DOTNA: Bible lam a pailou a, secular lam a pai hileh hiam mahmah ding ahi ahon chi ua…
Pastor Biakson: U Thuam in ah honna ensang kha mahmah a, ka kipak. Kei khah bangmah background le neilou, gen di le omlou ahi. Ka hiam mahmah diam ah i theikei. Den a kisin n’on chih ua leh tuh kisin khat ka hi. Class X Hermon English School (Bungmual) a zou ka hi a, high school - singtanglam toh half-half a kikhen a hichia zou tou ka hi. Huaiziak in theihna ah leng nakpi a siam ka hi hetkei a, kei-le-kei kisin mah ka na hi. Class X ka pass tan inle grammar bang theilou kei vo’i, thei hetlou. Theilou kisa ing a, a khonung a ka zilthak, kei-le-kei a kizil thak. Huai lai high school kai tunglai khawng a TR Bhanot kichi hive’n, na theikha ding uam ah, ka mitkha ah leng alang lai. A yellow, a red, a blue hiam khat a hichi’a gial belbal khat TR Bhanot kichi, kei-le-kei a kisintouh thak ka hi. Parts of speech I chihte bang, chih khawng ahihkeileh a kizatna bang chih khawng, present tense, future tense chih khawng ka kizil thak, kei-le-kei a ka kimuhsuah thak ahi.
Huaiziak a huchi lampang a ka background khah bangmah gentak omlou ahihman in, kei-le-kei a kizong tawm, simtheih di omleh sim chihdan a hichia ana paitou in, graduate bang le CCpur College a graduate ka hi. Hichia thupitak a vakai kha le hi tuanlou, hih theih bangbang a kitoudelh a hichia sin mai ka hi. Sermon ka ki-prepare na di’n hun tam petmah ka pia. (Ka ji) Siamte inle hon theihpih di’a, ka ihmut lam le thei khollou di ahi. Huchi zahdong a ka kisak a leh le gen di bang khat veivei thupi hetlou hile’ng kilawm khawnga hong om ahi. Huaiziakin a gen siam hi mahmah lou maw, nakpitak a ka pan chianga gen di hong om chih di hia, tua khop a kei lam a ka bukimlouhna leh ka hatlouhna ka theihluat ziak in ka kisakhol a, a manuscript bang le (ka hatlai sungteng I chi hia, ka hihtheihlai sung teng) azik-azek a ka hihzawh kholkei di’a, sermon note neih tawntung di ka chih ahi, huai khah college a hon sinsak uh le ahi a.
Khenkhatte ki-senior sak pawl om inchin, sermon note le ka nei khol sam a, ka gen a hichi’n ah ka hih a achi ua, huaite le ka mohsa kei a, amau hihtheihna le om ahizel di’a. Kei tuh huchi mi ka hi kei a, hoihtak mah a ka gelhkhiak a huai pen anen-aham in va zui nawn kei lengle bawl khiak mah ka chiindan khat ahi. Huai omlouh chia’h ka lungkim theilou chihdan khat a om. Khat veivei huai hong detail lua in ka va zuihkhak chiang a khah hongsau kha sek maw; hong saukha sek in, ahun leh mun a khah gentomdan bang hong siamlou kik in huci’a tampipi, saupipi hong om suk kha sek ahi. Huaiziak in sermon ministry pen ka siam ka chikei a, hilele ka kuhkal a huai kha’h ka kuhkalna gah ah ka gen di hong om zel chihdan ahi. Huai kawmkawm in a zatdan leh apiakkhiak lam siam zou nailou ka hi. Huai le na hon thumpih di ua, kei bang le nakpitak a ka hong kisin touh lai ding ahi ding. A deliver lam kisiamzou nailou maw, hun zat bang le kisiamzou nailou ahi. Huai khawng ka hihtheih bang a ke’n le pan ka lak utna ahi.
Secular lam a na paikha hi le’ng, kei kha hiai a U Lalte (Mangkhanlal, NFI a seem) lawi dan khat ka ut ahi, social work lam pang khawng maw. Hichi’a ka lungsim a ka ngaihtuah chi’a Lamka zaang khawng kingaihtuah in, I ngaihtuahna dan khat I itdan I awlmohdan khat om inchin. Pathian in talent honpiak laa sak theihna toh Lamka khawng ah society adi’n bang hih theih om a chih bang ka khonung ngaihtuah (mihing I hihna ah). Hileleng Pathian hon sapna in tua lam leng a tuunkha vek a, khalam a kizang di’a Pathian in hondeih ahi a, huai hih thupi ka sa. Keimah kipiakna pen genlouh-a-mang (understood) hileh, ka gensek bang in kei hon kai ding gigetu, hon paitang sak gigetu ka nu hon thumsakna leh ka nu-le-pa hon piakkhiatna (dedication) ahi. Khat veivei kilampial ut simsim, ahihkeileh lunglenna bang kinei thou eihchu, hiai lam deuh/ huai lam deuh chih khawng maw. Kaam hoihtak kineileh chih khawng ki-ut thou, hilele, kisiik ding ka hi chih theikhin kei vo’i, conviction a maw. Denchiah ka lupna tung ah si ding kuan in om ngeingei le’ng, ka hinkhua enkik ding ing a, lungkimlou ding ka hi chih kithei. Pathian in hon sam ahi chih ka theichiang mahmah a, tua kawmkawm in ah ka nu-le-pa tungtawn mahmah inle sap a ka omdan, piakkhiat a om ka hi chih ka kimanghilh kei a, huai khah ka hatlouh ni khua a le hon hihhattu ahi chih ka hon gen ahi.
DOTNA: Innkuan, mi radar I chi hia mi focus point hihna ah…
Pastor Biakson: Huailam khah ke’n ngaihtuah hetlou, hichia we live as we are himai. Hichia hing himai in, mi impression bawl di’a le kisalou, hichia hing nilnial. Huai kawmkawm a akilawmlou tantan a le mi importance piak deuh ding bang, va maivil deuh ding bangle a kilawmtan omkha maithei (pastor hihna ah). Ahihkeileh hichia va polite deuh tuamna ding bang le om himaithei, huaite le siam tuanlou. Khenkhat in n’on muhdan un ah nuamtuam bawlzawk deuh nei in n’on mu di uam ah, ka theikei – huai lam ka hihkhak ding lau ka hi. Huaiziak a, a’ principle hiai ka zui uh, hichi’n ka hih uh chih di, family ah le khauh-a-khauh a omkei a, kou tuh hichia hing hipetmah ka hi uh. Pathian hehpihna in hon umkual himai ahi, chih kha ka hon gennuam ahi. (Sutzop di).
