Johan 8:32 - huan, thutak na thei ding ua, thutakin a hon suaktasak ding, a chi a.
I Johan 5:11-12: Theihsakna tuh hiai ahi, Pathianin khantawna hinna a honpia a, huai hinna tuh a Tapa ah a om hi.
Tua Tapa nei in hinna a nei hi; Pathian Tapa neilou in hinna a neikei hi.
A itna toh honkem tawntung Toupa Khamuanna na tung uah om chiat hen aw. Hun haksa ah i ding a, i hunpaisa bawl thak ut mah leng bawl thak theih ahinawn kei a, hun hong tung ding ah leng thu neihna khat lel leng i nei kei hi. Huchi kawm kal ah i pianpih khelhna leh i hih khelhte hon bawl diksak thei a, i tangtawn hun zat ding hon kheksak a hon bawl lem sak thei Pathian i nei a hampha i kisa mahmah hi.
Lenna/ Vanleng (aeroplane) i thei chiat a, vanlai zawl a lentheihna ahi chih tuh a theilou omlou ding hi. Himahleh lenna na theih mawk ziak a vatuang guih theilou na hi. Na tuan theihna ding in tuan phalna ticket na neih ngai ahi. Khovel ah theihna manpha mahmah a huai mah bang in neihna/ neitu hihna leh neih a omna manpha kholdiak hi.
I thupi zat leh Laisiangthou pansan in mihing salam leh khalam poimoh hiai bang in sau lou in ngaihtuah khawm le’ng ut huai i sa hi. Theihna a hoih mah bang in neih leng a ngai hi. Khovel vai ah theihna, pilna nei mahle’ng sep khiak theihna ding in tanmun nei tuankei leng i theihna tuh manpha hetlou suak thei hi. Midangte panpih hoih ahi, haksa thuakte dopsang ding ahi chih thei na pi in huai ding a panlak theihna ding a poimoh nei kei le’ng i theihna panna bei suak ding hi. I tup tuh theihna leh neihna poimoh tuak a, himahleh khalam vai ah theihna keleu in bangmahtan hon tunlou ding ahi chi nuam i hi. Unau Laisiangthou in Jesu Khrist hihna chiangtak in hon hilh ban ah thugen leh chialpi tungtawn in i thei mahmahta hi. Jesu Khrist hondampa ahi, huai thutak ahi a himahleh nang a ding a hondampa di’a na san kei a, na neih kei leh suahtakna, hotdamna, pianthakna nei tuanlou ding na hi.
Thei kelkul napi a neilou phing chih om thei hi. Theihna tuh neihna ahikei a himahleh na neih tuh na thei in na zang manpha thei lai hi. Theihna lel in vangam hon tunlou hial ding ahi chih ngaihtuah leng ut huai i sa hi. Mi, Jesu Khrist a thei a aneite hinkhua kilamdang ahi. Ngaihtuah sau zek le’ng uthuai i sak tuh suahtakna, hotdamna om ahi chih na thei a, huai thutak tuh Jesu Khrist ahi a na neih poimoh ahi. Thei ngal a neilou chih omthei a himahleh nei gegu a theilou chih om thei lou ahi. Salam thil ah leng na thil neihsa mangngilh chih om thei a, himahleh na phawk khiak hun om teitei sek hi. Huai mah bang in khalam vai ah bel neih gegu tuh kimangngilh sak i hihkeilebel thei lou chih om thei lou hi. Unau tuni in na ngaituahna vaksak thak mah dih, na theih na neita hia? Huaiziak in i Laisiangthou pansan ah tuh thutak theihsak in i om a, theihsakna (notice) piak in i om hi. Huai thutak thei a, Tapa a hinna om ahi chih na theih nung a na neih kei leh theihsakna nang a ding a manna bei suak ding hi. Theihna in neihna hon tut ngeingei ding ahi. Huai mah Pathian in a deih ahi. Thei ngal a neilou a na om leh kuamah, Pathian tel in na mohsa thei kei ding a, huai naksang in nang amoh kikhuk ding na hizaw hi. Unau tuni in i kichial thak hi, na theih tuh na neih poimoh ahi. Toupa’n theisiam leh nei kichian dingin hon ompih chiat hen aw!
….
*Thugelh honpia (Pastor Vanlalhminglian), Dec 2013 a Pastor ordination la, College Veng New Lamka; Lungchin (area pastor station), Singngat Division cihte tot zawh nungin Local Pastor, Shillong (Seem lel). Covid-19 toh kisai a’ etdan: Khovel vai ah hun haksa (natural disaster) chi khat ahi. Mihing pilna leh siamna, neih-le-lam in hihtheih neilou. Khalam/ Pathian thulam ah, Pathian thil hihtheihna leh thupina kilatna, a thu genkholh - hun nanung chiamtehna. Amah lam a kikna di’a chance hon bawlsakna leh a damna ding leh mihing bitna di Pathian thuthu ahi chi in ka na ngaihtuah. Khosakna lam ah, kikhekna nasatak hontun a, maban saupi hon hetkha ding in kilang hi.
