Selung mawl ka hi lou, vabang pil ka hizaw,
Mihing muan sang in Toupa ah ka muangta;
Milian gintak sang Ama’h ginna ka koih,
Ka omdan ding Ama’n a theizaw ngal a.
Khamuang in tawldam hiuhiauta ning
Thildang bangmah ka ngai nawn lou e….
Ka neih Jesu ah bangteng bukimta hi
Kei kan a hampha om tuan dia’m aw…
Ka limbelh Toupa lah toute Toupa ahi,
Amah ah taksap kichite om ngei lou;
Khovel theihphak louh tangtawn inn nuam anei,
Tua ah teeng sam ding in kei ahon chial hi.
Ka biang a mittuite pahna ziakin luangta,
Taksa gentheihna ka kha tawldamna;
Ka lei gimthuakna vangam hon ngaisaktu,
Leigou ka neilou zong Vangou di’n honngaak.
Tangthupha tangkoupih ka nekmuhna ahi,
Amah deihlam sep ka damsan ahi;
Amah min suang a ka kalsuanna peuh ah,
Khutvuak in hon thawn kiksak ngeilou hi.
…
https://www.youtube.com/watch?v=UQ213zVzbfk
Laa Hong Piandan:
Naupang neuchik ka hih apan a ka na lunglutna leh ka na tup gige tuh Pastor hih ding chih ana hi sam hi. Pathian hehpihna leh zahngaihna tungtawn in Kum 2009 in Pastor, EBC Pawlpi tawn a seem di’n laak in ka om hi. Kum 2010 in heutute’n EBCC Hebron, New Lamka ah Pastor Assistant ding in honkoih ua, hihtheihna bangbang toh Toupa gam nasepna a kihel a ka hong kal suan chiangin, ka na ngaihtuah leh suangtuahna khenlam ah Toupa’n honpi in - Kipahna, lungnopna leh kithalopna in ka dim hi. Hampha ka hihdan bang, Tanchinhoih nasepna nuam leh lungluthuai ahihdan khawng ngaihtuah a ka suut lai in, Toupa’n hiai LAA honpia hi. Kei mihing pilna leh theihna toh hiai bang LAA piang ngeilou ding himahleh Toupa’n ka hinkhua a thiltuahte leh A gam nna sepna tungtawn a hichibang LAA hon piak ka ngaihtuah chiangin, mite adi’n bangpi lua hi kholkei mahleh kei adi’n bel thupi in manpha ka sa hi. A lamdang mahmah tuh Toupa’n a thu di toh a kaih (tune) di toh hon piakkhawm ngal ahi. Hiai laa tungtawn in Honpetu Toupa kia in thupina tengteng tang in Amah min pahtawina dingin poimoh a sakna munte a hon zatsak zel leh chih ka thumna ahi.
Laa thu omdan genchetna:
Pathian in mihingte deihtel theihna zalentak honpiak tungtawn a Toupa Gam nasep ka na teel leh sem ding a ka kipiakna, banah bangkim ka om dingdan kei sang a thei zaw Pathian muang a Amah a ginna ka koih tinten pen hihkhial lou ka hihdan A’ nna ka sepna tungtawnin hon ngaihtuahkhe sak dundun hi.
Toupa muang a ka belh pen in taksap kichite a neih louh banah, Amah toh tengkhawm ding a hon chial lai ka ngaihtuah chiangin “Thupi hina tel e”…! chih hon ngaihtuahsak hi.
Hun paisate a lungkhamna leh khasiatna te ziak a khitui luanni a tamdan khawng ngaihtuah kawm in, tu hun a khitui luannate lungkhamna ziak hi nawnlou in Toupa Gamthu toh kisai a kipahna ziak a luang hizawta. Taksa hinkhua ah gim kisak hun, tawl kisak hun om zel mahleh lungsim a tawldamna pen manpha lua hi. Lei gentheihna leh haksatna hongtung zelte’n manoh ding Gam hon ginna a hon suangtuah sakin tun ding kal hon ngaklah sak hi. Lei ah bangmah neilou in khosa hi leng le, Van ah gou din/ Kipahman ding honngak ahi chih khawng ngaihtuahna hong lang in lungnopna leh Khamuann hon pia hi..
“ Tangthupha tangkou pih ka nek muhna ahi” chih pen lungsim leh ngaihtuahna lou lamah soiselna ka tuak zeuhzeuh hi. Khenkhat, nang na nekmuhna ding lel a Pathian gam nna sem nei ve maw chia hon enghou simsim bang le ka tuahkhak hun om zeuhzeuh. Paul in Korinthte a laikhakna a, “Toupa’n Tanchinhoih gente nek muhna dingin Tanchinhoih mah a sepsak hi” (I Kor.9:14) ana chih bang in -Toupa’n Tangthupha genna nasep honpiak pen ka nekmuhna ding a hon sehsak ahihmanin, Ka damsan leh hinsan tuh Tangthupha genna leh A nna sepna ahih ding, ginomtak a sem a thildang kisukbuai sak louh ding chih puankhiakna lam hizaw hi. Toupa min a kalsuannate ah - Ama’n a thon in hon kiksak ngei lou in, Amah min ziak mah in, itna deihsakna hon tangsak lai hi. Khrist ziak a ka hamphatna leh Ka ngaihtuahna khenlam a Toupa’n honpidan ngaihtuah a ka suutsuut chiangin kipahna luanglet tungtawn in hiai LA hong piang hi.
“Kha muangin tawldam hiuhiau ta ning” chih pen taksa tawldam tak a lungmuangtak a om hiuhiau ding chihna hilou in, Lungsim ngaihtuahna a tawldamna leh lungnopna toh Toupa Gam nna sem ding chihna genna ahi. Poimoh, taksap bangkim kiningchingtak a a hunhun a hon kithuahpih a hon pethei Jesu Khrist neitu leh A nasemtu khat ka hihsamna ah hampha kisakna lian mahmah. “Kei kan a hampha om tuan dia’m aw” chih in “ Ka Neih Jesu Khrist kisaktheihpihna leh Lei leh van siamtu Pathian in A sikha leh nasemtu di’a kei bang leltak hondeih a hon telna pen thil lamdang leh maktak ahihbanah hamphatna tawpkhawk tang ka hi chih genkhiakna ahi.
Thukhupna: Toupa Gam nasepna ah ‘mihing gam a’ omlai akihihmanin, khatveivei bah hun, chauh hun, lungkiak hun a hongtung zel hi. Tua hun in kipahna leh lungnopna nei zoulou a, kithalopna himhim nei zoulou a ka om hun chiang in leng Toupa’n hiai LAA honpiak tungtawn mah in leng hon houpihin hon hihhat thak zel hi. Kei bangmah hikei mahle’ng, Laa hon petu a thupi manin, Toupa’n poimoh leh kuul A sakna munte ah hoih asak bang in leh A min thupina dingin hon zatsak ngei ding chih ka lametna leh ka thumna ahi. Chitna hoihna suan ding nei hetlou himahle’ng, Toupa’n A sikha mantaklou pen tungtawn a hiai Laa honpiak lamdang leh thupi sa in, Hon petu Toupa min phat in Thupina tengteng Amah ka pia hi.
