong kiknawnna ding. Van a kahtouh nung sawltak, nungzui Khristian masate’n lametna toh ngak uhi. Tampi dam nawllou uhi. Eilak ah leng khenkhat bang in I neulai apan kigen hita chi pawl bang om thei sek hi. Bang teng hileh tuni in nang leh ke’n ngaklai I hi, lungke kei ni. I lungkiak kei nak leh a gah mu ding hi hang.
Laisiangthou ah Noah in long a bawl sung kum 120 vel lut chi hi. Kum 120 sung Pathian in dohzohna toh huai hun lai a mite ngaak hi. Noah in zaw gen tham ding hive’n. Ne in, dawn in, kiteng in hun a zang uhi. Pathian in Noah long bawl a tuang di’a mite ngaak hilou ding in hon ngaihtuah sak hi. Amau long kibawl chiat ding a deih hiding in uphuai hi. A hun hongbei a kichai – the end – tuichim ah sivek uh, mi 8 keleu dam uhi.
Pandemic 1918–2020 (kum 102 kihal), Adam apan Jesu (kum 4000 vel hidia tuat), Isai apan Jesu (genkholhna leh tangtun hun kum 800 vel), Noah long bawl hun leh tuichim tuntan (kum 120 kihal), Jesu sihnung (kum 2000 valta).
4. Ngaihtuah ding – Kum bangzah I zang lai di’a? Kum 100 I nei lai dia’m? Na siman diam ahihkeh Jesu hong kik man dia’m? Noah hunlai bang in na bitna ding in hun honpia hi ding hi. A diak khol in innkuan bit ding deih in “Home Coming” hon bawlsak hi. Noah hun lai bang in nelai, dawn lai, kiteng lai (a kisia kibal, kikhen omlai), hun nuam zang lai hihang maw; kipahhuai lua.
Innkuan bitna ding in Jesu Khrist a long bawl hun honpia hi. Pathian thuakzohna in hon ngaklai I chi thei diam? Na inveng pa’n innkuan bitna di’a Jesu Khrist a long a bawl khit ding ngaak houh ahimai mah ding e. Na innveng pa leh a innkuan in bitna neita le uh kichai – the end maimah ding ahi. Hiaite khawng lungsim a hong om mahmah ahi. PATHIAN IN BANGTAN DOHZOHNA TOH HON NGAKLAI HIMHIM DING IN NA GINGTA TEL A EITA?
