Tukum 2020 Saptuam thupi khennenna, July kha ading “Pathian thu’ kemtu muanhuai” chih a hong hi nawn hi. Hipi ziak a biakinn a biakna nei a kikhawm thei lou a i om lai in leng saptuam a Media Team te phatuamngaihna leh kuhkalna ziak a DEW tungtawn a kithuzak thei a i om lai man un hon pitu Toupa Pathian thupina pia in Amin i phat uhi. Tukha thupi a bulpatna hiai anuai a bangin sau lou leh mawltak a pulak in, mahni om mun a sut chiat a phattuampih chiat ding zong I kideihsak mahmah hi.
1. Pathian Thu Tuh Thutak Ahi:- Phuahtawm thu hilou, kamsiam a genkhiak maimai leng hisam lou, khovel a mipil, laisiam leh laigelh siamte phuahtawm thu hilou PATHIAN KAM apan a hong pawt ahi. Isai 55:11 – “Huchi mah bangin ka kam akipan ka thupawt a om ding; bangmah hih nei lou in ka kiang ah a kik nawn kei ding a, thil hih ding a ka sawlna ah a lohching ding.” Pathian thu tuh Pathian kam a hong kipan, A hatkhiak thu ahihmanin, thutak, thu muanhuai, kingaknatham ching thu ahi.
2. Thu Hing Leh Thil Hih Thei Ahi:- Leitung mipilte leh tangthu gelhsiam tampite’n Pathian khutsuak, a thilsiamte sut in tangthu ngaihnophuai taktak hongelh zel mah le uh, a hong sawt chiangin thuthak hong om zel in, amasa pen a hongtul (lui) a, kuama’n a sim nawn takei a, a bei zel mai hi. Himaleh Pathian thu tuh a kigelh tung akipan tuni tan in leng, behlap ngai lou, paihkhen kullou, tulai hun toh kituak nawn lou chih leng om lou, a hinna a ngei, a thilhih theihna leng a ngei mah ahi. Heb.4:12 – “Pathian thu ahing a, thil ahih thei a, namsau hiamtuah bangchibang sang in leng a hiam a, hinna leh kha, guhlawi leh guhngek tuamkhen hel khop in a sun thei a, lungtang a ngaihtuah leh tupte a thei pah thei hi.” Lungtang a i ngaituah leh tupte na ngawn a thei PATHIAN THU kemtu na hi.
3. Pathian Hatkhum Ahi:- 2Tim.3:16 – “Laisiangthou peuhmah Pathian hatkhum a piak ahi a; huaiziakin, thuhilhna ding, taihilhna ding, bawl hoihna ding, diktatna lam a kichilna ding in a phatuam hi”. Mihingte, a pilsa, a siamsa, leh a hoihsa kihipah lou in – thuhilh ngai, taihilh ngai, lamdik-lamtang a pi leh chil ngaite adi’a vanzat hoihpen, manphapen leh tulthei lou tuh Laisiangthou Pathian thu ahi. Laisiangthou, Pathian thu in a suk khak louh hinna tuh leitung damsung nangawn a leng misi a ngaih ahi. Pathian hatkhum thu in nang hinna hon bawlthak naikei leh akikhel ma in zuan meng in.
4. Pathian Thu In Mi Ding Kip Sak Hi:- Leitung khovel thuthang tuamtuam leh thiltung zelte’n khatvei vei hon supatau in, hon lingsak, hon puksak thei zelzel hi. Tuabang a buai leh hamhaih tak a i om lai in Pathian tuh a tutna ngei mah ah, ling lou, patau lou, hamhaih lou in om gige chi i thei uhi. Teman mi Eliphaz in Job 4:4 ah, “A puk lai in na thute’n a ding sak a, khuk hat loute na kipsak hi.” Tek leh vuaite adi’a chiangkhun laibu hoihpen tuh Pathian thu Laisiangthou ahi, na neih kei leh leita in.
5. Pathian Thu Manphatna:- Pathian thu manphatna leh hoihna gen seng vual louh, gelh seng vual louh leh suiseng vual louh ahi. Kumpi David in a gen tampite lak a khat gen zek lai le’ng: “Na thu ka khe adingin khawnvak ahi a, ka lampi a ding in vakna ahi” (Sam 119:105). Khawnvak, vak in tuh lampi a hon muchian sak a, kisui lou, lamhaih lou leh gammang lou in, lampi diktak a hon tawnsak a buai lou hial in khawlmun a hon tun ngei ding hi. Jesu’n, “Kei lampi, thutak leh hinna ka hi” A chi (Jn14:6)
6. Kemtu Tuh A Muanhuai Ding Ahi:- Joseph tuh apu Potipher innsung kemtu, a gou leh thil tengteng enkoltu ahi. Potipher ta ahi kei a, a saggam leng ahi sam kei, a sikha ding a sum a alei ahi lel hi. A dinmun niamchik himahleh a pu adi’a a muanhuaina ziakin apu innsung ah deihsakna thupitak a tang, amah ziakin a pu leng Pathian vualzawlna tang in mi thupitak a hongsuak hi. Tuni a nang leh ken I kep PATHIAN THU tuh Pathian hatkhum, thutak, thu hing, thilhihthei, leh manpha ahi. Huiaziakin kemtu tuh a muanhuai ding ahi.
7. A Thu Neipa Toh Khatvei Tei Gen Khawm Ding Ihi:- Talent nga kem pa avapai a talent nga dang a vamuh beh a, huchimah bang in talent nih nei pa’n leng talent nih dang mah a vamuhbeh hi. Himahleh talent khat kempa’n bel a ngeimah apu kiang ah a pe nawn hi. Talent nga leh talent nih muh behte tung ah a pu akipak bang in Toupa thu i kep i gen khawm ni chiang in Toupa’n, “sikha hoih leh muanhuai, hih hoih chia, na pu kipahna ah lut in” a hon chih ding lametna toh ngak in om ni. Leitung a I tam sung, a manphathei pen in Toupa deih bang in, leh I kisik louhna ding pang chiat ni. TOUPA’N hon vualzawl hen!
