Sawt lotel nai lou in damdawi kapna ding in glass syringe leh steel needle ana kizang a, disposable sysinge a omkhiak nung in leng, gam hausaloute’n sawtpi ana kizangtou lai hi. August 1976 in Zaire gam a Yambuku Mission mun a school headmaster, Mabalo Lokela in, mallam gamgi zul Ebola luidung tan, mission te toh tour a a paina uah gamsa (antelop) leh zawng sahou (dry meat) a lei hi. Ahong tunkik nung, September 1 in damlouh ziak in mission hospital ah a hong ki-ensak hi. Hoih deuh zel mah leh dam zoulou in, September 8 in a si hi. Huai hospital ah syringe 5 (glass) a om a, niteng in damlou 300 apan 500 damdawi a kikap gige uhi. Sawt lou nung in natna theih ngei louh in huaikim ah mi a hong china ua, tampi a si uh. Huai natna tuh a khonung in Ebola chih minvuah a hong hi. Mi 318 damlou lak ah 280 a si uh. Hospital staff te 17 lak a 11 a si uh - nurse Belgian 2 leh a gammi 1 tel in. Hospital leng khak ahi. A tawp in WHO honglut a, tenna khua te quarantine a bawl ua, pan nakpi a a lak nung un natna dal zoh a hong hi. Huai nung tuni tan ah hiai natna hii 26 vei a lengta. A nanung pen hun (2014) in damlou 28,616 lak ah 11,323 a si uh. Vangphathuai tak in hiai epidemic west Africa polam a tung man kei.
Natna hiileng khatpeuh in mun khat a mi tampi a chinat sak chiang in epidemic a kichi. Hiai pen mun lianpi, gamdang tan a a kithehdalh sawn chiang in pandemic a kichi. Khovel a natna tampi omte lak ah a khenkhat ziak in mi tam a si kholdiak. Tuberculosis ziak in mi billion 1 leh Malaria ziak in mi billion 50 bang sita dan a chiamteh ahi (Oct.26, 2014).
Khovel khangthu ah epidemic kumteng in a om gige a, pandemic leng tampi vei ana omta hi. Tu laitak a om, pandemic nanung pen, Covid 19 khovel pumpi a tung suakta. Mihing 10,14,128 in a vei ua, 53,069 te a sita ua (2/4/2020), huai leng a minute teng in a kibehlap hi. Manipur ah tutan in a vei 2 theih khiak a hita. Vangphathuai tak in a nih un mundang a hong kipan ahi uh (imported).
Pandemic tungsa thupi deuh 7
Sumphuk (smallpox) - Sawtpi tak, kum 1000 val zen, khovel ah a na om a; a hat mahmah a, baihlam tak in a kilohsawn theih a, khovel pumpi ah hinna maktaduai 300-500 ana nuaimang hi. Vaccine a hon mukhia khongkhong ua, huai nung hiai natna a hongkiam pah hi. Tu in 1980 nung hiai natna lauhuai khovel ah muh ahinawn kei. Upalamte leh kum 50 lam mite a ban (arm) veilam uah “ban-atna”pawn a kimu thei lai ding.
AIDS/HIV - Hiai natna a kimuh khiak(1976) nung kum 5 a kipan 2014 tan in mihing maktaduai 36 val in a sihloh man uh. Himahleh mihingte pilna akibehlap dungzui in tuni chiang ah hiai natna hik paai kawm a dam mihing maktaduai 31-35 bang khovel ah omta uhi. A tunglai in a veimite midang in kiten (kimullit) mahmah hi. Theihlouh ziak in damlou kepna leh sihna tan in tuamkoihna thupi tak ana om hi.
Flu Pandemic - Hongkong ah July 13,1968 a hong kipan in ni 17 sung in Singapore leh Vietnam a tung a, kha 3 sung in Philippines, India, Australia, Europe leh USA a tung. Hongkong ah mihing nuai 5 (mi om teng lak a 15%) a that a, khovel pumpi ah mihing maktaduai 1 a si uhi (Mortality 5%).
Asian Flu - Hiai natna China (Guizhou) ah akipan a, kum 2 sung in Singapore, Hongkong, USA tan tung a, mihing maktaduai 2 (USA ah 69,800) a si uhi (WHO).
Flu Pandemic (1918) - Mortality rate sang mahmah (10-20%) hiai natna khovel pumpi mihing 1/3 in vei zou di’a gintak ahi. Hiai pandemic ah mihing maktaduai 20-50 a si uh. Huai malam 1889-1890 in leng Flu Pandemic ana omta a, huai hun ah mihing maktaduai 1 ana si uh.
Cholera Pandemics - Cholera epidemic khovel ah kumteng in gam khenkhat ah a om a, mihing maktaduai 1.3 apan 4 in a vei ua, 21,000 – 143,000 in sih loh zel uh (WHO). Kum 200 paisa sung in cholera pandemic 7 vei bang ana omta a (a huaise pen 3na ahi), huaite 1na, 2na, 3na leh 5na India a kipan ngen ahi uh. Hiaite ziak in mihing maktaduai 40 a na sita uh (Oct.26,2014).
Plague Pandemics - Hiai natna hii leng in mi tampi petmah (maktaduai 240) ana that. Hun tuam ah min tuam ana nei a, Black Death (1346-1353), Justinian Plague (541-542), Antoinine Plague (165) chihte. A hat laitak in Constantinople ah ni khat in mihing 5000 si zel uh chi a chiamteh ahi.
Mailam Etna
Covid 19 toh kisai tam kitheichian nailou a, huaiziak mah in pilvan sem ngai hi. A damna ding damdawi ding a om kei a, kivenna ding vaccine leng a om tuankei.
Thiltungte et in “kisakkholh hun” ahi mahmahta. Mimal leh mipi’n theih tuak, kisinsak tuak tampi om hi. Khosung ah panlakna ding hun hoih masa khahsuah hita in ka kithei, mipi omkhawm hun a hinawn kei. Heutute hong kikum ve ua. Khosung mi kuapeuh zat theih theih kisuanglah lou a zat ding ahi. Kei mimal ngaihdan in YPA heutute kan a hithei ding ka thei kei. Nek ding kaihkhawm tuh a poimoh masa ahi. Hile leng mi tengteng theihsak ding, zilsak ding tampi om ahi. Thei in thei kei le leng hon bin phut ding ahita. Ngak thoh di I hidiam, om maimai ding I hidiam?
Ka mipihte bang a i ngaihdan uh? (Sutzop di)
…
Note: Covid-19 hiipi tungtang, eimi doctor te’ thugelh kimu tamlou hi. Bungmual khua a om, heutupa (Upa) Dr Paul Ginthang, hun khat lai a Medical Suptd., District Hospital, Lamka lenkha in a gelh Bungmual Weekly News a kisuah a kimuh ciang in manpha kisa hi. A gelhtu, doctorpu lemsakpihna tawh tu in DEW ah suahkik ahi (beu masa hiphot). Thugelhpa leh simtute TOUPA’N navakna hongpe tekta hen!
